ЗАМОНАВИЙ ТEХНОЛОГИЯЛАР — ЮҚОРИ ҲОСИЛ ВА САМАРАДОРЛИК ГАРОВИ

Амударё туманида қишлоқ хўжалигида илғор технологияларни кенг жорий этиш, ҳосилдорликни ошириш ҳамда фермерлар учун қулай ва самарали иш усулларини оммалаштиришга қаратилган амалий семинарлар мунтазам ташкил этиб келинмоқда. Ана шундай тадбирлардан бири Чойкўл овулидаги “Чойкўл–Дўстлик” фермер хўжалиги пахта майдонида бўлиб ўтди.

Ғўза парвариши ва замонавий агротехнологияларни амалиётга татбиқ этишга бағишланган ушбу семинарда Амударё тумани ҳокими Собир Хўжаметов, қишлоқ хўжалиги соҳаси мутахассислари, фермер хўжаликлари раҳбарлари ҳамда агрономлар иштирок этдилар.

Бугунги кунда қишлоқ хўжалигини рақамлаштириш ва инновацион технологияларни кенг қўллаш давр талаби бўлиб қолмоқда. Айниқса, пахтачилик тармоғида замонавий техникалардан фойдаланиш меҳнат унумдорлигини ошириш, харажатларни камайтириш ва ҳосилдорликни юксалтиришда муҳим аҳамият касб этмоқда. Семинар давомида ана шундай илғор ечимлардан бири бўлган замонавий дронлар ёрдамида ғўза баргларини озиқлантириш ишлари амалий тарзда намойиш этилди.

Мутахассисларнинг таъкидлашича, ушбу замонавий қурилмалар қишлоқ хўжалигида янги имкониятларни очиб бермоқда. Мазкур дронлар юқори аниқликда ишлаши, дори воситаларини тенг ва сифатли пуркаши ҳамда катта майдонларни қисқа вақт ичида қамраб олиши билан ажралиб туради.

Семинар иштирокчиларига дронларнинг техник имкониятлари ва амалий афзалликлари ҳақида батафсил маълумот берилди. Хусусан, пахта майдонларида одатда гектарига 10–15 литр ишчи эритма сарфланиши ҳисобга олинса, 100 литр сиғимли битта тўлдириш билан ўртача 6–10 гектар майдонга ишлов бериш мумкинлиги қайд этилди. Бу эса қисқа вақт ичида катта ҳажмдаги ишларни бажариш имконини яратади.

Шунингдек, ушбу дронларининг кунлик иш унумдорлиги ҳам эътиборга молик. Иш шароити, логистика ва техник таъминотга қараб, бир соат давомида 15–25 гектар майдонга ишлов бериш мумкин. Кун давомида эса 120–200 гектар, яхши ташкил этилган шароитларда эса 200 гектардан ортиқ майдонни қамраб олиш имконияти мавжуд.

Мутахассислар томонидан таъкидланганидек, ушбу технологиянинг энг муҳим афзалликларидан бири – унинг иқтисодий самарадорлигидир. Дори воситалари сарфи 20–30 фоизгача қисқаради, сув ресурслари сезиларли даражада тежалади. Трактор ва бошқа анъанавий техникаларга нисбатан ёқилғи харажатлари деярли талаб этилмайди. Бу эса фермер хўжаликлари учун харажатларни камайтириб, иқтисодий фойдани оширишга хизмат қилади.

Яна бир муҳим жиҳат — вақт тежалишидир. Одатда бир неча кун талаб қиладиган ишларни дронлар ёрдамида бир куннинг ўзида бажариш мумкин. Замонавий радар ва сенсорлар билан жиҳозланган ушбу қурилмалар кечки ва тунги вақтларда ҳам самарали ишлаш имкониятига эга.

Дрон технологияларининг ҳосилдорликка таъсири ҳам юқори баҳоланмоқда. Препаратлар экин майдонига бир хил тақсимланиши натижасида ўсимликларнинг озиқланиши яхшиланади, баргларнинг пастки қисмигача етиб борадиган пуркаш тизими эса биологик ва кимёвий воситаларнинг самарадорлигини оширади. Энг муҳими, техника далага кирмагани сабабли тупроқ зичлашмайди, ғўза илдиз тизими зарар кўрмайди.

Семинар давомида меҳнат унумдорлигини ошириш масаласига ҳам алоҳида эътибор қаратилди. Дронларни бошқариш учун атиги бир ёки икки нафар оператор етарли бўлиб, оғир қўл меҳнати сезиларли даражада камаяди. Қурилмалар майдонларга юқори аниқликда ишлов беради, қайта сепиш ёки айрим ҳудудларни қолдириб кетиш ҳолатларининг олдини олади.

Тадбир якунида соҳа мутахассислари ва фермерлар замонавий технологияларни кенг жорий этиш қишлоқ хўжалиги самарадорлигини янада ошириш, ресурслардан оқилона фойдаланиш ҳамда мўл ҳосил етиштиришда муҳим омил бўлишини таъкидладилар.

Чарос Арслонова, туман ҳокимлигининг Ахборот хизмати раҳбари.