"ТАРАҚҚИЁТ КЎЗГУСИ" ГАЗЕТАСИ ТАҲРИРИЯТИНИНГ ГРАНТ ЛОЙИҲАСИ ДОИРАСИДА ЎТКАЗИЛГАН ИНШОЛАР ТАНЛОВИ ҒОЛИБЛАРИ ТАҚДИРЛАНДИ
Коррупция — жамият фаровонлигининг энг хавфли душмани, давлат тараққиётига тўсиқ бўлувчи иллатдир. Шахсий манфаатни кўзлаб пора бериш ёки олиш, бойлик ортидан таъмагирлик қилиб, мансаб ваколатини суиистеъмол қилиш, ўзганинг ёки давлат ва жамоатчиликнинг мулкини эгаллаш — буларнинг барчаси коррупциянинг энг жирканч кўринишларидир.
Бугунги кунда коррупцияга қарши курашиш давлатимиз сиёсатининг устувор йўналишларидан бирига айланган. Жамиятнинг барча бўғинларида ушбу иллатга қарши муросасизлик кайфиятини шакллантиришга қаратилган тарғибот-ташвиқот ишлари олиб борилмоқда. Айниқса, ўсиб келаётган ёш авлод онгида адолат ва поклик туйғусини мустаҳкамлаш мақсадида кенг қамровли тадбирлар ташкил этилмоқда.
“Тараққиёт кўзгуси” газетаси таҳририяти томонидан Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фондининг молиявий кўмагида амалга оширилаётган “Биз коррупцияга қаршимиз!” номли грант лойиҳаси ҳам ана шу иллатга қарши курашишга қаратилган. Лойиҳа доирасида ҳуқуқшунослар, жамоат фаоллари, нуронийлар ва ёшлар иштирокида учрашувлар ва давра суҳбатлари ўтказилиб, фуқаролар ҳамда ёшлар онгида коррупцияга қарши муросасизлик туйғусини шакллантириш, ҳуқуқий саводхонликни ошириш борасида ижобий натижаларга эришилмоқда.
Грант лойиҳаси иш режасига мувофиқ, жорий йил август ойининг биринчи ўн кунлигида Амударё туман Мактабгача ва мактаб таълими бўлими билан ҳамкорликда “Коррупциясиз жамият қурамиз!” мавзусида иншолар танлови ўтказилди.
Танловда туман умумтаълим мактабларининг 5–11-синфларида таҳсил олувчи 50 га яқин ўқувчи иштирок этди. Улар ўз иншоларида коррупциясиз жамият ҳақидаги фикр ва орзу-истакларини ифода этдилар.
Танловда “Баркамол авлод” болалар мактаби тўгаракларида шуғулланувчи ўқувчилар фаол иштирок этишди. Танлов эълон қилингач, тўгарак раҳбарлари томонидан ўқувчиларга коррупциянинг жамиятга зарари ва унга қарши давлат миқёсида амалга оширилаётган ишлар ҳақида тушунчалар берилди. Савол-жавоблар орқали уларнинг билимлари синовдан ўтказилди. Иншо ёзиш жараёнида иштирокчиларга ўз фикрларини эркин ифода этиш имконияти яратилди, жараён мактаб педагоглари томонидан кузатиб борилди.
Мактаб босқичида “Ментал арифметика” ва биология тўгараклари аъзолари томонидан ёзилган энг сара иншолар танлаб олиниб, “Тараққиёт кўзгуси” газетаси таҳририятининг ҳакамлар ҳайъатига тақдим этилди.
2025 йил 7 август куни грант лойиҳаси координаторлари “Баркамол авлод” болалар мактабида бўлиб, танлов ғолибларини тақдирлаш маросимини ўтказдилар. Улар мактаб жамоасига ёш авлод онгида коррупцияга қарши муросасизлик туйғусини шакллантириш ва иқтидорларни ривожлантириш борасидаги ишларида муваффақият тиладилар.
Танлов натижаларига кўра “Баркамол авлод” болалар мактабининг “Ментал арифметика” тўгараги аъзоси Жавоҳир Мақсудов “Коррупциясиз жамият қуриш борасидаги илғор фикрлари учун” номинацияси бўйича 1-ўринга лойиқ деб топилди.
“Коррупцияга қарши курашиш бўйича энг яхши тарғиботчи” йўналишида эса 55-мактабнинг 5-синф ўқувчиси, “Баркамол авлод” тўгараги аъзоси Ойдиной Исмоилова ғолибликни қўлга киритди. Ушбу йўналишда “Ментал арифметика” тўгараги аъзоси, 31-сонли мактаб ўқувчиси Темурбек Ўрозматовга эса 2-ўрин насиб қилди.
“Коррупцияга қарши курашишда тенгдошларини руҳлантирувчи фикрлари учун” номинациясига 38-сонли мактаб ўқувчиси, биология тўгараги аъзоси Динора Файзуллаева ва 40-сонли мактабнинг 7-синф ўқувчиси Ҳилола Шукуруллаевалар сазовор бўлдилар.
Ғолибларга “Тараққиёт кўзгуси” газетаси таҳририяти томонидан фахрий ёрлиқ ва эсдалик совғалари топширилди.
Робия Йўлдошева
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
