«Экологик маданият – соғлом келажак асоси» лойиҳаси доирасида Қипчоқ давлат ўрмон хўжалиги маъмурий биносида тадбир ўтказилди

Бугунги кунда атроф-муҳит муҳофазаси ва экологик барқарорликни таъминлаш глобал аҳамиятга эга масалалардан бирига айланди. Амударё туманида фаолият юритаётган “Жайхун илҳомлари” нодавлат нотижорат ташкилотининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Экологик маданият – соғлом келажак асоси” номли грант лойиҳаси ҳам ушбу долзарб масалага қаратилгани билан аҳамиятлидир. Мазкур ижтимоий аҳамиятга эга лойиҳанинг асосий мазмун-моҳияти аҳолининг экологик онги ва маданиятини юксалтириш ҳамда ушбу соҳада амалга оширилаётган ишларни кенг жамоатчилик ўртасида тарғиб қилишдан иборатдир.

Лойиҳа доирасида экология ва атроф-муҳитни муҳофаза қилиш, табиий ресурслардан оқилона фойдаланишга доир қонун ҳужжатларининг мазмунини аҳолининг кенг қатламига етказиш бош мақсад қилиб олинган. Хусусан, туман ҳудудларида яшил маконларни кенгайтириш, дарахтларни асраш ва санитария ҳолатини яхшилаш орқали аҳоли саломатлиги учун қулай муҳит яратишга ҳисса қўшиш кўзда тутилган.

Лойиҳа доирасида яқинда “Жайхун илҳомлари” нодавлат нотижорат ташкилоти ва “Амударё ТВ” телеканали таҳририяти ҳамкорлигида Қипчоқ давлат ўрмон хўжалигининг маъмурий биносида тадбир ўтказилди.

Тадбирнинг асосий мавзуси ўрмон ва тўқайзорларни асраш, ҳудуддаги дарахтларни ноқонуний кесиш ҳолатларининг олдини олишга қаратилди. Йиғилишда туманнинг Қипчоқ ҳудудидаги овул ва маҳаллаларнинг санитария ҳолати, экологик вазиятни яхшилаш борасидаги муаммолар ва уларнинг ечимлари ҳам таҳлил қилинди.

Йиғилишда сўзга чиққан лойиҳа координаторлари Робия Йўлдошева, Маҳмуджон Шомуродов, Мансур Тожибоев ва бошқалар экологик муаммоларнинг оқибатлари, табиатни асрашдаги ҳар бир фуқаронинг шахсий масъулияти ҳақида кенг турда тўхталдилар.

Таъкидланганидек, ўрмонлар – табиатнинг ўпкаси бўлиб, улар нафақат ҳаво мусаффолигини таъминлайди, балки тупроқ эрозиясининг олдини олиш, ер ости сувларини сақлаш ва биохилма-хилликни асрашда муҳим омил ҳисобланади. Шу боис, Қипчоқ давлат ўрмон хўжалиги тасарруфидаги майдонларда назоратни кучайтириш масаласи кун тартибининг бош мавзусига айланди. Афсуски, ҳали-ҳануз табиатга вахшийларча муносабатда бўлиш, дарахтларни ноқонуний кесиш орқали мўмай даромад орттиришга уриниш ҳолатлари учраб турибди. Йиғилишда бундай салбий ҳолатларга қарши курашишда нафақат ўрмон хўжалиги инспекторлари, балки кенг жамоатчилик, маҳалла фаоллари ва ҳуқуқ-тартибот органлари билан ҳамкорликни янги босқичга олиб чиқиш зарурлиги қайд қилинди.

Шунингдек, муҳокамалар давомида туманнинг аҳоли яшаш пунктлари – овул ва маҳаллалардаги экологик вазиятга ҳам алоҳида эътибор қаратилди. Ҳудудлардаги санитария ҳолатини яхшилаш, чиқиндиларни белгиланмаган жойларга ташлашнинг олдини олиш ва аҳоли орасида экологик маданиятни юксалтириш борасидаги ишлар таҳлил қилинди. Ҳар мавсумда "Яшил макон" умуммиллий лойиҳаси доирасида маҳаллаларда манзарали ва мевали дарахт кўчатларини экиш, яшил ҳудудларни кенгайтириш ишларини жадаллаштириш лозимлиги қайд этилди. Зеро, тоза ва озода маҳалла, яшилликка бурканган кўчалар – аҳоли саломатлиги ва фаровонлигининг асосидир.

Йиғилишдан кейин Қипчоқ давлат ўрмон хўжалигида амалга оширилаётган ишлар кўздан кечирилди. Хўжалик масъуллари таъкидлаганларидек, улар зиммасидаги вазифа фақатгина мавжуд дарахтларни қўриқлаш билан чекланиб қолмайди. Ўрмон хўжалиги масъулларининг бош вазифаси – табиат ва жамият ўртасидаги уйғунликни таъминлаш, ўрмон фонди ерларидан оқилона фойдаланиш, йўқолиб кетиш хавфи остида турган ўсимлик турларини қайта тиклаш ва кўпайтириш ҳамда мевали ва манзарали дарахт кўчатлари ниҳолларини кўпайтириб, ҳудуднинг яшиллигига ҳисса қўшишдан иборатдир. Хўжалик масъуллари журналистларга бу борада амалга оширилаётган кенг кўламли амалий ишлар ҳақида батафсил маълумотлар берди.

Қипчоқ давлат ўрмон хўжалигида бўлиб ўтган ушбу тадбир табиатимизни асраш йўлидаги саъй-ҳаракатларни бирлаштириш ҳамда келажак авлодга обод ва фаровон Ватан қолдириш йўлидаги муҳим амалий қадам бўлди.