ПРЕЗИДЕНТИМИЗНИНГ БМТ МИНБАРИДАН БИЛДИРГАН ТАКЛИФ ВА ТАШАББУСЛАРИ ҚАЛБИМДА ИФТИХОР УЙҒОТДИ
АҚШнинг Нью-Йорк шаҳрида 23 сентябрь куни бўлиб ўтган БМТ Ассамблеясининг 80-юбилей сессияси минбаридан туриб, муҳтарам Президентимиз Ш. М. Мирзиёев ўзбек тилида нутқ сўзладилар. Мен бир ижодкор сифатида давлатимиз раҳбарининг юксак минбардан туриб, она тилимиз қадрини дунё миқёсида янада баланд кўтарганларидан чексиз ғурурландим. Қолаверса, дунё миқёсидаги глобал муаммолар ҳақида ўзбек тилида фикр юритиб, тилимизнинг нақадар жарангдорлигига сессия иштирокчиларининг эътиборларини қаратганларидан фахрландим.
Бундан 8 йил аввал Президентимиз ушбу минбардан туриб, ўшанда ҳам соф ўзбек тилида Марказий Осиёни тинчлик ва яхши қўшничилик ҳамда шериклик маконига айлантиришга қарор қилганларини билдирганини эсладим. Бу галги чиқишларида эса Президентимиз мамнуният билан: "Биз бу стратегик мақсадга тўла эришдик, ёпиқ чегаралар, ҳал этилмаган баҳс-низолар тарихда қолди", — деб таъкидладилар.
Ҳақиқатан ҳам, бугунги Марказий Осиё дунё ҳамжамияти кўз ўнгида том маънода барча йўналишлар бўйича юқори даражада интеграциялашаётган, миллатлараро тотувлик, иқтисодиёти барқарор ривожланаётган ҳудудга айланиб бормоқда. Албатта, бу жараёнда Ўзбекистон дўстона мулоқот, ташаббускорлик, миллатлар ва элатларни бирлаштирувчи куч, тинчлик ва тараққиёт таянчи сифатида ўзини намоён этмоқда.
Президентимиз БМТ минбаридан туриб нафақат Марказий Осиё минтақаси, балки бутун дунё мамлакатлари халқлари ҳаётига дахлдор глобал муаммоларга тўхталиб, қатор таклиф ва ташаббусларни илгари сурдилар.
Хусусан, Президентимизнинг Бутунжаҳон профессионал таълим саммитини ўтказиш, Афғонистон орқали транспорт, энергетика коридорларини ривожлантириш, терроризмга қарши курашиш бўйича минтақавий марказни ташкил этиш, ёшлар учун глобал ҳаракат платформасини яратиш каби таклиф ва ташаббуслари халқаро ҳамжамият учун долзарб аҳамиятга эга бўлди.
Президентимиз Афғонистондаги бугунги вазият, Ғазода, Украинада бўлаётган урушлар халқаро миқёсда инвестиция оқимларини, товар ва хизматлар айланишини издан чиқариб, бутун дунё тадбиркорлик муҳитини ёмонлаштираётганини таъкидлади.
Бундан ташқари, экология ва қурғоқчилик масалаларида ҳаракатларни бирлаштириш, қишлоқ жойларда хотин-қизларни иш билан таъминлаш, муносиб меҳнат шароитларини яратиш, уларни ижтимоий ҳимоялаш борасида Осиё хотин-қизлар форумини доимий платформага айлантириш борасида таклифларини билдирдилар.
Айниқса, "Жаҳон ёшларининг тинчлик сари ҳаракати"ни таъсис этиш ва унинг қароргоҳини Ўзбекистонда жойлаштириш тўғрисидаги Президентимизнинг таклифи эътиборга муносиб бўлди.
Шу билан бирга Президентимиз: "Ёшлар — тинчлик, тараққиёт ва ҳамкорлик ғояларини ташувчи ресурс", — деб муносиб баҳо бердилар.
Мен Президентимизнинг БМТ юксак минбаридан туриб билдирган ҳар бир ташаббус ва таклифларининг Марказий Осиё ва дунё халқлари ҳаётига дахлдорлиги нуқтаи назаридан жуда катта сиёсий-ижтимоий ва иқтисодий аҳамият касб этишини ва давлатлар, миллатлар ва элатлар келажаги йўлидаги муҳим қадам деб биламан ва ана шу жараёнларда бир ижодкор сифатида ўзимнинг ҳам иштирок этишимдан фахрланаман.
ХОНИМЖОН РАЖАБОВА,
Ўзбекистон Ёзувчилар уюшмаси аъзоси,
Халқ депутатлари Амударё туман Кенгаши депутати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
