Ишонч ва интилиш — муваффақият калити

Инсон кун келиб, ким бўлишини, қайси йўналишда ривожланишини, қандай орзу-мақсадларга интилишини англайди. Бу — инсонни шакллантирадиган, унинг келажакдаги йўлини белгилаб берадиган муҳим босқич. Мен тумандаги 40-сонли мактабни тугатиш арафасида бу ҳақда кўп ўйлаганман. Бугунги кунда эса Жанубий Кореядаги Сежонг университетида иқтисодиёт йўналиши бўйича таҳсил олмоқдаман.

Мактаб даврида тил ўрганишга катта қизиқишим бор эди. Айниқса, рус ва инглиз тиллари мени жуда ўзига жалб қилган. Бу тиллар орқали жаҳон билан мулоқот қилиш, янги билимлар олиш имконияти илҳом бағишларди. Ўшанда ўқитувчи ёки таржимон бўлишни орзу қилардим.

Вақт ўтиши билан аниқ фанларга, айниқса математикага бўлган қизиқишим ортиб борди. Математика ва иқтисодиёт соҳаларида инглиз тили катта ўрин тутади. Ана шу омиллар менинг кейинги танловимни белгилаб берди.

Ҳозирда Сежонг университетида 3-босқич талабасиман. Бу университетда таълим сифати жуда юқори. Биз ўз соҳасининг етук мутахассисларидан, дунё миқёсидаги профессорлардан дарс оламиз. Талабалар учун дарс жадвалини мустақил тузиш имкони берилган. Аммо бу эркинликда жуда кактта масъулият бор. Ҳар бир фан бўйича вақтида билим олиш ва топшириқларни бажариш талаб этилади. Университетдаги рақобат муҳити эса ҳар бир талабани ўз устида тинмай ишлашга ундайди. Ҳар семестрдаги баҳолар асосида грант ажратилиши таълимга жиддий ёндашишга сабаб бўлади.

Кореядаги ҳаётим жуда мазмунли ўтмоқда. Дарсдан ташқари вақтимни асосан кутубхонада ўтказаман, бу ерда ўқиш учун барча шарт-шароитлар яратилган. Маҳаллий аҳоли билан мулоқотда озроқ қийинчилик бўлган, чунки корейс тилини етарлича билмасдим.

Айнан Сежонг университетидаги таълим муҳити менга келажакда қайси йўналишда фаолият юритишим кераклигини тушунишга ёрдам берди. Катта компанияларда молия ёки маркетинг соҳасида ишлашни мақсад қилганман.

Хорижда ўқиш имкониятлари бугунги кунда кўп. Интернет тармоғида жуда яхши манбалар бор, шунингдек, яхши фаолият юритаётган консалтинг агентликлар ҳам йўналиш бериши мумкин. Аммо шуни унутмангки, талабаликка қабул қилингандан кейинги жараён осон бўлмайди. Бу йўлда жиддий меҳнат, вақтини тўғри тақсимлаш ва молиявий барқарорлик керак бўлади.

Шахсан мени оилам ҳамиша қўллаб-қувватлаб келган. Молиявий жиҳатдан имконияти чекланган талабалар учун 100 фоизлик грант таклиф этувчи университетлар ҳам мавжуд. Энг муҳими — ўзингизга ишонинг ва ҳар куни кичк қадам бўлса-да, мақсад сари ҳаракат қилинг.

Бакалавр босқичини якунлагач, Кореяда ўз соҳам бўйича тажриба орттиришни, сўнг магистратурада таҳсилни давом эттиришни ният қилганман. Бундан кейин Корея компанияларида ишлаб, кейинроқ Ватанимга қайтиб, тўплаган билим ва тажрибамни юртим тараққиётига бағишламоқчиман.

Фурсатдан фойдаланиб, барча ёшларни, айниқса, Амударё туманининг билимга чанқоқ ёшларини Ёшлар куни билан табриклайман. Мактаб даврида яхши ўқинг. Хорижий тилларни ўзлаштиринг. Бу давр — ўқиб, ўрганиш даври. Ҳар бир ёш замонавий технологияларни тушуниши, келажак касбларига оид билимларни эгаллаши зарур. Энг муҳими — халқаро даражада билим олиб, юртимиз тараққиёти учун хизмат қилиш йўлидаги интилишингиз сўнмасин.

Ҳаётда энг катта мотивация — ўзингизга ишониш ва орзу сари дадил қадам ташлашдир. Мақсадингиз аниқ бўлса, йўл ҳам топилади!

Мавжуда Ўтамуродова, Жанубий Кореанинг Сежонг университети талабаси.