“ҚИШЛОҚ ЖОЙЛАРНИ БАРҚАРОР РИВОЖЛАНТИРИШ” ЛОЙИҲАСИ ДОИРАСИДА УМУМТАЪЛИМ МАКТАБЛАРИНИНГ БИНОЛАРИ РЕКОНСТРУКЦИЯ ҚИЛИНМОҚДА
Мамлакатимизда ўсиб келаётган ёш авлод таълим-тарбиясини замон талаблари даражасида ташкил этиш мақсадида амалга оширилаётган ислоҳотлар сўнгги йилларда соҳада жиддий ўзгаришларга эришиш имконини берди. Айниқса, умумтаълим мактабларининг моддий-техник базаси тубдан янгиланиб, замонавий компьютер технологиялари билан таъминланиш даражаси ошди, энг олис ҳудудлардаги мактабларнинг ўқувчилари ҳам тўлиқ интернет тармоғига уланган компьютер синф хоналарида таълим-тарбия олиш, ахборот-коммуникация воситаларидан самарали фойдаланиш имконига эга бўлдилар. Давлатимизнинг беқиёс ғамхўрлиги туфайли бугунги ўқувчи-ёшлар ҳар томонлама қулай шароитларда ўқиб, билим олмоқдалар. Фақат сўнгги 7 йил давомида мамлакатимизнинг турли ҳудудларида 5 мингдан зиёд замонавий қиёфадаги мактаблар ташкил этилди. 2025 йилнинг ўзида 608 та мактабда қурилиш-таъмирлаш ишлари олиб борилди ва бу каби соҳани модернизация қилишга қаратилган чора-тадбирлар 2025-2026 ўқув йилида ҳам изчиллик билан давом эттирилмоқда. Хусусан, 2025-2026 ўқув йилида мамлакатимизда 100 дан зиёд мактаблар ташкил этилиб, 257 минг ўқувчи ўрнини очиш, хорижий тилли мактаблар сонини 420 тага, ўқувчи-ёшларни касб-ҳунарга йўналтиришга қаратилган таълим муассасаларини 400 тага етказиш кўзда тутилган.
Ўзбекистон Республикаси Президентининг 2024 йил 24 декабрдаги “2025-2027 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги Қарорига кўра, Инвестиция дастури доирасида “Ўзбекистон—2030” стратегиясида белгилаб берилган вазифаларни ҳаётга татбиқ этиш, айниқса, 2025 йилдан бошлаб ҳар йили умумтаълим мактабларининг санитария-гигиеник инфратузилмасини яхшилаш учун камида 100 млрд сўм ажратиб бориш амалиёти жорий этилиб, “Очиқ бюджет” ахборот портали орқали жамоат фикри ва аҳоли истаклари асосида таъмирталаб ҳолатдаги ва олис ҳудудларда жойлашган мактабларни таъмирлаш ва реконструкция қилиш белгиланган эди. Ушбу вазифаларни амалга ошириш мақсадида Амударё туманида ҳам кенг қамровли ишлар амалга оширилмоқда. Мактабгача ва мактаб таълими бўлими тасарруфидаги таъмирталаб, бугунги кундаги қуввати, моддий-техник имкониятлари талаб даражасида бўлмаган умумтаълим мактабларининг инфратузилмасини яхшилашга қаратилган қуриш ва реконструкция ишлари олиб борилмоқда.
Айни пайтда Амударё туман Мактабгача ва мактаб таълими бўлими тасарруфида умумий қуввати 33 минг 135 ўринга эга 86 та мактаб ва 1 та “Баркамол авлод” болалар маркази мавжуд. Уларда жами 38 минг 769 нафар ўқувчи-ёшлар таълим-тарбия олишмоқда. Давлатимизнинг беқиёс ғамхўрлиги натижасида туманнинг энг чекка ҳудудларидаги мактаблар ҳам интернет тармоғига уланиб, ёш авлоднинг ҳар томонлама мукаммал билим олишлари учун зарур шарт-шароитлар яратилган. Чойкўл овулидаги 59-сонли умумтаълим мактаби яқин-яқинларгача ҳудуддаги 22-сонли мактаб филиали сифатида фаолият олиб борувчи, шароитлари ҳаминқадар даражадаги таълим-тарбия муассасаси эди. Мослаштирилган бинода жойлашган мазкур мактаб аҳоли сонининг ўсиб бориши, қолаверса, бошланғич таълимдан сўнг ҳудуд ёшларининг овул марказидаги 22-сонли мактабга қатнаб ўқишида қийинчиликлар юзага келаётгани инобатга олиниб, муассаса 59-сонли умумтаълим мактабига айлантирилди. Албатта, бу билан муаммо ҳал бўлмади, қишда совуқ ва зах тортган тор, ёзда иссиқ ва дим синфхоналарда ўқиш нафақат ўқувчилар, балки ўқитувчилар учун ҳам эмин-эркин машғулотларни ўтказиш имкони кам эди.
Айни кунларда Инвестиция дастури доирасида 59-сонли мактаб учун 180 ўринли янги бино, 12х24 ўлчамдаги замонавий спорт зали қурилиши жадал суръатларда олиб борилмоқда. Тендер баҳоси 4 млрд 500 млн сўмга яқин бўлган мазкур бунёдкорлик ишлари “Амударё хизмат кўрсатиш” МЧЖ қурувчилари томонидан сифатли амалга оширилмоқда.
Шунингдек, Бўз ёп овулида жойлашган 68-сонли мактабда “Қизкеткен махсус қурилиш” МЧЖ қурувчилари томонидан умумий қиймати 10 млрд. 400 млн сўмга яқин бўлган жами 510 ўринли ўқув биноси, 12х24 ўлчамдаги 2 та спорт зали қурилиши жадал суръатларда олиб борилмоқда.
Қурилиш ишларининг ўз муддатида ва сифатли амалга оширилиши туман прокуратураси томонидан доимий назоратга олинган. Бу эса лойиҳа асосида белгиланган вазифаларнинг ўз вақтида, шаффоф ва самарали бажарилишига хизмат қилмоқда.
“Қишлоқ жойларни барқарор ривожлантириш” лойиҳаси доирасида амалга оширилаётган бу каби бунёдкорлик ишлари нафақат ҳудудлар инфратузилмаси билан боғлиқ муаммоларни ижобий ҳал этиш, балки ўсиб келаётган ёш авлод таълим-тарбияси билан боғлиқ умуммиллий аҳамиятга молик ишларни жаҳон андозалари даражасига кўтариш имконини беради.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
