ИШСИЗ ЁШЛАР УЧУН МЕҲНАТ ЯРМАРКАСИ ТАШКИЛ ЭТИЛДИ

Ёшларни муносиб иш билан таъминлаш, уларнинг бандлигини ошириш ҳамда меҳнат бозоридаги мавжуд имкониятлардан самарали фойдаланишини таъминлаш бугунги кунда давлат сиёсатининг устувор йўналишларидан бири ҳисобланади. Шу мақсадда Амударё туманида навбатдаги Бандлик ярмаркаси ташкил этилиб, ишсиз ёшларни доимий иш ўринларига йўналтириш, уларнинг муаммо ва таклифларини ўрганиш ҳамда бандлик масалаларига амалий ечим топишга қаратилган муҳим тадбир ўтказилди.

Туман Маданият бўлими биносида бўлиб ўтган тадбир аввалида очиқ мулоқот ташкил этилди. Унда туман ҳокими Собир Хўжаметов, республика ишчи гуруҳи аъзолари, ҳоким ўринбосарлари, тегишли ташкилот ва идоралар раҳбарлари ҳамда ёшлар иштирок этди.

Очиқ мулоқот давомида туман ҳокими Собир Хўжаметов сўзга чиқиб, мамлакатимизда ёшларга оид давлат сиёсати доирасида уларнинг билим олиши, касб-ҳунар эгаллаши, муносиб иш билан таъминланиши ва тадбиркорлик фаолиятини бошлаши учун кенг имкониятлар яратилаётганини алоҳида таъкидлади. Шунингдек, ёшларнинг ташаббус ва интилишларини ҳар томонлама қўллаб-қувватлаш, уларнинг муаммоларини ўз вақтида ҳал этиш ҳамда бандлигини таъминлаш борасида амалга оширилаётган тизимли ислоҳотлар ҳақида сўз юритди.

Мулоқот чоғида ёшлар билан самимий фикр алмашилиб, уларнинг бандлик, касб-ҳунар ўрганиш, тадбиркорликни йўлга қўйиш ҳамда ўз салоҳиятини рўёбга чиқариш борасидаги мурожаат ва таклифлари тингланди. Билдирилган масалалар юзасидан мутасадди раҳбарларга тегишли топшириқлар берилиб, ҳар бир мурожаатни манзилли ўрганиш ва амалий ечим топиш юзасидан вазифалар белгиланди.

Шундан сўнг меҳнат ярмаркаси ўз ишини бошлади. Унда туман ҳудудида фаолият юритаётган корхона, ташкилот ва муассасалар томонидан тақдим этилган бўш иш ўринлари, касбга тайёрлаш ва қайта тайёрлаш дастурлари, бандликка кўмаклашиш хизматлари ҳамда тадбиркорликни қўллаб-қувватлаш бўйича мавжуд имкониятлар иштирокчиларга тақдим этилди.

Ярмаркада 150 нафардан ортиқ ишсиз ёшлар фаол қатнашиб, ўз мутахассислиги, билим ва кўникмаларига мос бўш иш ўринлари билан танишди. Иш берувчилар билан бевосита мулоқот қилиш, меҳнат шароитлари, иш ҳақи ва фаолият йўналишлари ҳақида батафсил маълумот олиш имкониятига эга бўлган ёшлар ўзларини қизиқтирган саволларга ҳам мутахассислардан жавоб олдилар. Тадбир якунларига кўра, 22 нафар ёшнинг бандлиги таъминланиб, улар доимий иш ўринларига жойлаштирилди.

Бугунги кунда ёшларнинг бандлигини таъминлаш нафақат уларнинг даромад манбаини яратиш, балки ҳаётда ўз ўрнини топиши, касбий салоҳиятини рўёбга чиқариши ва жамият тараққиётида фаол иштирок этиши учун муҳим омил ҳисобланади. Шу боис бу каби меҳнат ярмаркалари ёшлар билан манзилли ишлаш, уларнинг эҳтиёж ва қизиқишларини инобатга олган ҳолда амалий ёрдам кўрсатишда алоҳида аҳамият касб этмоқда.

Амударё туманида ҳам ёшларнинг бандлигини таъминлаш, уларни касб-ҳунар эгаллашга рағбатлантириш, тадбиркорлик ташаббусларини қўллаб-қувватлаш ҳамда муносиб меҳнат фаолиятига йўналтириш борасидаги тизимли ишлар изчил давом эттирилмоқда.