Она Ватан эъзозига муносиб шоир

Ўзбекистон Республикаси Президенти  Шавкат Мирзиёевнинг Қорақалпоғистонга ташрифи халқимиз ҳаётида жуда катта ижтимоий-сиёсий воқеа бўлди.

Муҳтарам Президентимиз раҳбарлигида ўтказилган видео селектор йиғилишини бутун халқимиз янги кунга умид ва ишонч билан кузатдилар.

Ҳақиқатан ҳам ушбу йиғилишда  тилга олинган ҳаётимизнинг барча соҳаларини ўз ичига олган истиқболли режалар қорақалпоғистонликларнинг кўп йиллик орзу ва умидларини ўзида мужассам этганлиги туфайли ҳар бир инсоннинг кўнглидан жой олди.

Шу юртда яшаётган зиёлилардан бири сифатида мен давлатимиз раҳбарининг маърузасида маънавий-маърифий соҳада тилга олинган режаларни эшитиб, кўнглимда ўзгача бир фахр-ифтихор туйғуларини ҳис қилдим. Айниқса китобхонлик, китоб мутолааси ҳақида Юртбошимиз олдимизга қўяётган  вазифалар кўнглимни тоғдек кўтарди.

Президентимизнинг қорақалпоқ адабиёти намоёндаларига кўрсатаётган ҳурмат-эҳтироми,  шу улуғ юртга бўлган алоҳида ғамхўрлиги қалбимизда фахр ва ифтихор туйғуларини уйғотди.

Қорақалпоғистон Республикаси мадҳияси муаллифи,  Ўзбекистон Қаҳрамони,   халқ шоири Ибройим оға Юсупов хотирасига юксак эҳтиром  кўрсатиб, унинг номидаги иқтидорли ёшлар мактаби, ижодкорлар боғи яратиш йўлида муҳтарам Президентимиз Ш.Мирзиёев раҳбарлигида бошланган эзгу ишлар шоирни яхши билган, унинг кўп суҳбатларини олган биздек замондошларига қувонч ва ғурур бағишлайди.

Ибройим Юсупов ўз халқининг ардоқли фарзанди, дарёдек жўшқин қалбли ижодкор эди. Унинг ўлмас асарлари ҳар бир юртдошимизнинг қалб тўридан жой олганига ҳеч шубҳа йўқ.

Ибройим оға билан жуда кўп суҳбатда бўлганлигим боис, унинг Ватанга, ватандошларига бўлган алоҳида ҳурмати, эътибори, дарёдек жўшқин қалби, болаларга хос беғуборлиги, ҳазиломуз суҳбатлари  хотирамда муҳрланиб қолган. Ҳозир ҳам у худди биз билан ёнма-ён яшаётгандек назаримда. Шоирнинг:

Зар қадрини билиб заргар,

Шундай замон келган кезда.

"Ижарага оз-моз ер бер”,

Деб ялинар дунё бизга.

Ёки: 

Қайта қуриш қобилияти,

Ер-онада мўл бўлади.

Сиз озгина сабр қилинг

Бу эл ҳали зўр бўлади. 

деган сатрлари назаримда  шоирнинг бугунги кунларимизни олдиндан кўриб, қилган башоратидай.

Муҳтарам Президентимизнинг шоир Ибройим Юсупов номидаги мактаб ва ижодкорлар боғи яратиш юзасидан бошлаётган эзгу ишлари юртимиздаги ҳар бир ижодкор учун кўрсатилаётган ҳурмат ва эҳтиром намунасидир.

Давлатимизни инсон омили энг юксак даражада кўтарилган шундай кунларга етказган Биринчи Президентимиз Ислом Абдуғаниевич Каримовдан  ва бугун она Ватанимиз Ўзбекистонни унинг меҳнаткаш халқини юксалиш йўлига собит қадамлик билан бошлаётган муҳтарам Юртбошимиз Шавкат Мирзиёевдан миннатдорчилик ҳисси қалбимни қувончга тўлдиради.

Хонимжон Ражабова,

Қорақалпоғистонда хизмат кўрсатган маданият ходими.