82-сонли мактабда "Уч авлод учрашуви" тадбири бўлиб ўтди

Инсоният тарихида авлодлар ўртасидаги ворисийлик, аждодлар ўгити ва катталарнинг ҳаётий тажрибаси доимо жамиятни тўғри йўлга бошловчи маёқ вазифасини ўтаб келган. Айниқса, бугунги шиддатли замонда, турли ёт ғоялар ёшлар онгини эгаллашга уринаётган мураккаб даврда нуронийларнинг дуоси ва уларнинг ибратли ҳаёт йўли нафақат маънавий эҳтиёж, балки хавфсиз ва барқарор келажакнинг мустаҳкам кафолатидир. Мамлакатимизда маҳаллабай ишлаш тизимининг янги босқичга кўтарилиши, ҳудудларда тинчлик ва осойишталикни таъминлаш борасидаги ислоҳотлар замирида ҳам айнан инсон қадрини улуғлаш ва ёш авлодни ватанпарварлик руҳида тарбиялаш мақсади мужассам.

Амударё туманининг Олмазор маҳалласида жойлашган 82-сонли умумий ўрта таълим мактабида ана шундай эзгу мақсадларни ўзида ифода этган тадбир ташкил этилди. "Уч авлод учрашуви" шиори остида ўтказилган ушбу маънавий-маърифий тадбир мазмун-моҳиятига кўра жамиятнинг барча қатламларини бирлаштирувчи муҳим мулоқот майдонига айланди.

Мазкур учрашув давлатимиз раҳбари томонидан 2026 йил 5 январда имзоланган "Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида"ги қарори ижроси доирасида ташкил этилди. Ушбу тарихий ҳужжат ижросини таъминлаш, маҳаллаларда жиноятчиликнинг олдини олиш ва ёшларнинг бўш вақтини мазмунли ташкил этиш мақсадида "Нуроний" жамғармаси, маҳалла фаоллари, ички ишлар органлари ва прокуратура тизими ҳамкорлигида бугун туманнинг барча ҳудудларида тизимли ишларни амалга оширилмоқда.

Мазкур учрашув ҳам ана шу кенг кўламли ҳамкорликнинг амалий ифодаси бўлиб, унда "Нуроний" жамғармаси Амударё тумани бўлими раиси Бекман Аллабергенов, туман прокурори ёрдамчиси Шаряр Жолдасов, маҳаллаларнинг фаол оқсоқоллари, мактабларга бириктирилган инспектор-психологлар, соҳа мутахассислари ва келажагимиз эгалари бўлган ўқувчи ёшлар иштирок этдилар.

Тадбирни кириш сўзи билан очган Бекман Аллабергенов ёшлар тарбиясининг нақадар нозик ва масъулиятли жараён эканлигига алоҳида тўхталиб ўтди. У ўз нутқида бугунги кун ёшлари эришаётган ютуқларни эътироф этиш билан бирга, уларни ҳуқуқбузарлик ва жиноятчилик каби иллатлардан узоқ юришга, берилган имкониятлардан оқилона фойдаланишга чақирди. Нуроний отахоннинг ҳаётий мисоллар билан суғорилган ўгитлари тингловчиларда катта таассурот қолдирди.

Амударё тумани прокурорининг ёрдамчиси Шаряр Жолдасов юқорида таъкидланган Президент қарорининг мазмун-моҳиятига тўхталиб ўтди. Прокуратура вакили таъкидлаганидек, маҳаллада хавфсиз муҳитни яратиш фақат ҳуқуқ-тартибот органларининг иши эмас, балки бутун жамоатчиликнинг, ҳар бир фуқаронинг бурчидир. У ўз нутқида Қарор доирасида олиб борилаётган ишлар, ёшлар ўртасида қонун устуворлигини таъминлаш ва уларни турли зарарли таъсирлардан ҳимоя қилиш бўйича кўрилаётган чоралар ҳақида батафсил маълумот берди.

Учрашувда ҳаёт синовларида тобланган фахрийлар ҳам сўзга чиқиб, ўз фикр ва мулоҳазалари билан ўртоқлашдилар. Хусусан, Амангул Қаюпова, Хонимжон Ражапова ва бошқа эл ардоғидаги онахонлар, фахрий устозлар сўзга чиқиб, ўзларининг бой иш тажрибалари ва ҳаёт йўллари ҳақида сўзлаб бердилар. Уларнинг ҳар бир сўзида ёш авлодга бўлган меҳр, уларнинг эртасига бўлган ишонч ва масъулият ҳисси сезилиб турди.

Самимий ва очиқ мулоқот тарзида ўтган тадбирда ёшлар ўзларини қизиқтирган саволларига соҳа мутахассислари ва нуронийлардан аниқ жавоблар олдилар. Бундай учрашувлар ёшларда ўз юртига дахлдорлик ҳиссини ошириш билан бирга, катта авлод вакилларига бўлган ҳурмат-эҳтиром туйғусини янада мустаҳкамлайди.

Хулоса қилиб айтганда, Амударё туманида ўтказилган ушбу "Уч авлод учрашуви" нафақат ҳисобот ёки расмий тадбир, балки қалблар мулоқотига айланди. Президент Қарори ижроси доирасида ташкил этилган бундай мулоқотлар маҳаллаларда тинчлик-осойишталикни асраш, жиноятчиликнинг олдини олиш ва соғлом маънавий муҳитни қарор топтиришда беқиёс аҳамият касб этади. Зеро, нуронийларнинг панд-насиҳатларига қулоқ тутган, аждодлар меросини қадрлаган ва қонун устуворлигини англаган ёшлар ҳеч қачон адашмайди. Мазкур тадбир ҳам айнан шундай баркамол авлодни шакллантириш йўлидаги муҳим қадамлардан бири бўлди. Юртимиздаги ҳар бир маҳалла хавфсиз, ҳар бир хонадон тинч ва ҳар бир ёшнинг келажаги порлоқ бўлиши учун мана шундай ҳамжиҳатликдаги ишлар келгусида ҳам изчил давом эттирилади.