Чегара ҳимоячилари учун маъданий-маърифий тадбир ташкил этилди
Санъат инсон қалбига нур бағишлайди, руҳини юксалтириб, маънавий дунёсига ижобий таъсир кўрсатади. Айниқса, куй ва сўз уйғунлигида намоён бўладиган ижод — инсон руҳиятини юксалтирувчи беқиёс қудратдир. Маданият инсон ҳаётида чуқур маънога эга бўлиб, ҳар қандай шароитда ҳам яхшилик ва эзгуликка чорлайди. Шу жиҳатдан, мамлакатимизнинг чегараолди ҳудудларида хизмат олиб бораётган юрт посбонлари учун маданий-маънавий тадбирларнинг ташкил этилиши муҳим аҳамият касб этади.
Ўзбекистон Республикаси Давлат хавфсизлик хизмати Чегара қўшинлари Ашула ва рақс ансамбли томонидан чегараолди ҳудудларда хизмат олиб бораётган ҳарбийлар ҳамда маҳаллий аҳоли учун концерт дастурлари мунтазам равишда ўтказиб келинмоқда.
Шу каби тадбирлардан бири яқинда Қиличбой овулидаги Маданият маркази биносида бўлиб ўтди. Унда ҳарбий хизматчилар, уларнинг оила аъзолари, оддий аскарлар, маҳаллий аҳоли ва ёшлар фаол иштирок этди. Тадбирнинг асосий мақсади — чегара ҳудудида хизмат қилаётган ҳарбийларнинг маънавий оламини бойитиш, уларда Ватанга садоқат, масъулият ва жанговар шайлик туйғусини мустаҳкамлаш, шу билан бирга, маданий ҳордиқ чиқариш имконини яратишдан иборат.
Тадбир давомида сўзга чиққан масъуллар томонидан Давлат хавфсизлик хизмати Чегара қўшинлари Ашула ва рақс ансамблининг фаолияти алоҳида эътироф этилди. Мазкур ижодий жамоа ўз фаолияти давомида мамлакатимизнинг энг олис ҳудудларида хизмат олиб бораётган, давлат чегаралари дахлсизлигини таъминлаётган жасур ўғлонларга жанговар руҳ бағишлаш, уларда ватанпарварлик туйғуларини мустаҳкамлашда муносиб ҳисса қўшаётгани таъкидланди.
Ансамбль ижросидаги миллий ва замонавий куй-қўшиқлар, таниқли санъаткорлар, ёш ижодкорлар ва сўз усталари иштирокидаги чиқишлар тадбирга тантанаворлик бағишлади. Айниқса, ватанпарварлик руҳида янграган куй-қўшиқлар иштирокчилар қалбида унутилмас таассурот қолдирди.
Концерт дастури чегара ҳудудида хизмат қилаётган ҳарбийлар, уларнинг яқинлари ва маҳаллий аҳоли учун маданий ҳордиқ чиқариш, маънавий оламини бойитишга хизмат қилди. Шунингдек, тадбир доирасида ватанпарварлик тарғиботига қаратилган очиқ мулоқотлар, савол-жавоблар ҳам ташкил этилди.
Ушбу мулоқотлар орқали ёшлар ҳарбий хизматнинг муқаддас бурч эканини янада чуқурроқ англадилар. Ватанга садоқат ва фидойилик, миллий армиямизга ҳурмат каби юксак туйғулар қалбларида янада мустаҳкамланди.
Дарҳақиқат, санъат қалбларни боғлайди. Чегара ҳимоячилари учун ташкил этилаётган бундай тадбирлар нафақат маданий ҳордиқ, балки Ватанга муҳаббат ва садоқат туйғуларини мустаҳкамловчи муҳим воситадир. Чегара қўшинлари Ашула ва рақс ансамбли ижросида яратилаётган бадиий асарлар, ватанпарварлик руҳидаги куй ва рақслар халқимиз ғурури, жасорати ва мустақиллигимизнинг ҳақиқий ифодаси саналади.
Ушбу жўшқин садолар Она Ватанимизнинг муқаддас сарҳадлари узра абадий жаранглаб турсин!
Шоҳзод Қурбонбоев тайёрлади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
