Аҳмаджон НАФАСОВ
2025 йил 21 июль куни таниқли шоир, ижодкор, педагог ва жамоат арбоби Аҳмаджон Нафасов 71 ёшида оламдан ўтди.
Унинг ҳаёт йўли илм ва маърифатга, адабиёт ва ижодиётга бўлган чексиз муҳаббатнинг ёрқин намунасидир.
Аҳмаджон Нафасов 1954 йилда Амударё туманининг Қизилчоли қишлоғида таваллуд топган. Мактабни тугатгач, 1971-1972 йилларда "Ўзбекистон" хўжалигида ишчи бўлиб фаолият юритган. 1973-1975 йилларда армия сафида хизмат қилган. Отаси – тажрибали ўқитувчи Нафас Жамғуровга ҳавас қилиб болалигидан китоб ўқишга, адабиётга меҳр қўйган Аҳмаджон Нафасов 1975 йилда Тошкент давлат университетининг филология факультетига ўқишга кирди. 1981 йилда ушбу олийгоҳни муваффақиятли тамомлади.
1975-1981 йилларда ёшлар ташкилотида фаолият олиб борган Аҳмаджон Нафасов университетни тугатгач, ўз қишлоғидаги 9-сонли мактабда ўзбек тили ва адабиёти фанидан дарс бера бошлади. Пенсияга чиққунига қадар ушбу таълим даргоҳида кўплаб шогирдлар тайёрлаб, ёшларнинг адабиётга бўлган қизиқишини оширишга, маънавиятини юксалтиришга муносиб ҳисса қўшди.
У 2009 йилда пенсияга чиққанига қарамай, ижодий фаолиятини тўхтатмади. Турли мавзуларда гўзал шеърлар, ғазаллар яратди, публицистик асарлар устида ишлади. Унинг кўплаб шеърлари хонандалар ижросида қўшиқ бўлиб, ҳар бир хонадонга кириб борди. 2011 йилда устози Турсунбой Абдуллаевнинг ҳаёт ва ижод йўлига бағишланган "Саломчи – менинг унвоним" номли, 2018 йилда "Келдим довонлар ошиб" номли китоблари нашрдан чиқиб, адабиёт, санъат ва ижод аҳлининг юксак эътирофига сазовор бўлди ва китобсевар халқимизнинг маънавий мулкига айланди.
2015 йилдан бошлаб "Жайхун илҳомлари" нодавлат нотижорат ташкилотига раислик қилиб, ёш ижодкорларни кашф этиш, уларни қўллаб-қувватлаш ва китобларини нашр этиш ишларига бош бўлди. Унинг саъй-ҳаракатлари билан ўнлаб ёшларнинг муаллифлик китоблари нашрга тайёрланди ва чоп қилинди. Ёш авлоднинг маънавий дунёсини бойитиш ва тафаккурини ривожлантириш мақсадида унинг ташаббуси билан "Жайхун илҳомлари" нодавлат нотижорат ташкилоти қошида кутубхона ташкил қилиниб, туманнинг олис ҳудудларида ҳам кўчма кутубхоналар фаолияти йўлга қўйилди. Китобсевар ёшлар сафи ошиб, китобхонлик оммалашди.
Кейинчалик туманимиздаги 2-сонли мактабда ижодий-маданий масалалар бўйича тарғиботчи вазифасида ишлаб, ёш авлодни маънан баркамол этиб тарбиялаш, фаол ўқувчиларнинг ижодий ишларини кенг жамоатчиликка етказиш, мушоиралар, адабий-бадиий тадбирлар, китобхонлик ва шеърхонлик кечалари ташкил этиш каби ишларда фаоллик кўрсатди. Мактабда "Ёш ижодкорлар" тўгараги фаолиятини йўлга қўйиб, ёшларнинг иқтидорини ривожлантиришга муносиб ҳисса қўшди.
Аҳмаджон Нафасов нуроний сифатида маҳалла ва жамоатчилик ишларида ҳам фаол иштирок этиб, жамиятда ижтимоий-маънавий муҳитни барқарорлаштириш, меҳр-оқибат ва ҳамжиҳатлик туйғуларини мустаҳкамлашда жонбозлик кўрсатди. Умр йўлдоши билан 3 ўғил ва 2 қизни тарбиялаб, жамиятга наф келтирадиган инсонлар қилиб вояга етказди.
Унинг фидокорона меҳнатлари муносиб эътироф этилиб, "Ўзбекистон Халқ маорифи аълочиси" ва "Ўзбекистон мустақиллигининг 25 йиллиги" кўкрак нишонлари билан тақдирланди.
Аҳмаджон Нафасовнинг вафоти ижод аҳли учун оғир жудолик бўлди. Унинг сермазмун умр йўли келгуси авлодларга ибрат бўлиб, гўзал инсоний фазилатлари ва порлоқ хотираси қалбларимизда мангу яшайди.
"Тараққиёт кўзгуси" газетаси ва "Амударё ТВ" телеканали таҳририятлари ҳамда
"Жайхун илҳомлари" ННТ жамоаси, бир гуруҳ ижодкор дўстлари,
устозлари ва шогирдлари
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
