65-сонли мактабда “Долзарб 90 кун” лойиҳаси доирасида “Ёшлар – келажагимиз” шиори остида тадбир бўлиб ўтди

Жорий йилнинг 15 май куни Президент Шавкат Мирзиёев раислигида ўтказилган видеоселектор йиғилишида ёшлар таълим-тарбияси, ёзги таътилни мазмунли ташкил этиш, уларни оромгоҳлар, фан тўгараклари, интеллектуал ўйинлар ва санъат кечаларига жалб қилиш юзасидан аниқ вазифалар белгилаб берилди.

Ушбу устувор вазифалар ижросини таъминлаш мақсадида “Долзарб 90 кун” лойиҳаси амалга оширилиб, мамлакатимизнинг барча ҳудудларида маънавий-маърифий тадбирлар, спорт мусобақалари ва ижодий лойиҳалар ташкил этилмоқда. Ана шундай тадбирлардан бири яқинда Амударё тумани Мактабгача ва мактаб таълими бўлими тасарруфидаги 65-сонли умумтаълим мактабида “Ёшлар – келажагимиз” шиори остида ўтказилди.

Тадбирда туман Мактабгача ва мактаб таълими бўлими бошлиғи Ялғаш Шомурадов, бўлим мутасаддилари, мактаб директори Шаҳноза Хўжамуратова, мактабнинг педагогика жамоаси, ўқувчилар ҳамда уларнинг ота-оналари иштирок этдилар.

Тадбирни мактаб директори Шаҳноза Хўжамуратова очиб, ёшларни маънан қўллаб-қувватлаш ва уларнинг истеъдодини ривожлантириш мақсадида мактабда олиб борилаётган ишлар ҳақида тўхталиб ўтди.

Президентимиз ташаббуси билан жорий этилган “Долзарб 90 кун” лойиҳаси ёшларнинг билим ва қобилиятларини янада ошириш, шахсий ва ижтимоий ривожланишини таъминлашга қаратилган. Мактабда ҳам ушбу вазифаларни самарали бажариш, ўқувчиларни ҳар томонлама ривожлантириш учун зарур шарт-шароитлар яратилган ва бу йўналишда изчил ишлар олиб борилмоқда.

Таъкидлаш жоизки, бу давр мобайнида ўқувчилар ўз иқтидорларини намоён этиб, янги билим ва кўникмаларга эга бўлмоқдалар. Мактаб жамоаси ва ўқитувчилар мазкур лойиҳа доирасидаги тадбирларда фаол иштирок этмоқдалар.

Тадбирнинг бадиий қисми байрамона руҳда ўтди. Бошланғич синф ўқувчилари томонидан ижро этилган беғубор куй-қўшиқлар, ифодали ўқилган шеърлар иштирокчиларга хурсандчилик улашди. Шунингдек, ўқувчилар томонидан ижро этилган шўх рақслар барчага манзур бўлди. Юрт мадҳи, қадрдон мактаб ва беғубор болалик тараннум этилган чиқишлар йиғилганлар қалбида илиқ таассурот қолдирди. Концерт дастури ўқувчиларнинг иқтидорини юзага чиқариш, ижодий фикрлаш ҳамда саҳна маданиятини шакллантиришда муҳим аҳамият касб этди.

Шу ўринда таъкидлаш жоизки, бугунги кунда мазкур таълим муассасасида 74 нафар ўқитувчи самарали фаолият юритмоқда. Улардан 3 нафари олий тоифали, 5 нафари биринчи тоифали, 18 нафари иккинчи тоифали ўқитувчилардир. Уларнинг 4 нафари миллий, 5 нафари эса халқаро даражадаги сертификатларга эга.

Жорий ўқув йилида мактабнинг 11-синфини 24 нафар ўқувчи битказмоқда. Ҳозирда улар давлат имтиҳонларини муваффақиятли топширмоқдалар. Шу билан бирга, мактабнинг 3 нафар энг фаол ўқувчиси турли фанлардан миллий сертификатларга эга.

Тадбир давомида меҳмонлар ўқувчи-ёшларнинг ёзги таътил пайтида бўш вақтини мазмунли ташкил этиш мақсадида ишлаб чиқилган чора-тадбирлар дастури билан таништирилди. Унга кўра, мактабда турли йўналишлардаги тўгараклар, спорт ва маданий тадбирлар режа асосида амалга оширилмоқда.

Хусусан, жисмоний тарбия фани ўқитувчилари Ўктам Болтабоев ва Санжар Ўразбоев ташаббуси билан футбол ва волейбол бўйича ўртоқлик учрашувлари ташкил этилди. Шахмат ва шашка тўгараклари ҳам фаолият юритиб, ўқувчиларнинг интеллектуал салоҳияти ва қизиқишларини юзага чиқармоқда.

“Моҳир қўллар” тўгарагида Гулбарчин Қўнақова раҳбарлигида ўқувчилар чеварлик сирларини ўрганмоқда. Мазкур тўгарак тегишли техника ва жиҳозлар билан таъминланган. “Йўл ҳаракати қоидалари” тўгарагида Рустам Болтабоев ёшларга хавфсиз ҳаракатланиш қоидаларини ўргатмоқда.

Озода Абдуллаева раҳбарлигидаги инглиз тили тўгарагида ўқувчилар хорижий тилни чуқур ўзлаштирмоқда. Баҳром Атабоев раҳбарлигидаги мусиқа тўгарагида эса ўқувчилар миллий ва замонавий мусиқа асбобларини чалишни, мусиқага оид умумий билимларни ўрганишмоқда.

Айниқса, Норгулой Саотбоева раҳбарлик қилаётган “Ёш дастурчилар” тўгараги алоҳида аҳамият касб этмоқда. Унда ўқувчилар ахборот технологиялари бўйича назарий ва амалий билимларни пухта ўзлаштирмоқда.

Мактаб кутубхоначиси Навбаҳор Абдуҳолиқова 15 йилдан буён фаолият юритиб келмоқда. 900 дан ортиқ бадиий адабиётни ўзида жамлаган мактаб кутубхонаси ўзбек ва жаҳон адабиёти дурдоналарини ёшлар онгига сингдиришда муҳим ўрин тутади.

“Заковат” интеллектуал ўйинининг мактаб лигаси, “Менинг маҳаллам – менинг фахрим”, “Ибрат фарзандлари”, “Қизлар академияси”, “Мутолаа” ва “Рақамли авлод қизлари” каби лойиҳалар доирасида ҳам мактабда кенг қамровли тадбирлар ташкил этилиши кўзда тутилган.

Барча тўгараклар фаолияти масъуллар томонидан юксак баҳоланди ва уларни янада самарали ташкил этиш юзасидан тегишли тавсиялар берилди.

Ёшларни ҳар томонлама қўллаб-қувватлаш, уларнинг бўш вақтини тўғри йўналтириш ҳамда турли соҳаларга бўлган қизиқишини ошириш – бугунги куннинг долзарб вазифаларидан биридир. “Долзарб 90 кун” лойиҳаси доирасида амалга оширилаётган ушбу тадбирлар ёшларнинг таътил даврини фойдали ўтказиши, билим ва кўникмаларини ошириши, спорт ҳамда маданият соҳаларида фаол бўлишига замин яратмоқда.

Юлдуз Болтабоева, мактаб директорининг маънавий-маърифий ишлар бўйича ўринбосари.