СОЛИҚ ТИЗИМИДАГИ ШАФФОФЛИК — АҲОЛИ ФАРОВОНЛИГИНИНГ АСОСИ
Замонавий дунёда ривожланган давлатларнинг тараққиёт омиллари солиқ сиёсати билан боғлиқ. Энг муҳим соҳаларни, халқ турмуш тарзи билан боғлиқ йўналишларни молиялаштириш бевосита солиқ тизими орқали амалга оширилади. Амударё тумани Солиқ инспекцияси ходимлари ҳам бу борада самарали фаолият олиб боришмоқда. Инспекцияга 2025 йил учун бюджет тушумларига 51,6 млрд сўм ундириш режаси белгиланган бўлиб, 2025 йилнинг 1 декабрь ҳолатига 53,6 млрд сўм бюджетга ундирилди ва бу борадаги режа 11 ойдаёқ 103,8 фоизга бажарилди.
Президентимиз ташаббуси билан маҳаллани жойларда муаммоларни ҳал қиладиган институтга айлантириш мақсадида биргаликда ишлайдиган “Маҳалла еттилиги” фаолиятини йўлга қўйиш бўйича берилган топшириқ ва вазифалар ижросини таъминлаш мақсадида, Амударё тумани бўйича 49 та маҳаллага 15 нафар солиқ ходимлари бириктирилган.
Маҳаллабай ишлаш тизими орқали биргина 2025 йилнинг январь-июнь ойларида 714 та тадбиркорлик субъектларида товар айланмаси 12,5 млрд сўмга оширилиши ҳисобига бюджетга қўшимча 1,1 млрд сўм айланмадан олинадиган солиқ ҳисобланди. 843 та тадбиркорлик субъектларида 1 минг 721 та норасмий ишчи қонунийлаштирилди ҳамда бюджетга қўшимча 302 млн сўм даромад солиғи ҳисобланишига эришилди.
Солиқ инспекцияси ходимлари ва “Маҳалла еттилиги” аъзоларининг ўзаро ҳамкорликда олиб борган хатлов натижаларига кўра, ноқонуний фаолият юритаётган 512 нафар тадбиркор янгидан рўйхатдан ўтказилди. “Маҳалла еттилиги” билан биргаликда 13 минг 223 нафар фуқаро ўзини-ўзи банд қилиш тамойили асосида доимий даромад манбаига эга бўлишлари учун шароитлар яратилди.
Ўтган йил бошидан аҳолини кичик бизнесга жалб этиш ва уларнинг бандлигини таъминлаш бўйича амалга оширилган тадбирлар давомида рўйхатдан ўтмасдан фаолият кўрсатаётган фуқароларни аниқлаш ҳисобига 61 нафар юридик шахс, 451 нафар якка тадбиркор, 13 минг 223 нафар ўзини-ўзи банд қилганлар ва 22 та деҳқон хўжаликлари рўйхатга олиниб, фаолиятини вақтинча тўхтатган 269 нафар якка тадбиркорларнинг фаолияти тикланиши таъминланди. Шунингдек, саноат ва ишлаб чиқариш корхоналарини хатловдан ўтказиш давомида қўшимча равишда 85 нафар ишчи фаолият олиб бораётгани аниқланиб, қайта ҳисоботлар қабул қилинди.
Амударё тумани Солиқ инспекцияси ходимлари томонидан амалга оширилаётган бу каби чора-тадбирлар аҳоли фаровонлигини таъминлаш, иқтисодиётни янада ривожлантириш, халқимиз саломатлигини мустаҳкамлаш, ўсиб келаётган ёш авлод таълим-тарбияси билан боғлиқ кенг кўламли бунёдкорлик йўналишларидаги ишларни молиялаштиришда шаффофликни таъминлаш имконини бермоқда.
Туман Солиқ инспекцияси жамоаси 2025 йилга белгиланган барча режа-кўрсаткичларни ортиғи билан бажариб, 2026 йилда ҳам солиқ тўловчиларга сифатли хизматлар кўрсатиш, маҳаллий, Республика ва мамлакат бюджетини тўлдиришга муносиб ҳисса қўшишни мақсад қилишган. Зеро, солиқлар – мамлакат иқтисодиётининг таянчи, давлат бюджети барқарорлигини таъминловчи, ижтимоий соҳалар ривожи ҳамда инфратузилмани яхшилашга хизмат қиладиган муҳим молиявий манбадир. Уларнинг ўз вақтида ва адолатли ундирилиши эса иқтисодий тараққиёт, аҳоли фаровонлиги ҳамда жамиятда ижтимоий адолатни қарор топтиришда ҳал қилувчи аҳамият касб этади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
