Технологик аудит — сифатли хизмат кафолати

Аҳолини тоза ичимлик суви билан таъминлаш, сув ресурсларидан оқилона фойдаланиш ҳамда коммунал инфратузилмани модернизация қилиш масаласига давлатимиз ва ҳукуматимиз томонидан доимий эътибор қаратиб келинмоқда. Айниқса, иқлим ўзгариши ва сув танқислиги шароитида мазкур йўналишда тизимли ва илмий асосланган чора-тадбирларни амалга ошириш муҳим аҳамият касб этмоқда.

Ўзбекистон Республикаси Президентининг 2025 йил 14 апрелдаги “Қурилиш ва уй-жой коммунал хўжалиги соҳасида давлат назоратини самарали ташкил этиш чора-тадбирлари тўғрисида”ги 66-сонли фармони соҳа ходимлари олдига янги ва долзарб вазифаларни қўйди. Фармонга мувофиқ, 2025 йил 1 июлдан бошлаб барча ичимлик сув таъминоти ва оқова сувларни чиқариб юбориш тизими объектларини технологик аудитдан ўтказиш тартиби белгилаб берилди.

Мазкур аудитнинг асосий мақсади — тизимдаги мавжуд муаммоларни ўз вақтида аниқлаш, маънан ва жисмонан эскирган ускуналарни янгилаш, энергия ресурсларини тежаш ҳамда аҳолига кўрсатилаётган хизматлар сифатини оширишдан иборат. Бу орқали коммунал хизматлар самарадорлигини ошириш ва ичимлик суви таъминотининг узлуксизлигига эришиш кўзда тутилган.

Фармон ижросини таъминлаш мақсадида Қорақалпоғистон Республикаси ҳудудий қурилиш ва уй-жой коммунал хўжалиги соҳасида назорат инспекцияси ҳамда “Қорақалпоқ сув таъминоти” акциядорлик жамияти мутахассислари ҳамкорлигида технологик аудит ўтказиш бўйича махсус режа-график ишлаб чиқилган бўлиб, тасдиқланган режа-жадвал асосида ҳудудлардаги ичимлик суви ва оқова сув тизими объектларида кенг қамровли ўрганиш ишлари олиб борилмоқда.

Амударё тумани Оқ олтин овули ҳудудида жойлашган сувни чучуклантирувчи станцияда ҳам технологик аудит ўтказилди. Ўрганиш жараёнида иншоотнинг техник ҳолати, ишлаб чиқариш қуввати ва хавфсизлик талабларига риоя этилиши батафсил таҳлил қилинди.

Мазкур станцияда ҳар бири 500 куб метр ҳажмга эга бўлган 2 та резервуар мавжуд бўлиб, умумий 1000 куб метр сувни тиндириш, сақлаш ва чучуклаштириш қувватига эга. Шунингдек, 4 та ер ости қудуғи орқали сув олиш йўлга қўйилган. Ўрганишлар натижасида барча сув иншоотлари ишчи ҳолатда эканлиги аниқланди.

Ушбу иншоотлар орқали Амударё туманининг Оқ олтин овули ҳамда Жумуртов шаҳарчасида яшовчи жами 2414 нафар аҳоли тоза ичимлик суви билан таъминланмоқда. Бу эса аҳолининг санитария-гигиена шароитларини яхшилаш, соғлом турмуш тарзини таъминлаш ва касалликларнинг олдини олишда муҳим омил ҳисобланади.

Мутахассислар таъкидлашича, технологик аудит тизимли равишда амалга оширилса, сув таъминоти соҳасидаги камчиликлар бартараф этилиб, хизмат сифати янада ошади. Энг муҳими, энергия тежамкор ва замонавий технологияларни жорий этиш орқали коммунал инфратузилманинг барқарорлиги таъминланади.

Оролбўйи шароитида тоза ичимлик суви — бу нафақат коммунал хизмат, балки аҳоли саломатлиги ва фаровонлигининг муҳим кафолатидир. Шу боис мазкур соҳада олиб борилаётган ислоҳотлар ҳудуд ижтимоий-иқтисодий ривожида муҳим ўрин тутади.