Нукус шаҳрида “Тоза ҳудуд” акцияси ўтказилди

Бугунги кунда мамлакатимизда экологик барқарорликни таъминлаш, аҳолининг атроф-муҳитга бўлган муносабатини ўзгартириш ва табиат ҳолатини янада яхшилаш мақсадида кенг кўламли тадбирлар амалга оширилмоқда. Президентимиз ташаббуси билан ҳаётга татбиқ этилаётган “Яшил макон” умуммиллий лойиҳаси айнан шу эзгу мақсадларга хизмат қилмоқда. Ушбу лойиҳа доирасида “Янги Ўзбекистон – янги экомакон” шиори асосида кўкаламзорлаштириш ва ободонлаштириш ишлари изчил йўлга қўйилган.

Бундай ташаббуслар орқали жамиятда экологик маданиятни шакллантириш, табиатга эътибор ва эҳтиромни қарор топтиришга эришилмоқда. Юртимиз бўйлаб минглаб фаоллар, турли ташкилотлар ва ёшлар ушбу тадбирларда фаол иштирок этиб, хайрли ишларга ўз ҳиссасини қўшмоқда.

Шу мақсадда Олий Мажлис ҳузуридаги Жамоат фондининг Қорақалпоғистон Республикаси бўлинмаси ташаббуси билан Нукус шаҳрида “Тоза ҳудуд” акцияси ташкил этилди. Тадбир Нукус шаҳар ободонлаштириш бошқармаси ҳамда Ўзбекистон Экология партиясининг Қорақалпоғистон Республикаси бўлинмаси ҳамкорлигида ўтказилди.

Акция доирасида “Дўстлик” канали бўйидаги дам олиш ҳудудлари, майдонлар ва унга туташ кўчалар чиқиндилар ҳамда бегона ўтлардан тозаланди. Экин майдонлари кўчат экишга тайёрланди, мавжуд дарахтларга шакл берилиб, оқланди. Шунингдек, чиқиндилар махсус техникалар ёрдамида белгиланган жойларга ташиб чиқарилди. Бу ишлар шаҳар инфратузилмаси ва табиий муҳит ўртасидаги мувозанатни сақлашга хизмат қилиши билан аҳамиятлидир.

Таъкидлаш жоизки, сўнгги йилларда иқлим ўзгариши, ўртача йиллик ҳароратнинг ошиб бориши, мавсумий қурғоқчилик кучайиши кузатилмоқда. Бу эса Орол денгизининг қуриши минтақадаги иқлимга салбий таъсир кўрсатаётганидан далолатдир. Орол фалокати натижасида ёз фаслидаги иссиқ ва қурғоқчилик кучаяди, қиш фасли эса янада совуқ ва қаҳратон бўлиб, иқлимнинг континентал хусусияти янада чуқурлашди.

Мазкур салбий таъсирларни юмшатиш мақсадида давлатимиз томонидан қатор чора-тадбирлар амалга оширилмоқда. Хусусан, Орол денгизининг қуриган тубида қўшимча 500 минг гектар майдонда яшил ҳудудлар барпо этиш, 2026 йилгача уларнинг умумий ҳажмини 2,5 миллион гектарга – ҳудуднинг 78 фоизига етказиш режалаштирилган. Шунингдек, Оролбўйида “Яшил иқлим” ва Глобал экологик жамғармалар кўмагида биохилма-хиллик, иқлим ўзгариши ва тупроқ емирилишининг олдини олишга қаратилган лойиҳалар амалга оширилмоқда.

Экологик тарғибот ва амалиётни уйғунлаштирган мазкур тадбирда Қорақалпоғистон Республикасидаги нодавлат нотижорат ташкилотлари, фуқаролик жамияти институтлари ҳамда маҳаллий ёшлар фаол иштирок этди. Экофаоллар атроф-муҳитни тозалаш ва кўкаламзорлаштириш ишларини амалга ошириб, барчага ибрат бўлди.

“Тоза ҳудуд” акцияси нафақат шаҳар кўчалари ва дам олиш масканларини ободонлаштириш, балки аҳоли ўртасида экологик маданиятни юксалтиришда ҳам муҳим аҳамият касб этмоқда. Бундай тадбирлар инсонларда табиатга нисбатан масъулият ҳиссини кучайтириб, яшаш муҳитини яхшилашга бўлган интилишни орттирмоқда.

Шаҳар ва қишлоқ ҳудудларини обод қилиш, яшил ҳудудлар сонини кўпайтириш орқали нафақат табиат муҳофаза қилинади, балки инсон саломатлиги ва жамиятнинг умумий ҳаёт сифати ҳам сезиларли даражада яхшиланади.

Юртимиз бўйлаб кенг кўламда ўтказилаётган “Яшил макон” умуммиллий лойиҳаси, “Тоза ҳудуд” акцияси каби ташаббуслар мамлакатимизда экологик барқарорликни таъминлаш, соғлом муҳит яратиш ва аҳолининг табиатга бўлган муносабатини тубдан ўзгартириш йўлидаги муҳим қадамлардан биридир. Бундай ташаббуслар кенг жамоатчиликни бирлаштириб, ҳар бир инсонни табиат муҳофазасида шахсан иштирок этишга ундаётгани билан аҳамиятлидир.

Шоҳзод Қурбонбоев.