“Турон йўлбарслари” ҳарбий-спорт мусобақасининг Республика босқичи ўтказилди

Қорақалпоғистон Республикасида Ихтисослаштирилган таълим муассасалари агентлиги тизимида фаолият юритувчи президент, ижод ва ихтисослаштирилган мактаблар ўқувчилари ўртасида анъанавий тарзда ўтказиб келинаётган “Турон йўлбарслари” ҳарбий-спорт мусобақасининг Республика босқичи бўлиб ўтди. Мазкур тадбир ёшлар орасида ватанпарварлик туйғусини мустаҳкамлаш, ҳарбий-амалий кўникмаларни шакллантириш ва соғлом турмуш тарзини кенг тарғиб этишга қаратилгани билан аҳамиятлидир. Бу мусобақа нафақат жисмоний қувват, балки билим, интизом, тезкор фикрлаш ҳамда жамоавий ҳамжиҳатликни намоён этиш майдони сифатида ёш авлоднинг руҳий ва амалий тайёргарлигига кенг имконият яратади.

Республика босқичида ҳудудлардан саралаб олинган жами 21 та жамоа ўзаро куч синашди. Беллашувларга тайёргарлик жараёнида иштирокчи ўқувчилар ўз билим ва маҳоратини оширишга, жамоа руҳини мустаҳкамлашга ҳамда масъулиятни ҳис этиб ҳаракат қилишга алоҳида эътибор қаратгани мусобақа жараёнида яққол сезилди. Шартлар бир қарашда спортга оиддек туюлса-да, аслида ҳар бири ўқувчининг фикрлаш даражаси, иродаси, жасорати ва турли вазиятларда тўғри қарор қабул қилиш қобилиятини синашга хизмат қилди.

Мусобақанинг энг қизиқарли шартларидан бири — “Темур тузуклари” билимдони” шарти бўлди. Ушбу шарт орқали иштирокчиларнинг тарихий билимлари, миллий меросни англаш даражаси ҳамда мантиқий тафаккури баҳоланди. Бугунги глобал ахборот майдонида ёшларнинг ўз тарихи, буюк аждодлар мероси ва давлатчилик анъаналари ҳақида чуқур тасаввурга эга бўлиши муҳим аҳамиятга эга. Шу маънода, “Темур тузуклари” ёшларнинг фақат жисмоний эмас, маънавий-ахлоқий таянчларини ҳам мустаҳкамлашга қаратилган ўта долзарб шарт сифатида эътироф этилди.

Беллашувлар давомида ҳарбий-амалий йўналишдаги топшириқлар айниқса масъулият талаб қилгани билан ажралиб турди. Камондан ўқ отиш ва спорт қуролидан нишонга аниқ зарба бериш шартларида иштирокчиларнинг диққат-эътибори, ҳаяжонни бошқара олиши, тана мувозанати ва ўзига ишончи муҳим аҳамият касб этди. Бу каби машғулотлар ёшларда аниқлик, сабр-тоқат ҳамда мақсадга интилиш фазилатларини тарбиялайди.

Шундан кейинги шарт — қуролни тўлиқ бўлмаган қисмларга ажратиш ва қайта йиғиш — техник маҳорат, чаққонлик ва тезкорликни талаб этди. Ҳар бир жамоа аъзоси ўз вазифасини аниқ англаб, вақт билан ҳисоблашган ҳолда иш кўриши лозим бўлди. Бу эса, ўз навбатида, интизом ва жамоа ичидаги мувофиқлашувни кучайтирди.

Мусобақанинг яна бир муҳим ва ҳаётий аҳамиятга эга шарти — биринчи тиббий ёрдам кўрсатиш бўлди. Фавқулодда вазиятларда тўғри ва тезкор ҳаракат қилиш, зарур пайтда бир инсон ҳаётини сақлаб қолишга хизмат қилувчи амалий билимлар ҳар қандай фуқаро учун жуда муҳим саналади. Ушбу шартда иштирокчиларнинг фавқулодда ҳолатга муносабати, тез фикрлаши, ҳолатни баҳолай олиши ва амалий кўникмалари синовдан ўтказилди. Мазкур йўналишдаги тажриба нафақат ҳарбий-спорт мусобақаларида, балки ҳаётнинг ўзида ҳам ёшларга кўп маротаба асқотиши шубҳасиз.

Беллашувлар жараёнида жамоалар ўзaro ҳамжиҳатлик, ўзаро ёрдам, интизом ва юксак масъулият намунасини кўрсатдилар. Шартлар доирасидаги ҳар бир ҳаракат ҳакамлар ҳайъати томонидан адолатли ва шаффоф мезонлар асосида баҳолаб борилди.

Қизғин, мукаммал тайёргарлик ва ирода талаб қилган баҳслар охирида энг кучли жамоалар аниқланди. Якуний натижаларга кўра, 1-ўринни Нукус шаҳридаги Ибрайим Юсупов номидаги ижод мактабининг “Лочинлар” жамоаси қўлга киритди. 2-ўрин Қораўзак тумани ихтисослаштирилган мактабининг “Тербенбес” жамоасига насиб этди. 3-ўрин эса Нукус шаҳридаги 1-сонли ихтисослаштирилган мактаб-интернатининг “Жайхун” жамоасига берилди. Ғолибликни қўлга киритган “Лочинлар” жамоаси мусобақанинг Ўзбекистон Республикаси босқичида Қорақалпоғистон Республикаси шарафини ҳимоя қилиш ҳуқуқини қўлга киритди.

Тадбир ёшларнинг келажакда турли соҳаларда масъулиятни ҳис этган ҳолда меҳнат қилиши, юртга хизмат қилишга тайёр бўлиб камол топишида муҳим тажриба мактаби сифатида намоён бўлди. Ёшларнинг ҳарбий-спорт соҳасига бўлган қизиқишини ошириш, уларнинг амалий кўникмаларини ҳамда ватанпарварлик туйғуларини янада мустаҳкамлаш мақсадида бундай мусобақалар келгусида ҳам изчил давом эттирилади.

Шимоли-ғарбий ҳарбий округ матбуот хизмати.