БЎЗЁПЛИКЛАРГА ЯХШИЛИК УЛАШАЁТГАН ИЖТИМОИЙ ХОДИМ

Амударё туманининг Бўзёп овулида 1071 та хонадонни қамраб олган 1707 та оилада салкам 5800 нафарга яқин турли миллатга мансуб аҳоли истиқомат қилади. Бўзёпликлар учун бир-бирининг муаммоларига елка тутиш ва ўзаро ёрдам кўрсатиш азалий қадрият ҳисобланади. Айнан мана шундай ҳамжиҳатлик муҳити туфайли комплекс ижтимоий хизмат кўрсатувчи ходим сифатида ўз фаолиятини бошлаган Шодурди Шаманов овул аҳолиси билан қисқа вақт ичида яқин муносабат ўрнатди ва самарали фаолият олиб бормоқда.

Унинг овул фуқаролар йиғини “Маҳалла еттилиги” аъзолари билан ҳамкорликдаги саъй-ҳаракатлари натижасида 12 тоифадаги фуқароларнинг рўйхати шакллантирилиб, уларга 100 дан ортиқ ижтимоий хизмат кўрсатиш йўлга қўйилди.

Ижтимоий ходим энг аввало овулдаги ўзгалар парваришига муҳтож, ёлғиз кексалар ва ногиронлиги бўлган шахслар тоифаси бўйича рўйхатга олинган фуқароларни ижтимоий қўллаб-қувватлаш чораларини кўрди. Айнан шу тоифадаги 6 нафар фуқаронинг уйларига бориб ўрганилгач, уларга ассистент бириктирилиб, намунали ижтимоий хизмат кўрсатиш йўлга қўйилди.

Унинг ташаббуси билан овул ҳудудидаги 124 нафар ногиронлиги бўлган шахслар ва болаларга ижтимоий ҳимоя чоралари қўлланилиб, уларга маълум маънода ҳаётга жўшқин назар билан қарашларига имкон берувчи ижтимоий хизмат ва ёрдамлар кўрсатиб келинмоқда. Хусусан, жорий йилнинг ўтган даври мобайнида 12 нафар ногиронлиги бўлган шахсга протез-ортопедия мосламалари ва реабилитация техник воситалари олиб берилди. 13 нафар ногиронлиги бўлган шахслар ўз имкониятларига яраша барқарор даромадли иш билан таъминландилар. 4 нафар ногиронлиги бўлган шахсга “Саховат ва кўмак” жамғармаси ҳисобидан даволаниб, саломатлигини тиклашлари учун ёрдам кўрсатилди. 3 нафар фуқаро эса адаптив спортга жалб этилди.

Ота-оналари чет давлатларда, меҳнат муҳожирлигида бўлган ва яқин қариндошлари томонидан васийлик ва ҳомийликка олинган 2 нафар болани парваришлаётган оила ва уларнинг таълим-тарбияси ижтимоий ходим томонидан доимий назоратга олинган.

Овулдаги кам таъминланганлар тоифасига киритилган 78 та оила доимий эътиборда. Мазкур оилаларнинг барчасига моддий ёрдам ва болалар нафақаси тайинланган. Камбағаллик реестрига киритилган 50 та оилани эса камбағалликдан чиқариш борасида овулда фаолият олиб борувчи ҳоким ёрдамчиси билан ҳамкорликда зарур чоралар кўрилмоқда.

Ижтимоий ходимнинг самарали фаолияти натижасида 139 та эҳтиёжманд оилаларга куз-қиш мавсуми учун бир марталик моддий ёрдам ажратилди. 9 та кам таъминланган оиланинг фарзандлари мактабгача таълим ташкилотларига имтиёзли равишда жойлаштирилди.

Шодурди Шамановнинг иш фаолиятида тазйиқ ва зўравонликка учраган аёл-қизларни қўллаб-қувватлаш масаласи ҳам муҳим ўрин тутади. Жорий йил давомида тазйиқ ва зўравонлик ҳолатлари туфайли 4 нафар аёл-қизга ҳимоя ордерлари расмийлаштирилиб, уларнинг хавфсизлиги таъминланди. Белгиланган тартиб-қоида асосида сўровнома ўтказилиб, уларга ҳуқуқий ва психологик ёрдамлар кўрсатилди.

Бугунги кунда ўз хизмат фаолияти билан бўзёпликларнинг энг яқин ва ишончли давлат хизматчисига айланган Шодурди Шамановнинг ҳар бир иш куни унга ишонган ҳамқишлоқлари ҳаётига доир муаммоларни ҳал этиш, уларнинг ижтимоийлашувига кўмаклашиш, қалбларида ҳаётсеварлик туйғуларини уйғотиш, яхшилик улашишга қаратилган хайрли тадбирлар билан ўтади. Зеро, инсонларга яхшилик улашиш зулматга нур бағишлаш билан баробардир.

РОБИЯ ЙЎЛДОШЕВА.