“Инсон” ижтимоий хизматлар маркази томонидан коучинг-семинари ўтказилди

Амударё тумани “Инсон” ижтимоий хизматлар маркази томонидан Қиличбой овул фуқаролар йиғини биносида Қиличбой ҳудудидаги фаоллар иштирокида “Инсон – инсонга ёрдамчи” мавзусида коучинг-семинари ташкил этилди. Унда Қиличбой ҳудудидаги барча овул ва маҳалла фуқаролар йиғинлари массъуллари, аҳоли вакиллари ҳамда “Инсон” ижтимоий хизматлар маркази етакчи мутахассислари, овул ва маҳаллаларда фаолият олиб борувчи комплекс хизмат кўрсатувчи ижтимоий ходимлар иштирок этдилар.

Ушбу коучинг-семинарини ўтказишдан мақсад – ижтимоий ҳимоя тизимида амалга оширилаётган ишлар ҳақида кенг жамоатчиликка маълумот бериш, фуқароларнинг ҳуқуқий билимини ошириш ҳамда муаммоларни биргаликда ҳал этишдан иборатдир.

Маълумки, сўнгги йилларда давлатимиз раҳбари ташаббуси билан мамлакатимизда аҳолини ижтимоий жиҳатдан ҳимоя қилишни янада кучайтириш, ижтимоий хизмат турларини кўпайтириш ва сифатини ошириш бўйича янги тизим яратилди. Бу янги тизим ўз навбатида маҳаллалардаги “Еттилик”нинг аҳоли муаммоларини ўрганиш ва фуқароларга комплекс хизматлар ҳамда ёрдамлар кўрсатиш имкониятларини янада кенгайтирди.

Маҳаллаларда ҳар бир йўналишга алоҳида эътибор қаратилган бўлиб, айниқса, аҳолининг ижтимоий ҳимояга муҳтож қатламини аниқлаш ҳамда уларнинг муаммоларини самарали ҳал этиш бўйича масъул ходимлар томонидан амалий ишлар йўлга қўйилди. 2024 йил апрель ойидан эътиборан маҳаллаларда ижтимоий ходим лавозими таъсис этилди. Ушбу ходимлар томонидан маҳаллалардаги 12 тоифа аҳоли қатламларига 104 турдаги ижтимоий хизматлар ва ёрдамлар кўрсатилиб келинмоқда.

Коучинг дастури давомида Амударё тумани “Инсон” ижтимоий хизматлар маркази ходимлари томонидан фаолларга тегишли тушунтиришлар берилди. Жумладан, аҳолига кўрсатиладиган ижтимоий хизматлар ва ёрдамлар, шунингдек, “Саховат ва кўмак” жамғармасидан кўрсатиладиган ёрдамлар ҳақида марказнинг маҳаллада ижтимоий хизмат ташкил этиш шўбаси мудири Бахриддин Тўрабаев батафсил тушунча ва маълумотлар берди.

Шундан сўнг, Ўзбекистон Республикаси Вазирлар Маҳкамасининг 2021 йил 21 октабрдаги “Аҳолини ижтимоий ҳимоя қилиш тизимини янада такомиллаштириш чора-тадбирлари тўғрисида”ги Қарори ижросини таъминлаш юзасидан Амударё туманида амалга оширилаётган ишлар бўйича марказнинг ижтимоий тўловлар шўбаси мудири Сирожиддин Жумабоев тадбир иштирокчиларига зарур тушунчалар тақдим этди.

Тадбир давомида Ўзбекистон Республикаси Вазирлар Маҳкамасининг 2024 йил 30 апрелдаги “Муҳтож шахсларни протез-ортопедия воситалари ва реабилитация қилишнинг техник воситалари билан таъминлаш тартиби тўғрисида”ги Қарори ва ногиронликни белгилаш тизимининг рақамлаштирилиши бўйича марказнинг ногиронлиги бўлган шахслар билан ишлаш шўъбаси мудири Муроджон Болтаевнинг маърузаси тингланди.

Бундан ташқари, қизғин савол-жавоблар билан давом этган тадбирда “Васийлик ва ҳомийлик тўғрисида”ги масала юзасидан марказнинг Болаларни ижтимоий ҳимоя қилиш шўъбаси мудири Жаҳонгир Холмуродов ҳам иштирокчиларга кенг тушунчалар бериб, уларни қизиқтирган саволлар юзасидан қимматли маълумотлар ҳам тақдим этди.

Коучинг тадбирида Ўзбекистон Республикаси Вазирлар Маҳкамасининг 2025 йил 18 июндаги “Ўзгалар парваришига муҳтож шахсларга ваучер асосида янги ижтимоий хизматлардан фойдаланиш тартибини жорий этиш чора-тадбирлари тўғрисида”ги Қарори ва ундан келиб чиқадиган вазифалар мазмун-моҳияти хусусида марказнинг катта ёшдагилар ва оғир ижтимоий вазиятга тушиб қолган оилалар билан ишлаш шўъбаси мудири Жўрабек Шерметов, Марказ психологи Юлдуз Султанова ҳамда марказнинг ҳуқуқий масалалар бўйича эксперт маслаҳатчиси Эргашали Бобожоновлар сўзга чиқиб, оғир ижтимоий вазиятга тушиб қолган шахслар ҳамда психолог ва ҳуқуқий масалалар бўйича маслаҳат ва ёрдамга муҳтож фуқароларни ижтимоий қўллаб-қувватлаш бўйича амалга оширилиши лозим бўлган вазифалар юзасидан ўз фикрларини билдирдилар.

Коучинг-семинари сўнгида фаоллар томонидан берилган саволларга марказ ходимлари томонидан тўлиқ жавоблар берилди ва мазкур тадбирда фаол қатнашган иштирокчиларга Марказ томонидан эсдалик совғалари топширилди.

Мазкур Коучинг-семинари ижтимоий ҳимоя бўйича Қиличбой ҳудудидаги овул ва маҳаллалар аҳолисининг ҳуқуқий саводхонлигини, шу билан бирга ушбу йўналишда амалга оширилаётган ишлар бўйича хабардорлигини оширишда муҳим аҳамият касб этди.