Агросаноат соҳасида фаолият юритувчи касаба уюшмаси ташкилотлари раисларининг малакасини ошириш мақсадида ўқув семинари ўтказилди
Сўнгги йилларда мамлакатимиз қишлоқ хўжалиги соҳасида олиб борилаётган кенг кўламли ислоҳотлар нафақат иқтисодий кўрсаткичларни оширишга, балки ушбу тизимда меҳнат қилаётган минглаб ишчи-ходимларнинг ижтимоий ҳимоясини кучайтиришга ҳам хизмат қилмоқда. Бу борада жамиятнинг энг муҳим бўғинларидан бири бўлган касаба уюшмаларининг роли беқиёсдир. Айнан шу мақсадларни ҳаётга татбиқ этиш, жойлардаги мутахассисларнинг билим ва малакасини ошириш мақсадида Қорақалпоғистон Республикасида фаолият юритаётган фермер хўжаликларининг 103 та ҳудудий бошланғич касаба уюшмаси ташкилотлари раислари иштирокида ўқув-семинар бўлиб ўтди.
Амударё тумани ҳокимлиги биносида ташкил этилган ушбу семинар Ўзбекистон Республикаси Президентининг 2025 йил 17 октябрдаги учрашувида белгилаб берилган устувор вазифалар ҳамда “2026 йил – Маҳаллани ривожлантириш ва жамиятни юксалтириш йили” Давлат дастури доирасида ўтказилди. Ундан кўзланган асосий мақсад – Қорақалпоғистон Республикаси ҳудудида фаолият юритаётган фермер хўжаликларидаги ҳудудий бошланғич касаба уюшмаси ташкилотлари фаолиятини бугунги замон талаблари асосида самарали йўлга қўйишдан иборатдир. Шу билан бирга, ташкилий-меъёрий ишларни тўғри ва тизимли ташкил этиш, шунингдек, жойлардаги касаба уюшмалари раисларига бевосита амалий кўмак бериш масалалари ҳам кун тартибидаги асосий мавзулардан бири бўлди.
Ўзбекистон касаба уюшмалари Федерациясининг Қорақалпоғистон Кенгаши раиси ўринбосари Муратбай Данияров, Ўзбекистон Агросаноат мажмуи ходимлари касаба уюшмаси Республика Кенгаши раиси ўринбосари Ҳусан Бегматов, Республика Кенгаши ташкилий ишлар бўлими мудири Турғунбай Санаев ҳамда мазкур Кенгашнинг Қорақалпоғистон Республикаси бўйича масъул ташкилотчиси Ерғали Сейтназаров ва Амударё тумани ҳокими Собир Хўжаметовлар тадбирда қатнашиб, иштирокчиларга ўзларининг қимматли тавсияларини бердилар.
Семинар давомида бир қатор долзарб масалалар муҳокама қилинди. Хусусан, касаба уюшмалари фаолиятини янада такомиллаштириш ва унинг самарадорлигини ошириш йўллари, агросаноат мажмуи ходимларининг меҳнат ҳуқуқларини муносиб ҳимоя қилиш ҳамда уларнинг ижтимоий манфаатларини таъминлаш механизмлари бўйича батафсил тушунтиришлар берилди.
Бундан ташқари, тизимда амалга оширилаётган сўнгги ислоҳотларнинг туб мазмун-моҳияти юзасидан муҳим ва амалий маълумотлар тақдим этилиб, иштирокчиларнинг ҳуқуқий саводхонлигини оширишга алоҳида урғу қаратилди.
Ушбу амалий ўқув-семинар барча қатнашчилар учун очиқ мулоқот ва ўзаро тажриба алмашиш майдонига айланди. Иштирокчилар ўзларини қизиқтирган саволларга жавоб олибгина қолмай, касаба уюшмалари фаолиятини янада самарали ташкил этиш бўйича янги билим ва замонавий кўникмаларга эга бўлдилар.
Тадбир сўнгида барча иштирокчиларга Ўзбекистон касаба уюшмалари Федерациясининг Малака ошириш институти томонидан махсус сертификатлар тантанали равишда топширилди. Ушбу ҳужжат уларнинг касбий салоҳияти ошганлигини тасдиқлаш билан бирга, келгусида қишлоқ хўжалиги ходимларининг манфаатларини янада ишончли ҳимоя қилиш йўлидаги масъулиятли фаолиятларига ҳам туртки бўлиб хизмат қилади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
