Сайёр суд мажлисида маъмурий ҳуқуқбузарликка оид 20 та иш кўриб чиқилди

18 июнь куни жиноят ишлари бўйича Амударё тумани суди томонидан Гулзор маҳалла фуқаролар йиғини биносининг мажлислар залида очиқ ва сайёр суд мажлиси ўтказилди.

Жиноят ишлари бўйича Амударё тумани судининг тергов судьяси Донахон Юсупова ҳамда судья ёрдамчиси Элёр Жуманиёзов иштирокида ўтказилган мазкур сайёр ва очиқ суд мажлисида туман ИИБ томонидан тақдим этилган маъмурий ҳуқуқбузарликка оид жами 20 та иш кўриб чиқилди.

Тадбир аввалида тергов судьяси Донахон Юсупова иштирокчиларга Ўзбекистон Республикаси Президентининг “Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги Фармонининг мазмун-моҳияти юзасидан атрофлича тушунтиришлар берди.

Судья таъкидлаганидек, мамлакатимизда коррупциянинг олдини олиш ва унга қарши муросасиз курашишнинг илғор халқаро стандартларга асосланган тизимини жорий этиш бўйича изчил ва самарали чоралар кўрилмоқда. Жумладан, давлат органлари ва ташкилотлар фаолиятида очиқлик ва ошкоралик, мансабдор шахсларнинг аҳоли олдида ҳисобдорлиги таъминланмоқда. Бу эса давлат бошқарувида самарали ва таъсирчан жамоатчилик назоратини амалга ошириш учун ҳуқуқий ва институционал шароитлар яратилишига хизмат қилмоқда.

Дарҳақиқат, коррупция нафақат давлат, балки бутун жамият тараққиёти учун жиддий тўсиқ ҳисобланади. Шу сабабли ҳар бир фуқаронинг ушбу иллатга нисбатан муросасиз муносабатда бўлиши жамиятда адолат, шаффофлик ва тенглик тамойилларини қарор топтиришда муҳим аҳамиятга эга.

Тадбирда “Коррупцияга қарши курашиш тўғрисида”ги Қонуннинг мазмун-моҳияти, мақсад ва вазифалари ҳақида ҳам атрофлича маълумот берилди. Қонун асосида коррупцияга қарши курашишдаги ҳуқуқий муносабатларни тартибга солиш, давлат органлари, ташкилотлар ҳамда фуқаролик жамияти институтлари томонидан амалга оширилаётган чора-тадбирлар самарадорлигини ошириш, аҳолининг ҳуқуқий онги ва маданиятини юксалтириш муҳим аҳамият касб этиши алоҳида қайд этилди.

Сайёр суд мажлиси давомида Ўзбекистон Республикаси Маъмурий жавобгарлик тўғрисидаги Кодекснинг 183-моддасида назарда тутилган ҳуқуқбузарлик — яъни майда безорилик содир этган 9 нафар шахсга нисбатан тўпланган иш материаллари кўриб чиқилди. Суд томонидан уларнинг 5 нафарига маъмурий қамоқ, 4 нафарига эса жарима жазоси қўлланилди.

Шунингдек, Маъмурий жавобгарлик тўғрисидаги Кодекснинг 59²-моддаси 2-қисмида назарда тутилган ҳуқуқбузарлик — оилавий зўравонлик, ҳамда 41-моддасида назарда тутилган ҳақорат қилиш, шунингдек, 52-моддаси 2-қисмида кўрсатилган енгил тан жароҳати етказиш ҳолати бўйича ҳуқуқбузарлик содир этган шахсларга нисбатан ҳам қонуний асосда жазолар тайинланди.

Суд муҳокамалари давомида тарафларнинг фикрлари эшитилиб, далил ва ҳужжатлар таҳлил қилинди. Ҳар бир иш юзасидан холис ва адолатли қарорлар қабул қилинди.

Донахон Юсупова, Жиноят ишлари бўйича Амударё туман судининг тергов судьяси.