14 лойиҳага салкам 1,5 млрд сўм: грант танлови ғолибларига сертификатлар топширилди

17 июль куни Қорақалпоғистон Республикаси Жўқорғи Кенгеси биносида Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди ва мазкур фонднинг Қорақалпоғистон бўлинмаси томонидан эълон қилинган давлат грантлари танловининг ғолибларига сертификатларни топшириш маросими бўлиб ўтди.

Тадбир аввалида оммавий ахборот воситалари вакиллари учун матбуот анжумани ташкил қилинди. Матбуот анжуманида Жамоат фондининг Қорақалпоғистон Республикаси ҳудудий бўлинмаси раҳбари Парахат Турдимуратов фонд томонидан эълон қилинган давлат ижтимоий буюртмалари, келгусида режалаштирилган грант танловларининг йўналишлари ҳамда танловда қатнашиш шартлари ҳақида батафсил маълумотлар берди.

Жумладан, маданий мерос ва туризм соҳаларини ривожлантириш бўйича Қорақалпоғистон Республикаси Вазирлар Кенгашининг давлат ижтимоий буюртмалари бўйича эълон қилинган ташловда фуқаролик жамияти институтлари иштирок этиши мумкин. Ушбу лойиҳаларини амалга ошириш учун жами 2,5 миллиард сўм маблағ ажратилиши режалаштирилган.

Шундан кейин грант танлови ғолибларига сертификатларни топшириш маросими бошланди. Тадбирда Қорақалпоғистон Республикаси Жўқорғи Кенгеси Раисининг ўринбосари Рустам Сапарбаев, Жўқорғи Кенгеснинг қўмита бошлиғи Шарапат Отемисов ва бошқалар сўзга чиқиб, Президентимизнинг 2024 йил 26 августдаги фармони давлат ва жамият ҳаётида фуқаролик жамияти институтларининг фаоллигини янада оширишга хизмат қилаётганини қайд этди.

Ҳудудларда сақланиб қолаётган муаммоларни фуқаролик жамияти институтлари билан ҳамкорликда ҳал этиш, уларнинг ташаббусларини амалга оширишга кўмаклашиш мақсадида жорий йилда Парламент комиссияси аъзолари ва Жамоат фонди вакилларидан иборат ишчи гуруҳ ҳудудларда бўлиб, ижтимоий аҳамиятга эга муаммоларни аниқлаган ва ушбу муаммоларнинг ечимига қаратилган давлат гранти танлови эълон қилинган эди.

Аҳолининг бандлигини таъминлаш, ижтимоий ҳимоя ва соғлиқни сақлаш, атроф-муҳит ва санитария-гигиена шароитини яхшилаш, таълим, маданият ва спортни ривожлантириш, соғлом турмуш тарзини жорий этиш, коррупцияга қарши курашиш каби йўналишларни қамраб олган грант танловига фуқаролик жамияти институтларидан кўплаб лойиҳалар келиб тушди.

Жумладан, Қорақалпоғистонда фаолият юритувчи фуқаролик жамияти институтларидан Олий Мажлис ҳузуридаги Жамоатчилик фонди томонидан эълон қилинган танловга 64 та, Жамоатчилик фондининг Қорақалпоғистон Республикаси бўлими томонидан эълон қилинган танловга эса 40 та ташкилот махсус платформа орқали ўз лойиҳаларини тақдим қилган.

Парламент комиссияси томонидан Қорақалпоғистон Республикаси кесимида 14 лойиҳа ғолиб деб топилди ва лойиҳаларга жами 1 млрд 456 млн сўм маблағ ажратилди.

Тадбир давомида грант танлови ғолибларига махсус сертификатлар тантанали тарзда топширилди.