Амударёда «Касб ва меҳнат куни» кенг нишонланди: 3-сонли техникум ёшларга ўз эшикларини очди

Ҳар бир жамиятнинг иқтисодий қудрати, унинг ижтимоий барқарорлиги ва порлоқ келажаги меҳнатсевар халқи ва ўз ишининг ҳақиқий устаси бўлган етук мутахассислар қўлидадир. Бугунги шиддат билан ривожланаётган даврда ёшларни тўғри касбга йўналтириш, уларнинг қалбида меҳнатга бўлган муҳаббатни уйғотиш муҳим устувор йўналишларидан бирига айланиб улгурган.

Мамлакатимизда касб-ҳунар  таълими тизимини мутлақо янги босқичга олиб чиқиш, кадрлар тайёрлаш сифатини халқаро стандартлар даражасига кўтариш ҳамда соҳанинг моддий-техник базасини тубдан мустаҳкамлаш мақсадида тизимли ислоҳотлар жадал амалга оширилмоқда. Хусусан, Ўзбекистон Республикаси Президентининг 2025 йил 23 октябрдаги «Касбий таълим тизимида ислоҳотларни амалга ошириш чора-тадбирлари тўғрисида»ги фармони бу борадаги ишларни янги поғонага олиб чиқди.

Мазкур ҳужжатга асосан иш берувчилар билан ҳамкорликни янада кенгайтириш, энг муҳими, жамоатчилик ва ёшлар орасида турли касбларнинг жозибадорлигини ошириш ҳамда касбий таълимни оммалаштириш мақсадида 2026 йилдан бошлаб юртимизда 5 май санаси “Касб ва меҳнат куни” сифатида ҳар йили кенг нишонланиши белгиланди. Бу байрам шунчаки календардаги сана эмас, балки бутун жамият эътиборини ҳалол меҳнат ва замонавий касбларни эгаллашга қаратувчи улкан маърифий ҳаракатга айланмоқда.

Айнан мана шу эзгу мақсадлар йўлида Амударё туманида жойлашган 3-сонли техникумда махсус тадбир ташкил этилди. Ушбу касб-ҳунар маскани ўз бағрига Амударё туманидаги умумтаълим мактабларининг 9- ва 11-синф битирувчиларини — келажакнинг ёш авлодини азиз меҳмон сифатида чорлади. Тантанали тадбирда туман ҳокими Собир Хўжаметов ҳамда тегишли масъуллар бевосита иштирок этиб, техникум ўқувчилари ва мактаблардан ташриф буюрган барча меҳмонларни юртимизда нишонланаётган Касб ва меҳнат куни билан самимий табрикладилар.

Тадбирга ташриф буюрган мактаб ўқувчиларининг баъзилари 9-синфни муваффақиятли тамомлаб, эндиликда бундан кейинги ҳаёт йўли ҳақида ўйлаётган бўлса, яна бошқалари 11-синфни тугатиб, катта ҳаётга қадам қўяётган ёшлардир. Ҳар иккала тоифадаги битирувчилар учун ҳам бундай очиқ мулоқот ва танишув тадбири катта имкониятлар эшикларини очди. Чунки замонавий шароитда меҳнат бозорида ўз ўрнига эга бўлиш, муносиб ва рақобатбардош касбни танлаш муҳим масала бўлиб, бу ҳар бир ёшнинг эртанги фаровонлигининг асосий калити ҳисобланади.

Бугунги кунда мазкур касб-ҳунар таълими маскани ёшлар учун барча шароитларга эга бўлган замонавий комплекслардан бири саналади. Техникум биноси 936 ўринли улкан қувватга эга. Таълим даргоҳида барча қулайликларга эга бўлган 100 ўринли замонавий ётоқхона ҳамда худди шунча ўринга мўлжалланган ошхона узоқ ҳудудлардан келиб таҳсил олувчи ёшлар ихтиёрида.

Ҳозирда муассасада жами 586 нафар ўқувчи кундузги, сиртқи ва дуал таълим шакллари бўйича чуқурлаштирилган билим эгаллаб келмоқда. Эътиборли жиҳати шундаки, билим олаётган ёшларнинг 426 нафари давлат гранти асосида бепул таҳсил олаётган бўлса, 160 нафари эса тўлов-контракт асосида ўқишни давом эттирмоқда. Шунингдек, 86 нафар ўқувчи шартнома асосида шинам ётоқхонага жойлаштирилган бўлиб, уларнинг 54 нафарини қизлар ва 32 нафарини ўғил болалар ташкил этади.

Албатта, сифатли таълим ва етук кадрлар тайёрлашда жонкуяр педагогларнинг ўрни беқиёсдир. Техникумда ўз касбининг фидойиси бўлган жами 48 нафар ўқитувчи ва ёшларга касб сир-асрорларини ўргатувчи 6 нафар ишлаб чиқариш таълими устаси фаолият юритади. Ушбу устозларнинг малакасига эътибор қаратадиган бўлсак, уларнинг 1 нафари олий тоифали, 12 нафари етакчи ва 14 нафари эса катта ўқитувчилардир. Бундай салоҳиятли жамоанинг меҳнати натижаси ўлароқ, жорий ўқув йилида техникумни 196 нафар ўқувчи муваффақиятли тамомламоқда.

Келгуси, 2026-2027 ўқув йили учун эса муассасанинг қабул режалари янада кенг қамровли. Жумладан, 9-синфни тамомлаган ўқувчилар учун 330 та, 11-синф битирувчилари учун эса 300 та ўрин ажратилиши режалаштирилган. Бундан ташқари, назария ва амалиётни бирлаштирувчи дуал таълимга ҳам 150 нафар ўқувчини қабул қилиш режалаштирилмоқда.

Тантанали тадбир давомида мактабларнинг 9 ва 11-синф битирувчилари техникумда мавжуд бўлган барча йўналишлар ва унинг имкониятлари билан яқиндан танишиб, ўқитувчилардан ўз саволларига батафсил жавоблар олдилар. Ушбу тадбирдан кейин ўқувчи-ёшларнинг аксарияти келгусида мазкур касб-ҳунар таълими масканида таҳсил олиб, ўз касбининг етук мутахассиси бўлишни кўнглига туккан бўлса ажаб эмас. Зеро, бугун тўғри танланган касб ва эгалланган пухта билим порлоқ келажакнинг мустаҳкам пойдеворидир.