“МЕН ОИЛАМНИ ПОРА ЭВАЗИГА БОҚМАЙМАН!” — ДАВЛАТ ХИЗМАТЧИЛАРИ ВА ФУҚАРОЛАРГА ТАРҒИБОТ-ТАШВИҚОТ МАТЕРИАЛЛАРИ ТАРҚАТИЛДИ

Коррупция — ўз-ўзидан пайдо бўлмайди, бу иллат қайси соҳада илдиз отишидан қатъий назар, албатта инсон омили иштирокида содир бўлади. Хусусан, иқтисодий фаолиятга ўрнатилган турли хилдаги чекловлар, айниқса, амалдорларнинг кенг, фуқаролик назоратидан холи, қўл остидаги ходимларига нисбатан чекланмаган рухсат бериш ёки тақиқлаш ваколатлари порахўрликка замин яратади.

Коррупция универсал ҳодиса бўлиб, инсон ҳаётининг барча жабҳаларида чуқур илдиз отган. У ҳуқуқий-демократик жамият қуриш, мамлакатимизга инвестицияларни жалб қилиш ва айниқса, аҳолининг камбағал қатламлари фаровонлигини ошириш борасидаги барча эзгу саъй-ҳаракатларни йўққа чиқаради. Ҳозирги кунда бу иллат ҳар қандай жамиятнинг асосий ижтимоий муаммосига айланган.

Бу каби салбий ҳолатларнинг олдини олишда ва коррупцияга қарши курашишда ваколатли давлат органлари билан оммавий ахборот воситалари вакилларининг ўзаро ҳамкорликда амалга ошираётган тарғибот-ташвиқот тадбирлари ўзининг ижобий самарасини бермоқда.

Амударё телевидениеси таҳририятининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди Қорақалпоғистон Республикаси бўлинмаси томонидан молиялаштирилган "Коррупция — давлат ва жамият тараққиётига таҳдид" номли грант лойиҳаси доирасида лойиҳа координаторлари тумандаги давлат органлари ходимлари ҳамда қишлоқ оилавий поликлиникалари шифокорлари билан учрашиб, кўргазмали тарғибот тадбири ўтказдилар.

Ушбу тарғибот тадбири Адлия бўлими ва Давлат хизматлари маркази ходимлари ҳамда қишлоқ оилавий поликлиникалари шифокорларининг коррупцияга қарши кураш бўйича фаоллигини ошириш ва улар билан эҳтимолий коррупция ва тамагирлик ҳолатларининг олдини олишга ҳисса қўшиш мақсадида ташкиллаштирилди.

Тадбирда лойиҳа координаторлари томонидан Амударё туман Адлия бўлими ва Давлат хизматлари маркази ходимларининг хизмат хоналарига, шунингдек, қишлоқ оилавий поликлиникалари шифокорларининг қабулхоналарига “Сизга хизмат қилиш менинг вазифам, илтимос, пора таклиф қилманг!”, “Мен оиламни пора эвазига боқмайман!”, “Мен коррупцияга қаршиман!” ёзувлари туширилган махсус лавҳалар жойлаштирилди.

Тадбир жараёнида лойиҳа координаторлари коррупциянинг оқибатлари ва унга миллий қонунчиликда белгиланган жазо турлари ҳақида маълумотлар бериб, давлат хизматчилари ва шифокорларни бу борада огоҳ бўлишга даъват этдилар. Шу билан бирга порахўрликка қарши кескин ва қатъий кураш олиб боришга чақирдилар.

Мазкур тарғибот-ташвиқот тадбири ҳам жамиятимизни коррупция иллатидан тозалашга қаратилган умуммиллий ҳаракат доирасида амалга оширилаётган ишларга муносиб ҳисса бўлиб қўшилиши шубҳасиз.

РОБИЯ ЙЎЛДОШЕВА.