Ичимлик суви таъминотидаги ишлар ҳолати ўрганилди

Маълумки, ҳар қандай жамиятнинг фаровонлиги ва иқтисодий барқарорлиги энг аввало, унинг коммунал инфратузилмаси қанчалик мустаҳкам эканлиги билан ўлчанади. Айниқса, табиат инжиқликлари кузатиладиган куз ва қиш мавсумида аҳоли хонадонлари, ижтимоий соҳа объектлари ва иқтисодиёт тармоқларининг узлуксиз ишлашини таъминлаш давлат сиёсатининг устувор йўналиши ҳисобланади. Бу борада Хўжайли туманида амалга оширилаётган тизимли ишлар аҳолининг ҳаёт сифатини оширишга хизмат қилмоқда.

Жорий йилда куз-қиш мавсумига тайёргарлик ишлари ҳар йилгидан-да жиддий ва комплекс ёндашув асосида ташкил этилди. Бунинг ҳуқуқий асоси сифатида 2025 йил 2 июль куни Ўзбекистон Республикаси Вазирлар Маҳкамаси томонидан қабул қилинган “Иқтисодиёт тармоқларини, ижтимоий ва энергетика объектлари ва кўп квартирали уй-жой фондидан 2025/2026 йиллар куз-қиш мавсумида барқарор ишлашга тайёрлашни таъминлаш чора-тадбирлари тўғрисида”ги 453-сонли қарорини келтириш мумкин. Мазкур стратегик ҳужжат нафақат муаммоларни бартараф этиш, балки тизимни модернизация қилиш бўйича аниқ йўл харитасини белгилаб берди.

Ушбу қарор ижросини таъминлаш мақсадида Қорақалпоғистон Республикаси бўйлаб кенг кўламли қурилиш-таъмирлаш ишлари бошлаб юборилган. Хусусан, республика миқёсида жами 45,2 км ичимлик суви тармоқларини янгилаш ҳамда 95 та насос агрегатларини техник созлаш вазифаси қўйилган. Бу борада Хўжайли туманида белгиланган режалар ҳам салмоқлидир. Туманда аҳолини тоза ичимлик суви билан таъминлаш сифатини ошириш мақсадида 250 метр узунликдаги эскирган сув қувурлари тўлиқ алмаштирилиб, мукаммал таъмирланди. Бундан ташқари, 3,5 км узунликдаги тармоқларда жорий таъмирлаш ишлари амалга оширилмоқда.

Сув таъминотида асосий юкламани кўтарадиган қурилмалар — бу насос агрегатларидир. Туманда 2 та йирик насос агрегатини мукаммал таъмирлаш ва 4 тасини мавсумий созлаш ишлари режалаштирилган бўлиб, бу тизимдаги босимнинг барқарорлигини таъминлашга хизмат қилади.

Мазкур вазифаларнинг ижросини назорат қилиш мақсадида Қорақалпоғистон Республикаси Қурилиш ва уй-жой коммунал хўжалиги соҳасида назорат қилиш ҳудудий инспекцияси ҳамда “Қорақалпоқ сув таъминоти” акциадорлик жамияти туман филиали мутахассислари ҳамкорлигида “Хўжайли” сув олиш иншоотида махсус мониторинг ўтказилди. Ўрганишлар давомида аниқландики, туман ҳудудида 250 метрлик тармоқнинг мукаммал таъмирланиши натижасида маҳаллалардаги сув босими меъёрига келган ва аҳолининг сув таъминотидаги узилишлар сезиларли даражада қисқарган.

Инспекция ходимлари нафақат қурилиш сифатини, балки сувнинг санитария-гигиена талабларига жавоб беришини ҳам чуқур таҳлил қилдилар. Ичимлик суви — стратегик ресурс. Шу боис, тармоқларда сувнинг ифлосланишига йўл қўймаслик, хлорлаш ва зарарсизлантириш жараёнларининг стандартларга мослиги қатъий назоратга олинди. Шунингдек, мутахассислар объектда энергия тежамкор технологияларнинг қўлланилишига алоҳида эътибор қаратишди. Замонавий насосларнинг ўрнатилиши электр энергияси сарфини камайтириш билан бирга, экологик барқарорликка ҳам ҳисса қўшади.

Таъкидлаш жоизки, тоза ичимлик суви — миллат генофонди ва аҳоли саломатлигининг гаровидир. Сифатли сув таъминоти турли юқумли касалликларнинг олдини олишда энг самарали восита ҳисобланади. Айниқса, ўсиб келаётган ёш авлоднинг жисмонан соғлом ривожланишида унинг ўрни беқиёс. Бундан ташқари, хонадонда сувнинг узлуксиз келиши оилаларнинг маиший турмуш маданиятини юксалтиради, аёлларнинг оғирини енгил қилади.

Хулоса ўрнида айтганда, Хўжайли туманида куз-қиш мавсумига тайёргарлик доирасида амалга оширилаётган бундай хайрли ишлар "Инсон қадри учун" тамойилининг амалдаги ёрқин ифодасидир. Ичимлик суви тизимининг барқарор ишлаши қишнинг совуқ кунларида аҳолига хотиржамлик ва фаровонлик бағишлаши шубҳасиз.