Қишлоқ хўжалиги вазири иштирокида ўтказилган республика миқёсидаги сайёр қабулда фермерлар ва кластер вакилларининг муаммолари жойида ҳал этилди

Қишлоқ хўжалиги мамлакатимиз иқтисодиётида стратегик аҳамиятга эга соҳа ҳисобланади. Айниқса, Қорақалпоғистон ҳудудида бу йўналиш аҳолининг барқарор даромад манбаи, озиқ-овқат хавфсизлигининг кафолати ҳамдир. Шу боис, соҳада самарадорликни ошириш, фермер ва деҳқонларнинг ташаббусларини қўллаб-қувватлаш, уларнинг муаммоларини тезкорлик билан ҳал этиш давлат сиёсатининг устувор йўналишларидан бири бўлиб келмоқда.

Шу мақсадда, жорий йил 12 август куни Ўзбекистон Республикаси Қишлоқ хўжалиги вазири Иброҳим Абдураҳмонов раҳбарлигида Амударё тумани Қиличбой овули ҳудудидаги “Амирхон” фермер хўжалиги дала шийпонида муҳим йиғилиш бўлиб ўтди. Тадбирда жанубий ҳудудларда аграр соҳада ечимини кутаётган масалаларга амалий ечим топиш ҳамда вертикал бошқарув тизими самарадорлигини ошириш масалалари атрофлича муҳокама қилинди.

Йиғилишда Қорақалпоғистон Республикаси Вазирлар Кенгаши Раисининг қишлоқ ва сув хўжалиги масалалари бўйича ўринбосари Шуҳрат Тешаев, республика бўйича барча туман ҳокимларининг соҳа бўйича ўринбосарлари, вазирлик тизимидаги ташкилот раҳбарлари, соҳага алоқадор мутасаддилар, шунингдек, тўғридан-тўғри ишлаб чиқаришда фаол бўлган фермерлар, деҳқонлар ва кластер раҳбарлари иштирок этдилар.

Вазир Иброҳим Абдураҳмонов ўз нутқида сўнгги йилларда давлатимиз томонидан Қорақалпоғистон қишлоқ хўжалиги соҳасини ривожлантириш учун яратилаётган кенг имкониятларга алоҳида тўхталди. Жумладан, имтиёзли кредитлар ажратиш, субсидия тизимини такомиллаштириш, ер ажратишдаги янгиликлар ҳамда сув ресурсларидан оқилона фойдаланиш имкониятлари ҳақида батафсил маълумот берди.

Шунингдек, йиғилишда сўзга чиққан Шуҳрат Тешаев республикада қишлоқ хўжалиги соҳасини ривожлантириш йўлида амалга оширилаётган ишлар, киритилаётган янгиликлар ва тизимдаги ўзгаришлар ҳақида тўхталди. У ҳудудларда замонавий суғориш технологияларини жорий этиш, экспорт салоҳиятини ошириш, ички бозорни сифатли маҳсулотлар билан таъминлаш ҳамда фермер хўжаликлари фаолиятини қўллаб-қувватлаш борасида олиб борилаётган кенг кўламли ишларни таъкидлади. Шу билан бирга, деҳқон ва фермерларнинг ташаббусларини рағбатлантириш, уларга илмий асосланган агротехник тавсиялар етказиш тизимини кучайтириш бўйича қилинаётган ишларга эътибор қаратди.

Йиғилиш доирасида ташкил этилган сайёр қабул давомида фермер ва кластер вакиллари ўз мурожаатлари билан чиқишди. Ер ажратилиши, суғориш имкониятларини кенгайтириш, субсидия ва кредит масалалари, шунингдек, соҳага оид ҳуқуқий масалалар бўйича келиб тушган мурожаатлар мутасаддилар иштирокида жойида ижобий ҳал этилди. Қолган масалалар юзасидан эса масъулларга аниқ муддатлар белгиланган топшириқлар берилди.

Хулоса ўрнида айтиш мумкинки, мазкур йиғилиш ва сайёр қабул қишлоқ хўжалигида бошқарув тизимини замонавийлаштириш, очиқ мулоқотни йўлга қўйиш ва муаммоларни жойида ҳал этиш йўлидаги муҳим қадам бўлди. Бу жараён аграр соҳани янада ривожлантириш, фаол фермерларни қўллаб-қувватлаш ҳамда тизимда ошкораликни таъминлашга хизмат қилади. Энг муҳими, бу каби учрашувлар фермер ва деҳқонларда ишонч, ташаббускорлик ҳамда меҳнатга янгича ёндашув ҳиссини мустаҳкамлайди.

Чарос Арслонова, туман ҳокимлигининг Ахборот хизмати раҳбари.