"КОРРУПЦИЯ — ДАВЛАТ ВА ЖАМИЯТ ТАРАҚҚИЁТИГА ТАҲДИД" ГРАНТ ЛОЙИҲАСИ ДОИРАСИДА ТАЪЛИМ СОҲАСИ ХОДИМЛАРИ ИШТИРОКИДА ТАДБИР ЎТКАЗИЛДИ

Инсон борки, эзгу орзулар билан яшайди: ҳаллоллик, адолат устувор, имкониятлар тенглиги таъминланган жамиятни барпо этиш ва ана шу жамиятнинг бахтли аъзоси бўлиш умиди уни ҳеч қачон тарк этмайди. Бироқ кўпинча бу орзу-умидларимизнинг рўёбга чиқиши жуда қийин кечади. Бюрократик тўсиқлар, манфаатлар тўқнашуви, фирибгарлик ҳолатлар бу жараёнларни янада чигаллаштиради. Коррупция – ана шундай тўсиқларни келтириб чиқарувчи, адолатли жамият қуриш йўлидаги энг ёмон иллатдир.

2017 йил 3 январда қабул қилинган “Коррупцияга қарши курашиш тўғрисида”ги Ўзбекистон Республикаси Қонуни талабларига кўра, мамлакатимизда очиқлик ва шаффофлик, давлат ва фуқаролик жамиятининг ҳамкорлиги, коррупциянинг олдини олишга доир чора-тадбирлар устуворлиги ва жавобгарликнинг муқаррарлигини таъминлашга алоҳида эътибор қаратилмоқда.

Амударё телевидениеси таҳририятининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди Қорақалпоғистон бўлинмаси томонидан молиялаштирилган “Коррупция – давлат ва жамият тараққиётига таҳдид” мавзусидаги грант лойиҳаси доирасида амалга оширилаётган тарғибот-ташвиқот тадбирлари ҳам аҳолининг ҳуқуқий онги ва маданиятини юксалтириш, жамиятда коррупцияга қарши муросасиз муносабатни шакллантиришга қаратилгани билан муҳим аҳамият касб этмоқда.

Ана шундай тарғибот-ташвиқот тадбирларидан бири жорий йилнинг 15 август санасида Амударё туман Мактабгача ва мактаб таълими бўлими тасарруфидаги 76-сонли умумтаълим мактабида ҳам ўтказилиб, унда Амударё туман прокурори катта ёрдамчиси Оғабек Эркулиев, туман Мактабгача ва мактаб таълими бўлими бошлиғи Ялғаш Шомуратов, “Юсуф Эшон бобо” жомъе масжиди имом-хатиби Абдураҳмон Матсапаев, Қорақалпоғистон Республикаси Жўқорғи Кенгеси ва маҳаллий Кенгаш депутатлари, умумтаълим мактабларининг директорлари, маънавий-маърифий ишлар бўйича ўринбосарлари, таълим соҳаси фаоллари ҳамда ОАВ вакиллари иштирок этдилар.

Тадбирни туман Мактабгача ва мактаб таълими бўлими бошлиғи Ялғаш Шомуратов очди ва мамлакатимизда барча соҳаларда, шу жумладан таълим тизимида коррупцияга қарши курашиш ва унинг олдини олиш чораларини амалга ошириш, ҳар қандай кўринишдаги қонунбузарлик ҳолатлари учун жавобгарлик муқаррарлиги юзасидан кенг қамровли тушунтириш ишлари олиб борилаётгани ҳусусида батафсил сўз юритди. Айниқса, ўсиб келаётган ёш авлод онгида коррупцияга нисбатан муросасизлик туйғусини шакллантиришда педагогларнинг ўрни муҳимлигини таъкидлади.

Тадбир давомида “Коррупция – давлат ва жамият тараққиётига таҳдид” номли грант лойиҳаси координатори Робия Йўлдошева сўзга чиқиб, мазкур лойиҳанинг мазмун-моҳияти ва уни амалга оширишдан кутилаётган натижалар ҳусусида батафсил маълумотлар берди. Шу билан бирга, жамият тараққиёти ва инсонларнинг орзу-ниятларини амалга ошириш йўлидаги энг катта тўсиқ – коррупция иллатига қарши курашишда таълим-тарбия соҳаси ходимлари билан давлат ва жамоат ташкилотлари ҳамда ОАВнинг ҳамкорлиги бу борада ижобий натижалар бериши қайд этилди.

Шундан сўнг, Амударё туман прокурорининг катта ёрдамчиси Оғабек Эркулиев коррупцияга қарши курашиш борасида мамлакатимиз қонунчилигидаги нормалар, ушбу йўналишда олиб борилаётган кураш чоралари ва назорат тадбирлари ҳақида маъруза қилди.

У ўз маърузасида коррупцияга қарши курашиш – бу фақат давлатнинг, ҳуқуқни муҳофаза қилиш органлари ходимларининг иши эмас, балки ҳар бир онгли инсоннинг, айниқса, таълим-тарбия соҳаси ходимларининг зиммаларидаги мажбурият эканлигини таъкидлади. Яъни, ҳалол яшашни танлаш, қонун асосида иш юритишни талаб қилиш, ҳар қандай вазиятда ҳақиқатни айтиш бу борадаги курашишнинг энг самарали усули бўлиб, унга амал қилиш ҳар бир инсоннинг бурчи бўлиши лозимлигини таъкидлади ва барчани ана шу бурч масъулиятини ҳар доим ҳис этиб яшашга даъват этди.

Шунингдек, тадбирда сўзга чиққан туман бош имом-хатиби Абдураҳмон Матсапаев коррупцияга қарши курашишдаги исломий ҳукмлар тўғрисида, Қорақалпоғистон Республикаси Жўқорғи Кенгеси депутати, 40-сонли умумтаълим мактаби директори Санобар Хўжамуротова эса коррупцияга қарши курашишда миллий-маънавий қадриятларнинг аҳамияти, болани жуда ёшлигидан ёлғон сўзламаслик, ўзганинг нарсасига эгалик қилишга интилмасликка ўргатиш, фирибгарлик билан мол-дунё орттиришга мойил бўлишнинг салбий оқибатларини тушуниш руҳида тарбиялаш борасидаги ҳаётий мисоллар билан ўз фикрларини билдирдилар.

Дарвоқе, бугунги кунда мамлакатимизда коррупцияга қарши курашиш бўйича муҳим ва жиддий қадамлар қўйилди. Хусусан, давлат хизматларининг рақамлаштирилиши, ОТМларда тест синовлари ва ходимларни ишга қабул қилишнинг шаффофлиги, ОАВ ҳамда блогерларнинг эркинлиги. Лекин булар коррупциядек жирканч иллатга қарши курашишда етарли эмас. Асосий ўзгариш ва муросасизлик инсонлар онгида бўлиши керак. Ўсиб келаётган ёш авлод ҳаллоллликни қадрлашни, ҳар қандай ҳолатда ҳақиқатни сўзлаши ва ноқонуний йўллар билан бойлик орттиришдан тийилиши шарт. Ана шундагина биз юксак тараққий этган коррупциясиз демократик жамиятни барпо этамиз.

Равшан Баҳромов, грант лойиҳаси координатори