Депутатлик сўровлари аҳоли муаммоларини ҳал этиш воситасига айланди

Маҳаллий вакиллик органларининг салмоғи кўп жиҳатдан депутатнинг ўз сайлов округидаги кундалик ҳаёт билан қанчалик яқин боғланганига қараб ўлчанади, зеро қонунчиликда белгиланган ваколатлар амалий ҳаракатга айлангандагина аҳоли учун сезиларли натижа беради.

Сайловчи учун депутат — йилда бир марта ҳисобот берувчи расмий шахс эмас, балки ўз маҳалласидаги муаммони эшитадиган ва уни тегишли идорага етказа оладиган вакилдир.

Халқ депутатлари Амударё туман Кенгашининг 11-сонли “Холимбег” сайлов округидан депутати Шуҳрат Матирзаев томонидан сайловчилар билан тизимли мулоқот ўрнатиш, аҳоли мурожаатларини ўрганиш ҳамда уларда кўтарилаётган муаммоли масалаларни тегишли ташкилотлар билан ҳамкорликда ҳал этишга алоҳида эътибор қаратилмоқда.

Депутатнинг тўққиз ойлик фаолияти давомида сайловчилар билан ўндан ортиқ учрашув ўтказилиб, аҳолини қийнаётган масалалар жойига чиққан ҳолда ўрганилди. Мурожаатларда кўрсатилган муаммоларни бартараф этиш юзасидан масъул ташкилотларга депутатлик сўровлари киритилди ва уларнинг ижроси назоратга олинди.

Қайд этиш жоизки, депутат ўз сайлов округидаги овул ва маҳалла фуқаролар йиғинлари биноларида “Маҳалла еттилиги” вакиллари билан ҳамкорликда аҳоли билан мунтазам учрашувлар ўтказиб келади, шахсий қабуллар эса фуқаролар мурожаатларини қабул қилишда яна бир қулай восита бўлиб хизмат қилмоқда.

Қабуллар давомида билдирилган таклифлар, йўлланган ариза ва шикоятлар ўз вақтида кўриб чиқилиб, уларни имкон қадар ижобий ҳал қилиш мақсадида тегишли муассаса ва ташкилот раҳбарлари номига депутатлик сўровлари чиқарилади. Бу тартиб мурожаатнинг жавобсиз қолмаслигини таъминлайди.

Амалга оширилган ишлар доирасида туман ҳудудидаги ижтимоий соҳа объектлари фаолияти ўрганилди. Жумладан, 71-сонли оилавий поликлиникага ташриф уюштирилиб, тиббиёт муассасасида аҳолига кўрсатилаётган хизмат сифати, мавжуд шароитлар ва келгусида амалга оширилиши режалаштирилган ишлар билан танишилди.

Айниқса, 71-сонли оилавий поликлиника биносини реконструкция қилиш масаласига алоҳида эътибор қаратилди. Мазкур объектни қайта қуриш ишлари Ўзбекистон Республикаси Президентининг 2025 йил 14 августдаги “Қорақалпоғистон Республикасини ижтимоий-иқтисодий ривожлантиришга қаратилган чора-тадбирларни янада жадаллаштириш тўғрисида”ги қарори асосида амалга оширилмоқда.

Депутат ушбу лойиҳа билан яқиндан танишиб, унда назарда тутилган ишлар, тиббиёт муассасасида аҳоли учун яратиладиган шароитлар ҳамда хизмат сифатини яхшилашга қаратилган чора-тадбирлар, уларнинг амалга оширилиши билан боғлиқ масалалар юзасидан масъуллар билан фикр алмашди.

Шунингдек, мавсумий қишлоқ хўжалиги ишлари, хусусан, пахта йиғим-теримида иштирок этаётган фуқаролар билан ҳам учрашув бўлиб ўтди. Унда теримчиларнинг меҳнат шароитлари, улар учун яратилган қулайликлар, мавсум давомида юзага келаётган муаммолар ва таклифлар батафсил ўрганилди.

Фуқаролар билан очиқ мулоқот жараёнида билдирилган таклиф ва мурожаатлар қайд этилиб, уларни ҳал этиш бўйича тегишли ташкилотлар билан ҳамкорликда иш олиб бориш белгилаб олинди. Бу эса кўтарилган ҳар бир масаланинг назоратдан четда қолмаслигига хизмат қилади.

Умуман, депутат ташаббуси билан амалга оширилаётган ишларнинг мазмуни аҳоли мурожаатини эшитиш, муаммони жойида кўриш ва унинг амалий ечимини таъминлашдан иборат бўлиб, бу сайловчилар манфаатларини ифода этиш ҳамда улар билан доимий мулоқотни сақлашда муҳим аҳамият касб этади.

Келгусида сайловчилар билан учрашувларни мунтазам давом эттириш, аҳоли кўтарган муаммоли масалаларни тегишли ташкилотлар билан биргаликда ҳал этиш ва ҳудуддаги ижтимоий-иқтисодий йўналишлар бўйича депутатлик назоратини кучайтириш режалаштирилган. Доимий мулоқот эса бу вазифаларнинг амалий натижага айланишида асосий омил бўлиб хизмат қилади.