ТОШЁПЛИКЛАР ИШОНЧИНИ ҚОЗОНГАН ИЖТИМОИЙ ХОДИМ

Амударё туманидаги Тошёп овул фуқаролар йиғинида комплекс хизмат кўрсатувчи ижтимоий ходим Мавлуда Қаландарова ўз фаолиятини бошлаганига ҳали кўп вақт бўлгани йўқ. Шундай бўлса-да, у ўз хизмат вазифасини бажариш жараёнида самимийлиги, ҳар бир ишга масъулият билан ёндашиши, қишлоқ аҳолиси ҳаётига доир муаммоларни ҳал этишдаги фидойилиги туфайли қисқа вақт ичида тошёпликларнинг ҳурмат ва эътиборини қозониб улгурди.

Чунки у илк иш куниданоқ Ижтимоий ҳимоя миллий агентлиги тизимида белгиланган 104 хилдаги ижтимоий хизмат турлари бўйича аҳолининг аризаларини қабул қилиб, ҳар бир мурожаат бўйича "Маҳалла еттилиги" аъзолари билан ўзаро ҳамкорликда ўрганишлар олиб борди. Кейс-менежмент асосидаги ўрганишлар натижасида қишлоқ фуқароларига 34 хилдаги ижтимоий хизматларга эҳтиёж борлиги аниқланди ва 2025 йил бошидан айни кунгача аҳолидан 588 та ариза қабул қилиб олинди.

Мавлуда Қаландарова аризалар билан ишлашда уларнинг маъно-мазмунидан келиб чиқиб, индивидуал ёндашув асосида муаммоларни бартараф этиш чораларини кўрди. У биринчи галда ёш болалар билан боғлиқ масалаларга эътибор қаратди.

Тиббиёт соҳаси мутахассислари иштирокида тиббий текширувлар ўтказилиб, 5 нафар таълимга тортилмаган болалардан 1 нафари кундузги парваришлашга, 2 нафар бола "Имкон" ўқув марказига, 2 нафар бола эса 10-сонли "Нурли макон" ўқув марказига таълимга қамраб олинди.

Йил бошидан бери 8 нафар ногиронлиги бўлган фуқаролар ўзларига яраша иш билан таъминланди. Яна 8 нафар ногиронлиги бўлган шахслар адаптив спорт гуруҳларига йўналтирилди ва 6 нафар ногиронлиги бўлган шахслар тиббий-ижтимоий экспертиза комиссиясининг хулосалари асосида параспортга жалб этилди. Кам таъминланган, эҳтиёжманд оилаларни қўллаб-қувватлаш мақсадида 16 нафар фуқарога кузги-қишги мавсум учун кийим-кечаклар берилди.

Мавлуда Қаландарованинг фаолиятида бу каби хайрли ишлар талайгина. У васийлик ва ҳомийликка олинган болалар бўйича мониторинг юритиш, якка-ёлғиз яшовчи фуқароларнинг ижтимоийлашувига кўмаклашиш, уларнинг ҳаётга жўшқин назар билан қарашлари учун турли кўнгилочар маданий-маърифий тадбирлар ташкил этиш, ногиронлиги бор шахсларнинг саломатликларини мустаҳкамлаш мақсадида уларни тиббий реабилитация билан қамраб олиш, кам таъминланган оилаларни қўллаб-қувватлаш чораларини кўриш каби муаммоларга ечим топиш мақсадида уйма-уй кириб бораверади.

Натижада йил бошидан бери 4 нафар ўзгалар парваришига муҳтож бўлган фуқароларга қараб туриш учун ассистентлар бириктирилди. 8 нафар ногиронлиги бўлган фуқароларга стационар шароитда даволанишлари учун кўмаклашилди. 15 нафар тазйиқ ва зўравонликка учраган аёл-қизларга зарур психологик ва ҳуқуқий ёрдамлар кўрсатилди. 171 нафар фуқарога эса коммунал тўловлари учун бир марталик моддий ёрдам ажратилиб, уларнинг бу борадаги муаммолари ижобий ҳал этилди.

Камбағаллик реестрига киритилган Тўлғоной Отажонова, Соҳиба Ўрозимбетоваларга иссиқ кийим-кечаклар олишлари учун "Саховат ва кўмак" жамғармаси ҳисобидан ваучерлар тақдим этилди. Шунингдек, Фотима Гулмонованинг мурожаати ўрганилиб, унинг 1-гуруҳ ногирони бўлган умр йўлдоши Ҳайитбой Жуманиёзовга хонага мўлжалланган махсус ўриндиқли ногиронлик аравачаси билан бир марталик моддий ёрдам кўрсатилди.

Мавлуда Қаландарованинг фидойилиги тошёплик эҳтиёжманд оилалар ҳаётида ўз аксини топмоқда. Муҳими, у қишлоқ аҳолисига комплекс ижтимоий хизмат кўрсатиш орқали уларнинг ишончини қозонмоқда. Халқ ишончига муносиб меҳнат қилиш эса нафақат элпарварлик, балки ватанпарварликдир.

РОБИЯ ЙЎЛДОШЕВА.