Куз-қиш мавсумига тайёргарлик ишлари ва энергия самарадорлиги — Прокуратура назоратида
Амударё туманида куз-қиш мавсумини беталофат ўтказишга қаратилган чора-тадбирларнинг сифатли ва ўз вақтида амалга оширилиши устидан туман Прокуратураси томонидан қатъий назорат ўрнатилган. Бу назоратнинг асосий мақсади – аҳоли ва ижтимоий соҳа объектларини зарур ёқилғи ресурслари ҳамда энергия билан таъминлашдаги мавжуд муаммоларни ўз вақтида аниқлаш ва бартараф этишдан иборат бўлиб, аҳолининг қиш мавсумидаги фаровонлигини таъминлашга қаратилгани билан аҳамиятлидир.
Туман прокурорининг катта ёрдамчиси Шарьяр Жолдасов томонидан ўтказилган навбатдаги назорат тадбирлари доирасида “Кўмир таъминоти” МЧЖ Қорақалпоғистон Республикаси филиали Амударё кўмир омборининг фаолияти ўрганилди. Асосий эътибор аҳоли хонадонларига ва ижтимоий соҳа объектларига кўмир маҳсулотининг узлуксиз ва адолатли тарқатилиши бўйича кўрилаётган чораларни ўрганишга қаратилди.
Ўрганиш жараёнида кўмир маҳсулотини тарқатиш тизимида ижрочи ташкилот томонидан айрим камчиликларга йўл қўйилгани аниқланди. Жумладан, кўмир омборида тарозининг ўрнатилмаганлиги истеъмолчиларга кўмирнинг аниқ ўлчамда етказиб берилишида шаффофликни таъминлашга тўсқинлик қилаётганлиги маълум бўлди. Шунингдек, кўмирни истеъмолчиларга ўз вақтида етказишда транспорт масаласидаги муаммолар мавжудлиги қайд этилди. Бу ҳолатлар аҳолининг ҳақли эътирозларига сабаб бўлиши мумкин.
Туман прокуратураси томонидан мазкур камчиликларни зудлик билан бартараф қилиш бўйича тегишли кўрсатмалар берилди. Ўлчов аниқлигини таъминлаш учун тарози ўрнатилиши ва логистика масалаларининг ҳал этилиши орқали ёқилғи маҳсулотларини узлуксиз ва адолатли етказиб бериш, аҳолининг ҳақ-ҳуқуқларини ҳимоя қилиш ва тизимдаги суиистеъмолликларнинг олдини олиш таъминланади.
Назорат тадбирлари фақат ёқилғи ресурслари билан чекланиб қолмади, балки мамлакатдаги энергия самарадорлигини ошириш ва муқобил энергия манбаларига ўтиш сиёсатининг тумандаги ижроси ҳам кўздан кечирилди. Хусусан, Намуна маҳалласи ҳудудидаги фермер хўжаликларида муқобил энергия манбаларидан фойдаланиш ҳолати ўрганилди.
Ўрганиш натижасида иккита фермер хўжалигининг бу борадаги илғор ташаббуслари алоҳида қайд этилди. Жумладан, “Муродбек Зебо” фермер хўжалиги томонидан 250 кВт, “К.Хамид” фермер хўжалиги томонидан 70 кВт қувватга эга қуёш панеллари ўрнатилганлиги нафақат иқтисодиётда “яшил энергия”нинг улушини кўпайтиришга, балки фермер хўжалигининг харажатларини қисқартириш орқали даромадларини оширишга ҳам хизмат қилиши қайд этилди.
Чиндан ҳам, фермер хўжаликлари томонидан бу каби қуёш панелларининг ўрнатилиши нафақат уларнинг ўз эҳтиёжларини таъминлаш, балки электр энергияси тақчиллиги мавсумида умумий тармоққа қўшимча энергия етказиб бериш орқали ҳудуднинг энергия барқарорлигига ҳисса қўшишда ҳам муҳим аҳамиятга эга. Прокуратура бу йўналишдаги давлат дастурларининг ижросини ҳам доимий назоратга олган.
Хулоса қилиб айтганда, куз-қиш мавсумига тайёргарлик доирасида амалга оширилаётган ишлар устидан прокурор назорати изчил давом эттирилмоқда. Бу аҳоли ва иқтисодиёт тармоқларини қиш мавсумига тайёрлаш борасидаги давлат сиёсатининг сўзсиз ижросини таъминлаш ва аҳоли манфаатларини ҳимоя қилишда муҳим омил бўлиб хизмат қилмоқда. Назорат тадбирларининг давом этиши эса тизимда юзага келиши мумкин бўлган ҳар қандай ноқонуний ҳолатларнинг олдини олишга қаратилган профилактик чора сифатида катта аҳамият касб этмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
