“ГИЁҲВАНДЛИК — ИЛЛАТ, УНГА ҚАРШИ КУРАШИШ ҲАР БИР ИНСОННИНГ БУРЧИ” МАВЗУСИДА СЕМИНАР ТАШКИЛ ЭТИЛДИ

Гиёҳвандлик — аср вабоси. Бу иллат инсонни нафақат ақлан ва руҳан емиради, балки вақтида аниқланиб, унга қарши кескин кураш чоралари қўлланилмаса, гиёҳвандлик одамни жисман йўқ қилади, яъни ўлимга олиб келади. Шу боис, бу иллатга қарши кураш бутун дунёда глобал тус олган ва дунё давлатлари сиёсатида устуворлик касб этган. Бу борада мамлакатимизда ҳам аҳолини гиёҳвандлик балосидан асраш, уларнинг тинчлиги ва осойишталигини таъминлашга қаратилган кенг қамровли ишлар амалга оширилмоқда. Амударё тумани Маданият бўлими биносида ўтказилган “Гиёҳвандлик — иллат, унга қарши курашиш ҳар бир инсоннинг бурчи” мавзусидаги семинар ҳам бу борадаги амалий ишларга мисолдир.

Тадбир Амударё тумани ҳокими ўринбосари Нодирбек Камолов томонидан очилди ва олиб борилди. Семинарда Амударё тумани Ички ишлар бўлими бошлиғи Темурбек Дошумбаев, туман прокурори ўринбосари Омирбай Худайбергенов ҳамда туман маҳаллаларида истиқомат қилувчи ёшлар, таълим-тарбия ва жамоат фаоллари иштирок этдилар.

Семинар аввалида масъуллар юртимизда жамоат хавфсизлигини мустаҳкамлаш ва фуқароларнинг ҳуқуқларини ҳимоя қилиш мақсадида олиб борилаётган ислоҳотларга тўхталдилар. Алоҳида таъкидланганидек, жорий йилнинг 3 ноябрь санасида Президентимиз томонидан қабул қилинган “Аҳоли саломатлиги ва миллат генофондини гиёҳвандлик ва наркожиноятлардан самарали ҳимоя қилиш бўйича комплекс чора-тадбирлар тўғрисида”ги муҳим Фармон кучга кирди. Мазкур Фармон билан гиёҳвандлик ва наркожиноятларнинг барвақт олдини олишга масъул давлат органларининг устувор вазифалари белгилаб берилган.

Фармонда таълим муассасаларида, ўқувчи ва талабалар орасида психофаол моддаларнинг тарқалишига батамом чек қўйиш, ёшларда гиёҳвандлик иллатига муросасиз муносабатни шакллантириш, ноқонуний айланмага қатъий жиноий-ҳуқуқий механизмлар орқали барҳам бериш ва жазо чораларини кескин кучайтириш, шунингдек, ёшларга нисбатан содир этиладиган наркожиноятлар учун жавобгарликни оғирлаштириш кўзда тутилган.

Семинарда сўзга чиққан Амударё тумани прокурорининг ўринбосари Омирбай Худайбергенов туманда жиноятчиликнинг барвақт олдини олиш мақсадида амалга оширилаётган чора-тадбирларга эътибор қаратди. Унинг таъкидлашича, жорий йилнинг ўтган 10 ойи давомида гиёҳвандлик воситалари билан боғлиқ 2 та ҳолат аниқланиб, жиноят иши қўзғатилган.

Туман Ички ишлар бўлими бошлиғи Темурбек Дошумбаев эса гиёҳвандлик ва наркожиноятларга қарши курашиш бўйича 2024-2028 йилларга мўлжалланган миллий стратегия ижроси юзасидан ИИБ томонидан амалга оширилган ишлар ва тезкор тадбирлар натижалари ҳақида маълумотлар тақдим этди.

Таъкидланганидек, 2025 йил 29 ноябрь куни олиб борилган “Тун” тезкор-тадбири давомида туман маҳаллаларидан бирида яшовчи фуқаронинг уйининг қозонхонасидан “марихуана” гиёҳвандлик моддаси ва уруғлари, шунингдек, ҳеч қандай ҳужжати бўлмаган 1 дона пневматик қурол ҳамда 13 дона 12 калибрли ов қуроллари аниқланиб, ҳужжатлаштирилган.

Яна бир фуқаронинг гиёҳванд модда истеъмол қилиб юрганлиги ҳақидаги мурожаат бўйича тезкор тадбир ўтказилиб, ушбу шахс тиббий экспертиза хулосаларига кўра Ўзбекистон Республикаси Жиноят кодексининг тегишли моддалари асосида жиноий жавобгарликка тортилган.

Семинар давомида таълим-тарбия соҳаси ва жамоат фаоллари ҳамда ёшлар гиёҳвандликка қарши курашиш нафақат ҳуқуқни муҳофаза қилиш органлари ходимлари, балки ҳар бир фуқаронинг зиммасидаги бурчи эканлиги хусусида ўз фикр-мулоҳазаларини билдирдилар.

Семинар якунида иштирокчилар учун туман Маданият бўлими санъаткорлари томонидан тайёрланган концерт дастури намойиш этилди.