ҲАР БИР МУРОЖААТ ЭЪТИБОРДА

Туман Давлат солиқ инспекциясига ўрнатилган 515-4902 рақамли ишонч телефонига жорий йил бошидан фуқаролардан ҳар хил масалалар бўйича мурожаатлар келиб тушган бўлиб, улар назорат-касса машиналарини ишлатмаслик, чек ёки унга тенглаштирилган ҳужжатлар берилмаганлиги, банк пластик карталарига савдо қилмаслик ёки пластик карталарга савдо қилганда нақд пулдагига нисбатан 10-15 фоиз миқдорда ошириб пул олиш ва бошқада масалалар бўйича келиб тушган мурожаатлардир.

Ушбу мурожаатлар туман ДСИ томонидан қонунда белгиланган муддатларда ўрганиб чиқилиб, 10 та тадбиркорлик субъектларида назорат қилувчи органлар фаолиятини мувофиқлаштирувчи ҳудудий комиссияси руҳсати олинган ҳолда қисқа муддатли текширишлар ўтказилди.

Ўтказилган текширишлар натижасида 10 ҳолатда 1833,5 минг сўмга касса назорат машинаси чеки ёки унга тенглаштирилган ҳужжатлар берилмаслиги сабабли, 4 та ҳолатда банк пластик картасига савдо қилиш қоидалари бузилиши ҳолатлари аниқланган, бундан ташқари, текшириш давомида 26992,0 минг сўмлик кирим ҳужжатлари бўлмаган озиқ-овқат ва  ноозиқ-овқат товарларининг борлиги аниқланиб, ашёвий далил сифатида олинган.

Ушбу тадбиркорлик субъектларида ўтказилган текширишларда аниқланган хато-камчиликлар юзасидан Ўзбекистон Республикаси Солиқ Кодексининг 119-моддаси 1-қисми билан энг кам иш ҳақининг 30 баробари миқдорида, 114-моддасига асосан кирим қилинмаган товарлар суммаси миқдорида молиявий жарималар қўллаш тавсия қилинган.

Туман ДСИнинг «ишонч телефони»га қилинган мурожаатлар тезкорлик билан қонун доирасида кўриб чиқилиши ва мурожаат қилувчиларга ўз вақтида  тегишли тартибда  жавоб берилиши натижасида фуқароларнинг "Ишонч телефони”га бўлган ишончи тобора ортиб бормоқда.

Илҳом НАСУРУЛЛАЕВ,

туман Давлат солиқ инспекциясининг навбатчи қисми бўлим бошлиғи.

(Фото - http://www.turkistonpress.uz)