Ҳарбийликдан муаллимликка: бўлажак Ватан ҳимоячиларининг устози
Ватан ҳимоячиси бўлиш — шарафли бурч. Ёш авлодни шу руҳда тарбиялаш эса икки карра масъулият талаб этади. Бугунги кунда Ихтисослаштирилган таълим муассасалари агентлиги тизимидаги Амударё туман ихтисослаштирилган мактабида фаолият юритаётган захирадаги офицер Давронбек Давлетмуротов ана шундай юксак масъулиятни ўз зиммасига олган фидойи устозлардан биридир. У ҳарбий хизматда орттирган бой тажрибасини таълим соҳасига татбиқ этиб, ёшларда ватанпарварлик, интизом ва жасорат фазилатларини шакллантириб келмоқда.
Давронбек Давлетмуротовнинг ҳаёт йўли ҳарбий интизом ва ватанга садоқат муҳитида кечган. У 2004 йилда Тошкент олий умумқўшин қўмондонлик билим юртини муваффақиятли тамомлаб, “Мотоўқчи қўшинлар тактик қўмондонлиги” мутахассислигини эгаллаган. Шундан сўнг Ўзбекистон Қуролли Кучлари сафларида турли масъулиятли лавозимларда хизмат қилди.
Жумладан, 2004–2007 йилларда ҳарбий қисмлардан бирида маълумотларни қайта ишлаш йўналиши бошлиғи, 2006–2007 йилларда 530-сафарбарлик чақирув резерви батальонида взвод командири сифатида фаолият юритди. 2007–2021 йиллар давомида эса бир қатор ҳарбий қисмларда кадрлар ва саф бўлинмаси бошлиғи лавозимларида хизмат қилиб, шахсий таркиб билан ишлаш, ҳарбий интизомни мустаҳкамлаш борасида катта тажриба орттирди.
2021 йилдан бошлаб Давронбек Давлетмуротов ўз фаолиятини таълим соҳасига бағишлади. Аввалига Амударё туманидаги 51-сонли мактабда иш бошлаган мутахассис 2023 йилдан буён Амударё туман ихтисослаштирилган мактабида фаолият юритмоқда. 2023–2025 йилларда у мактабда ёшларни ватанпарварлик руҳида тайёрлаш бўйича директор ўринбосари — Ҳарбий чақириққача тайёргарлик раҳбари сифатида самарали меҳнат қилди. 2025 йилдан эса чақириққа қадар бошланғич тайёргарлик раҳбари лавозимида фаолиятини давом эттирмоқда.
Устознинг талабчанлиги ва масъулиятли ёндашуви қисқа вақт ичида ўз самарасини берди. Унинг шогирди, 2023 йилда 9-синфда ўқиган Шерали Қурбонбоев Фарғона шаҳридаги “Темурбеклар мактаби”га ўқишга кириб, 2025 йилда мазкур таълим муассасасини муваффақиятли тамомлади. Айни пайтда у Ўзбекистон Республикаси Жамоат хавфсизлиги университети Чегара қўшинлари факультетининг 1-босқичида таҳсил олмоқда. Бу — устоз ва шогирднинг биргаликдаги меҳнати самарасидир.
Шунингдек, 2025 йилда мактабнинг 10-синф ўқувчиларидан ташкил топган жамоа Президент мактаблари ва ихтисослаштирилган мактаблар ўртасида ўтказилган “Турон йўлбарслари” ҳарбий-спорт мусобақасида фахрли 3-ўринни қўлга киритди.
Давронбек Давлетмуротов нафақат намунали офицер ва устоз, балки меҳрибон ота ҳамдир. У турмуш ўртоғи Зулхумор Артиқбоева билан биргаликда тўрт нафар фарзандни ватанга садоқатли, комил инсонлар этиб тарбияламоқда.
Ихтисослаштирилган мактабларда чақириққа қадар бошланғич тайёргарлик раҳбари ҳамда ёшларни ватанпарварлик руҳида тайёрлаш бўйича масъул шахс сифатида у ўқувчиларда Ватанга муҳаббат ва фуқаролик бурчини англаш туйғуларини шакллантириш, ҳарбий-спорт мусобақаларига тайёрлаш, ҳарбий касбга йўналтириш, туман Мудофаа ишлари бўлими ва ҳарбий қисмлар билан ҳамкорликда қатор тадбирларни ташкил этиш ишларини амалга оширмоқда.
Давронбек Давлетмуротовнинг фаолияти яна бир бор шуни тасдиқлайдики, ҳақиқий ватанпарварлик — бу шунчаки шиор эмас, балки тинимсиз меҳнат, юксак интизом ва ёшлар қалбига эзгу ғояларни сингдиришдир. Ана шу вазифани шараф билан ўтаётган лавҳамиз қаҳрамони ва юртимиздаги барча ҳарбийларни 14 январь – Ватан ҳимоячилари куни ва Ўзбекистон Республикаси Қуролли кучлари ташкил қилинганининг 34 йиллиги билан чин қалбимиздан табриклаб, уларнинг ишларига омад ва зафарлар, оилаларига эса тинчлик-хотиржамлик тилаб қоламиз!
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
