“ТУРМУШ” ПРОФИЛАКТИК ТАДБИРИ: МАНЗИЛЛИ ЁРДАМ ВА АМАЛИЙ ЭЪТИБОР
Жорий йилнинг 18 февраль санасидан 18 март кунига қадар республика миқёсида ўтказилаётган “Турмуш” профилактик тадбири аҳолининг ижтимоий ҳимояга муҳтож қатламларини ҳар томонлама қўллаб-қувватлаш, айниқса, хотин-қизлар муаммоларини ўз вақтида аниқлаш ва бартараф этишда муҳим аҳамият касб этмоқда. Мазкур тадбир доирасида Амударё туманида ҳам тегишли ҳамкор ташкилотлар иштирокида кенг қамровли манзилли ишлар амалга оширилиб, фуқароларнинг турмуш шароитини яхшилаш, саломатлигини муҳофаза қилиш ва ижтимоий муҳофазасини кучайтиришга алоҳида эътибор қаратилмоқда.
Хусусан, туман ҳудудидаги Навоий, Ойбек ва Бўстон маҳаллаларида истиқомат қилаётган оғир ҳаётий вазиятга тушиб қолган аёл-қизлар ҳамда ёлғиз яшовчи фуқаролар ҳолидан хабар олиниб, уларнинг кундалик эҳтиёжлари, саломатлиги ва яшаш шароити атрофлича ўрганилди. Бу каби учрашув ва суҳбатлар орқали аҳолининг муаммоларини жойида аниқлаш, уларга тезкор ва амалий ечим топиш имконияти янада кенгаймоқда.
Тадбир давомида ижтимоий кўмакка муҳтож фуқароларга бепул дори-дармонлар етказиб берилди. Бу эса, айниқса, соғлиғи билан боғлиқ муаммолари мавжуд, бироқ тиббий хизматдан тўлиқ фойдаланиш имконияти чекланган аёллар учун муҳим кўмак бўлди. Шу билан бирга, кўчма ультратовуш ташхиси ускунаси ёрдамида тиббий кўриклар ташкил этилгани аҳоли саломатлигини муҳофаза қилиш борасидаги ишлар самарасини янада оширди. Мутахассислар томонидан ўтказилган текширувлар натижасида соғлиғида муаммолар кузатилган фуқароларга тегишли тавсиялар берилди, зарур ҳолатларда эса уларни қўшимча даволаниш ёки чуқурлаштирилган тиббий кўрикка йўналтириш чоралари кўрилди.
Тадбир доирасида амалга оширилган ишлар фақат тиббий ёрдам билан чекланиб қолмади. “Инсон” ижтимоий хизматлар маркази ходимлари томонидан ёлғиз яшовчи аёлларга бириктирилган ёрдамчи ходимлар фаолияти ҳам ўрганилди. Хусусан, мазкур ходимлар томонидан кўрсатилаётган хизматлар сифати, уларнинг ўз вазифаларига масъулият билан ёндашаётгани, фуқаролар эҳтиёжларига қанчалик эътибор қаратаётгани амалда текширилди. Жараёнда ёлғиз яшовчи аёллар билан суҳбатлар ўтказилиб, улардан кўрсатилаётган хизматлардан рози ёки норози экани сўралди. Бу эса ижтимоий хизматлар тизимидаги камчиликларни ўз вақтида аниқлаш, хизмат сифатини ошириш ва фуқаролар мурожаатларига тезкор муносабат билдиришда муҳим омил бўлмоқда.
Шунингдек, ёлғиз яшовчи аёлларнинг хавфсизлигини таъминлаш масаласига ҳам жиддий эътибор қаратилди. Хусусан, уларнинг хонадонларига қўриқлаш пультлари ўрнатилиб, турли хавф-хатарларнинг олдини олишга қаратилган амалий чоралар кўрилди. Бу каби ёндашув, аввало, фуқароларнинг тинч ва хотиржам яшашини таъминлаш, уларни турли тазйиқ ва таҳдидлардан асраш, зарурат туғилган ҳолларда тезкор ёрдам чақириш имкониятини яратишга хизмат қилади. Шу билан бир қаторда, профилактик суҳбатлар ҳам ташкил этилиб, хотин-қизларнинг ҳуқуқий онги ва ҳуқуқий маданиятини юксалтириш, уларга ўз ҳуқуқ ва манфаатларини ҳимоя қилиш механизмларини тушунтиришга алоҳида аҳамият берилди.
Мутахассислар таъкидлаганидек, “Турмуш” профилактик тадбири ижтимоий ҳимояга муҳтож фуқароларни қўллаб-қувватлаш, уларнинг муаммоларини манзилли ўрганиш ва амалий ёрдам кўрсатишда муҳим ўрин тутади. Айниқса, оғир турмуш шароитида яшаётган аёл-қизлар, ёлғиз фуқаролар ва эътиборга муҳтож оилаларга нисбатан бундай ғамхўрлик жамиятда меҳр-оқибат, ҳамжиҳатлик ва инсон қадрини улуғлаш каби эзгу тамойилларни янада мустаҳкамлайди.
Амударё туманида ўтказилаётган бу каби манзилли ишлар аҳоли манфаатларини ҳимоя қилиш, айниқса, хотин-қизларнинг саломатлиги, хавфсизлиги ва ижтимоий фаровонлигини таъминлаш йўлида олиб борилаётган амалий саъй-ҳаракатларнинг ёрқин ифодасидир. Энг муҳими, бундай тадбирлар орқали инсон қадри, унинг дарду ташвиши ва эҳтиёжларига бефарқ бўлмаслик тамойили ҳаётда ўзининг амалий ифодасини топмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
