"ОҚ ОЛТИН" ОВУЛИДА ЎТКАЗИЛГАН САЙЁР ҚАБУЛДА АҲОЛИ МУАММОЛАРИ ТИНГЛАНДИ
Бугунги кунда "Халқ давлат идораларига эмас, балки давлат идоралари халқимизга хизмат қилиши керак" деган эзгу тамойил ҳаётимизнинг асосий қоидасига айланди. Раҳбарларнинг иш хоналаридан чиқиб, энг чекка ҳудудларга бориши, одамларнинг дардини эшитиши ва муаммоларига жойида ечим топиши — бошқарув тизимидаги ислоҳотларнинг амалий натижасидир. Амударё тумани ҳокими Собир Хўжаметовнинг "Оқ олтин" овулида ўтказган навбатдаги сайёр қабули ҳам ана шундай очиқ мулоқот руҳида бўлиб ўтди.
Овул ҳудудидаги 7-сонли умумтаълим мактаби биносида ташкил этилган ушбу учрашувда туман сектор раҳбарлари, Ўзбекистон Маҳаллалар уюшмаси Амударё тумани бўлими бошлиғи Алишер Йўлдашев, тегишли корхона ва ташкилотлар мутасаддилари ҳамда кенг жамоатчилик вакиллари иштирок этди. Мақсад битта — "Оқ олтин" овули аҳолисини қийнаётган масалаларни ўрганиш ва уларни бартараф этиш чораларини кўриш.
Сайёр қабул давомида фуқаролар томонидан кўтарилган масалалар ҳудуднинг бугунги кундаги реал манзарасини ва эҳтиёжларини намоён этди. Хусусан, аҳоли вакиллари томонидан энг кўп мурожаат қилинган мавзулардан бири — бу инфратузилма масаласи бўлди. Овул ичидаги йўлларнинг таъмирталаблиги ва ички каналлар устидаги кўприкларнинг эскиргани аҳоли ҳаракатланишида қийинчиликлар туғдираётгани айтиб ўтилди. Таъкидлаш жоизки, қишлоқ жойларда йўл ва кўприк — бу фақат транспорт қатнови эмас, балки аҳоли фаровонлиги, болаларнинг мактабга, беморларнинг шифохонага вақтида етиб бориши демакдир. Шу боис, ушбу масала ҳокимлик томонидан устувор вазифа сифатида қайд этилди.
Шунингдек, учрашувда ижтимоий соҳага оид муҳим таклифлар ҳам илгари сурилди. "Оқ олтин" овулида демографик ўсиш кузатилаётгани сабабли, янги мактабгача таълим ташкилоти қуришга бўлган эҳтиёж кун тартибига чиқмоқда. Ёш оналар ва овул фаоллари болаларни мактабга тайёрлаш ва уларга сифатли таълим-тарбия беришда замонавий боғчанинг ўрни беқиёс эканлигини таъкидлаб, бу борада амалий ёрдам сўрадилар.
Куз-қиш мавсуми давом этаётган айни пайтда энергия ресурслари таъминоти ҳам четда қолмади. Аҳоли томонидан кўмир маҳсулотларига бўлган талабнинг юқорилиги ва таъминотдаги айрим узилишлар бўйича мурожаатлар билдирилди. Бу масала бевосита хонадонлардаги иссиқлик ва аҳоли саломатлиги билан боғлиқ бўлгани учун мутасаддиларга тезкор топшириқлар берилди.
Сайёр қабулнинг яна бир долзарб мавзуси — аҳоли бандлиги бўлди. Ишсиз фуқароларни доимий даромад манбаи билан таъминлаш, уларни касб-ҳунарга йўналтириш ва тадбиркорликка жалб қилиш масалалари атрофлича муҳокама қилинди. Туман ҳокими ҳар бир ишсиз фуқаро билан "маҳаллабай" ишлаш, уларга мавжуд бўш иш ўринларини таклиф этиш ва ўзини-ўзи банд қилиш учун шароит яратиш лозимлигини таъкидлади.
Қабул давомида кўтарилган ҳар бир мурожаат Собир Хўжаметов томонидан диққат билан тингланди. Айрим муаммолар масалан, кўмир таъминоти ёки кичик таъмирлаш ишлари бўйича шу жойнинг ўзида масъулларга аниқ кўрсатмалар берилиб, ижроси назоратга олинди. Катта маблағ ва вақт талаб қиладиган, яъни боғча қурилиши, йўлларни асфальтлаш каби масалалар юзасидан эса аниқ муддатли "Йўл харитаси" ишлаб чиқиш ва тегишли дастурларга киритиш бўйича қарор қабул қилинди.
Хулоса ўрнида айтганда, "Оқ олтин"да ўтган мазкур учрашув раҳбар ва халқ ўртасидаги ишонч кўпригини мустаҳкамлашга хизмат қилди. Аҳоли ўз муаммолари эътиборсиз қолмаслигига, туман раҳбарияти уларнинг фаровонлиги йўлида қайғураётганига яна бир бор амин бўлди. Зеро, халқ розилиги — энг олий мақсаддир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
