Сиёсат 14.01.2016 👁 3,361

ВАТАН ҲИМОЯЧИЛАРИ КУНИ КЕНГ НИШОНЛАНДИ

Ҳар қандай давлатнинг куч-қудрати, халқининг эркин ва озод, тинч ва осойишта умргузаронлик қилиши унинг ўз армияси, Қуролли Кучларига боғлиқ. Мамлакатимизда истиқлол йилларида Президентимиз Ислом Каримов раҳнамолигида миллий армиямиз тубдан ислоҳ қилиниб, ҳарбий хизмат йигитлар учун чинакам шараф ишига айланди.

Аввало, ҳарбий соҳани ислоҳ қилиш йўлида мустаҳкам ҳуқуқий пойдевор яратилди. Энг аввало, Бош Қомусимиз — Ўзбекистон Республикаси Конституциясида мамлакатимиз Қуролли Кучлари Ўзбекистон Республикасининг давлат суверенитетини ва ҳудудий яхлитлигини, халқимизнинг тинч ҳаёти ва хавфсизлигини ҳимоя қилиш учун ташкил этилиши белгилаб қўйилди. Ўзбекистон Республикасини ҳимоя қилиш — Ўзбекистон Республикаси ҳар бир фуқаросининг бурчи эканлиги алоҳида қайд этилди.

Бу меъёр миллий қонунчилигимизда ҳам ўз аксини топди – "Ўзбекистон Республикасининг Давлат чегараси тўғрисида”ги (1999 йил), "Фуқаро муҳофазаси тўғрисида”ги (2000 йил), "Терроризмга қарши кураш тўғрисида”ги (2000 йил), "Мудофаа тўғрисида”ги (2001 йил), "Умумий ҳарбий мажбурият ва ҳарбий хизмат тўғрисида”ги (2002 йил), "Ўзбекистон Республикаси Қуролли Кучлари резервидаги хизмат тўғрисида”ги (2003 йил), "Ўзбекистон Республикасининг ташқи сиёсий фаолияти Концепциясини тасдиқлаш тўғрисида”ги (2012 йил) Қонунлар шулар жумласидандир.

2016 йил 14 январь куни Манғит шаҳридаги 1-сонли болалар мусиқа ва санъат мактабида 14 январь – Ватан ҳимоячилари кунига бағишланган байрам тадбири бўлиб ўтди.

Тадбирни туман ҳокими ўринбосари, Хотин-қизлар қўмитаси раиси М.Аҳмедова очди ва олиб борди.

Туман ҳокимининг биринчи ўринбосари Б.Эрназаров, "Манғит” чегара пости бошлиғи А.Айтуғдиев, 64-сонли мактаб ўқитувчиси О.Холимбетова, ҳарбий хизматдаги оддий аскар Ж.Эргашев ва бошқалар ҳарбийларни ва Ватан ҳимоячиларини байрам билан қутлар экан, уларнинг сарҳадларимиз дахлсизлиги ва осмонимиз мусаффолиги йўлидаги фидокорона хизматлари учун миннатдорчилик билдирди. Президентимиз раҳнамолигида муддатли ҳарбий хизматнинг бир йил этиб белгилангани, Қуролли Кучлар сафига чақирув йилига бир марта ташкил қилиниши, шартнома бўйича ҳамда сафарбарлик чақируви резервидаги ҳарбий хизматнинг жорий этилгани мамлакатимиз мудофаа салоҳиятини оширишда муҳим омил бўлаётгани таъкидланди.

Тадбир давомида "Таянчим ва суянчим, фахру ифтихоримсан, муқаддас Ватан!” шиори остида Ватан ҳимоячилари кунига бағишлаб ўтказилган спорт мусобақалари ғолибларига туман ҳокимлиги ва хомийлар томонидан эсдалик совғалари топширилди. "Манғит” ва "Аёқчи” чегара постларида хизмат бурчини намунали ўтаётган аскарларга мудофаага кўмаклашувчи "Ватанпарвар” ташкилоти туман Кенгаши томонидан эсдалик совғалари топширилди.