Амударёлик ҳамшира “Ўзбекистон Республикаси Соғлиқни сақлаш аълочиси” кўкрак нишони билан тақдирланди

“Йилнинг энг яхши ўрта тиббиёт ва фармацевтика ходими” танлови ғолибларини тақдирлаш маросими бўлиб ўтди. Унда фидокорона меҳнати, касбий маҳорат ва ижтимоий фаоллиги билан ажралиб турган тиббиёт ходимлари алоҳида эътироф этилди. Мазкур тадбирда Амударё тумани тиббиёт бирлашмаси бош ҳамшираси Луиза Янгибоева “Ўзбекистон Республикаси Соғлиқни сақлаш аълочиси” кўкрак нишони билан тақдирланди.

20 май куни Қорақалпоғистон Республикаси Соғлиқни сақлаш вазирлиги мажлислар залида соҳага сидқидилдан хизмат қилаётган, касбий фаолияти билан намуна бўлаётган тиббиёт ходимларини тақдирлаш маросими бўлиб ўтди. Тадбирда Қорақалпоғистон Республикаси соғлиқни сақлаш вазири М. Курбанов, соғлиқни сақлаш ходимлари касаба уюшмаси Республика Кенгаши раиси Л.Байбосинова, Ўзбекистон Ҳамширалар Ассоциациясининг Қорақалпоғистон бўлими бошлиғи Р.Мишенова ва Республика даволаш-профилактика муассасалари раҳбарлари ҳамда соҳанинг илғор ва фидойи вакиллари иштирок этди.

Маросимда Амударё тумани тиббиёт бирлашмаси бош ҳамшираси Луиза Янгибоевага “Ўзбекистон Республикаси Соғлиқни сақлаш аълочиси” кўкрак нишони ҳамда касаба уюшмасининг эсдалик совғалари тантанали тарзда топширилди. Бу эътироф – унинг кўп йиллик самарали меҳнати, масъулиятли муносабати ва тиббий хизмат сифати юксалишига қўшган шахсий ҳиссасига берилган юксак баҳо ҳисобланади.

Шуни алоҳида қайд этиш жоизки, Луиза Янгибоева жорий йилда “Йилнинг энг яхши ўрта тиббиёт ва фармацевтика ходими” танловининг мамлакат босқичида муносиб иштирок этиб, “Йилнинг энг яхши соғлом турмуш тарзи тарғиботчиси” номинациясида I ўринни қўлга киритган эди.

Соғлиқни сақлаш тизимида инсон ҳаёти учун масъулиятни зиммасига олган, ўз касбига садоқат билан ёндашадиган, юксак малакага эга мутахассисларга бўлган эҳтиёж тобора ортиб бормоқда. Тиббиёт фидойиларини рағбатлантириш, уларнинг меҳнатини муносиб қадрлаш мақсадида анъанага айланган “Йилнинг энг яхши ўрта тиббиёт ва фармацевтика ходими” танлови ҳам айнан шу мақсадга хизмат қилмоқда.

Кўрик-танлов доирасида қатнашчилар тиббий ҳужжатларни юритиш, шошилинч тиббий ёрдам кўрсатиш, касаллик аломатлари ва профилактикаси, юқумли касалликларга қарши чоралар, инсон анатомияси ва физиологияси, ҳамширалик иши меъёр ва стандартлари каби йўналишлар бўйича билим ва кўникмаларини намоён этдилар.

Бундан ташқари, улар соғлом турмуш тарзини тарғиб этиш бўйича янгича ёндашувларни тақдим этиш, ҳозиржавоблик, мулоқот маданияти каби мезонлар асосида ҳам баҳоланди. Танлов ғолиблари айнан шу каби комплекс ёндашувлар асосида саралаб олинди.

Айтиш жоизки, соҳа вакилларини рағбатлантиришга қаратилган бундай мукофотлар фақатгина бир шахснинг фаолиятига берилган баҳо эмас, балки бутун жамоанинг, бутун тизимнинг фидойилик асосидаги меҳнатига нисбатан билдирилаётган муносиб эътирофдир. Луиза Янгибоева каби салоҳиятли, билимдон ва садоқатли ҳамшираларнинг аҳоли саломатлигини сақлашда тутган ўрни беқиёсдир.

Шоҳзод Қурбонбоев.