“Коррупция – давлат ва жамият тараққиётига таҳдид” номли грант лойиҳаси доирасида давлат мактабгача таълим ташкилотларида коррупцияга қарши курашиш ва болаларнинг соғлом овқатланишига қаратилган ишлар ўрганилди

Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди Қорақалпоғистон бўлинмаси томонидан молиялаштирилган “Коррупция – давлат ва жамият тараққиётига таҳдид” номли грант лойиҳаси доирасида “Амударё телевидениеси” таҳририяти томонидан бир қатор тадбирлар белгиланган.

Яқинда лойиҳа доирасида “Амударё ТВ” телеканали журналист ва мухбирлари туман Мактабгача ва мактаб таълими бўлими билан ҳамкорликда давлат мактабгача таълим ташкилотларида коррупцияга қарши курашиш ва болаларнинг соғлом овқатланишини таъминлаш борасида амалга оширилаётган ишлар ҳолатини ўрганди.

Хусусан, 40-, 43- ва 7-сонли давлат мактабгача таълим ташкилотлари фаолияти таҳлил қилиниб, ушбу муассасалардаги овқатланиш тизими, бошқарувнинг шаффофлиги ҳамда фуқаролик назоратини таъминлаш ҳолатига эътибор қаратилди. Бундай амалий мониторинглар орқали таълим муассасаларида шаффоф бошқарувни таъминлаш, болалар учун хавфсиз ва соғлом муҳит яратишга хизмат қиладиган механизмларни такомиллаштириш мақсад қилинган.

Шу билан бирга, мазкур жараёнда коррупциявий ҳолатларнинг олдини олиш, манфаатлар тўқнашуви эҳтимолини бартараф этиш ҳамда ҳалоллик тамойилларига асосланган бошқарув тизимини мустаҳкамлаш лойиҳанинг устувор йўналишларидан бири сифатида белгиланган.

40-сонли давлат мактабгача таълим ташкилоти Гулзор маҳалла фуқаролар йиғини ҳудудида жойлашган бўлиб, бугунги кунда 6 та гуруҳда 180 нафар бола таълим-тарбия олмоқда. 2022 йилдан бошлаб муассасада овқатланиш хизмати аутсорсинг тизими асосида ташкил этилган. Ушбу тизим таълим муассасаси маъмуриятини овқатланиш билан боғлиқ ташкилий, молиявий ва санитария масалаларидан чегаралаб, болалар таълим-тарбиясига алоҳида эътибор қаратиш имконини яратган. Шу орқали сифатли маҳсулотларни ўз вақтида етказиб бериш, таомлар турлилигини таъминлаш ва санитария-гигиена талабларига риоя этиш билан бир қаторда, коррупциявий хавф-хатарларнинг олди олинишига ҳам эришилган.

43-сонли давлат мактабгача таълим ташкилоти Янгиобод маҳалла фуқаролар йиғини ҳудудида жойлашган бўлиб, бугунги кунда 206 нафар бола таълим-тарбия олмоқда. Бу ерда 42 нафар ишчи-ходим фаолият юритмоқда. 2022 йилдан буён ушбу муассасада ҳам овқатланиш хизмати аутсорсинг асосида ташкил этилган. Муассасада соғлом овқатланишни самарали йўлга қўйиш, санитария ва гигиена талабларига тўлиқ риоя этиш, болаларни тўйимли ва хавфсиз таомлар билан таъминлаш масалаларига алоҳида эътибор қаратилмоқда. Шунингдек, рационал овқатланиш маданиятини шакллантириш орқали таълим-тарбия жараёни самарадорлиги оширилмоқда.

7-сонли давлат мактабгача таълим ташкилоти Дўстлик маҳалла фуқаролар йиғини ҳудудида жойлашган бўлиб, бугунги кунда 5 та гуруҳда 150 нафар бола таълим-тарбия олмоқда. Муассасада ҳам болаларни соғлом ва хавфсиз овқатлантиришга жиддий эътибор қаратилмоқда. Овқатланиш жараёнида озиқ-овқат маҳсулотларининг хавфсизлиги ва сифати кафолатланган. Таом тайёрлашнинг ҳар бир босқичида санитария-гигиена қоидаларига қатъий амал қилинади. Шу билан бирга, болаларда соғлом овқатланишга оид асосий кўникмаларни шакллантириш ва рационал овқатланиш маданиятини ёшликдан сингдириш ишлари тизимли олиб борилмоқда. Юқумли касалликларнинг олдини олиш мақсадида доимий тиббий назорат йўлга қўйилган.

Айтиш жоизки, ўрганишлар давомида 40-, 43- ва 7-сонли давлат мактабгача таълим ташкилотларида соғлом ва хавфсиз овқатланишни ташкил этиш борасида тегишли санитария-гигиена ҳамда эпидемияга қарши чора-тадбирлар самарали йўлга қўйилгани аниқланди. Мазкур мониторинг жараёнлари мактабгача таълим муассасаларида коррупцияга қарши самарали механизмларни шакллантириш ва фуқаролик жамиятининг роли муҳимлигини яна бир бор тасдиқламоқда.

РОБИЯ ЙЎЛДОШЕВА, ШОҲЗОД ҚУРБОНБОЕВ, лойиҳа координаторлари.