Давлат мактабгача таълим ташкилотларида соғлом овқатлантиришни ташкил этиш бўйича назорат тадбирлари ўтказилмоқда

Амударё тумани Мактабгача ва мактаб таълими бўлими тасарруфида 52 та мактабгача таълим ташкилотлари мавжуд. Мазкур муассасаларда туман Санитария-эпидемиологик осойишталик ва жамоат саломатлиги бўлими томонидан болаларни соғлом овқатлантириш ҳолати ўрганилиб, Вазирлар Маҳкамасининг тегишли қарорига мувофиқ белгиланган режавий-жадвал асосида ҳар ойда санитария назорати ўтказилиб борилмоқда.

Бундан ташқари, туман Санитария-эпидемиологик осойишталик ва жамоат саломатлиги бўлими томонидан мактабгача таълим ташкилотларида соғлом овқатланишни ташкил этиш ҳамда овқатланиш билан боғлиқ касалликларнинг олдини олиш юзасидан амалга оширилиши лозим бўлган чора-тадбирлар дастури ҳам ишлаб чиқилган бўлиб, ушбу дастур ижросини таъминлаш мақсадида тарғибот-ташвиқот ишлари ҳам йўлга қўйилган.

Айни пайтда Амударё тумани Тиббиёт бирлашмаси, Мактабгача ва мактаб таълими бўлими ҳамда Санитария-эпидемиологик осойишталик ва жамоат саломатлиги бўлимлари масъул ходимлари иштирокида ишчи гуруҳ тузилиб, давлат мактабгача таълим ташкилотлари ошхоналарида назорат ишлари олиб борилмоқда.

Мазкур жараёнда Ўзбекистон Республикаси Вазирлар Маҳкамасининг 2025 йил 6 январдаги 1-сонли Қарори асосида тузилган “Бракераж комиссияси”нинг фаолияти ўрганилиб, тарбияланувчилар учун “Ягона мавсумий таомнома” асосида овқат тайёрланиши, овқат тайёрлаш технологиясига амал қилиш ҳолати кўздан кечирилмоқда. Қолаверса, муассасага келтирилган озиқ-овқат маҳсулотларининг сифати ва уларнинг омборхоналарда санитария-гигиена қоида ва меъёрлари талаблари асосида сақланиши, ишлатиш муддатига амал қилиниши, тарбияланувчиларнинг эрталабки фильтрдан ўтказилиб қабул қилиниши, тиббий хонанинг жиҳозланиши ва тиббий ёрдам кўрсатилиши ҳамда болажонларнинг чуқур тиббий кўрикдан ўтказилиши назорат қилинмоқда.

Навбатдаги назорат тадбирлари жорий йилнинг 30 октябрь санасида Чойкўл овули ҳудудида жойлашган 16- ва 36-сонли давлат мактабгача таълим ташкилотларида ўтказилди. Вазирлар Маҳкамасининг “Давлат мактабгача таълим ташкилотларида соғлом овқатлантириш тартибини такомиллаштириш тўғрисида”ги қарори ҳамда Бош Давлат Санитария врачининг тегишли буйруғи талаблари ижросини таъминлаш мақсадида ўтказилган назорат тадбирлари давомида тарбияланувчиларнинг юқумли ва юқумли бўлмаган касалликларга чалинишининг олдини олишга қаратилган ишлар ўрганилди. Озиқ-овқат маҳсулотларининг сифатли сақланиши, маиший ускуна ва анжомларнинг санитария-гигиена талабларига мослиги кўздан кечирилиб, тайёрланаётган таомларнинг қувватлилик даражаси ўрганилди. Бундан ташқари, овқат тайёрлашда кундалик таомномада кўрсатилган маҳсулотлардан тўлиқ, самарали ва сифатли фойдаланиш меъёрларига амал қилиш ҳолати ҳам назорат қилинди.

Ўрганиш натижаларига кўра аниқланган камчиликлар жойида бартараф қилиниб, мазкур мактабгача таълим ташкилотлари раҳбарларига келгусида бу каби камчиликларга йўл қўймаслик бўйича тегишли тавсиялар берилди. Болалар ўртасида юқумли паразитар касалликларнинг олдини олиш мақсадида тарбияланувчилар соҳа мутахассислари томонидан лаборатория-инструментал усулда текширувдан ҳам ўтказилди.

Мактабгача таълим ташкилотлари тарбияланувчиларини хавфсиз ва соғлом овқатлантириш бўйича Амударё туман Тиббиёт бирлашмаси, Мактабгача ва мактаб таълими бўлими ҳамда Санитария-эпидемиологик осойишталик ва жамоат саломатлиги бўлими ходимларидан иборат ишчи гуруҳи томонидан тумандаги барча давлат мактабгача таълим ташкилотларида назорат тадбирлари давом этмоқда.

Нигора Эшимова, Амударё тумани СЭО ва ЖСБ санитария-гигиена бўлими мудираси.