ТАҚДИР ТУҲФАСИ

Интилиш

Ҳаёт – бамисоли бир тошқин дарё. Унинг пўртанали тўлқинлари аро сузмоқ, шовуллаган шовқинларидан руҳи-жонингни авайламоқ учун инсонга кучли ирода, чидам ва бардош керак. Инсон жисмида ана шу мўъжизавий сифатлар мужассам бўлсагина ҳаёт деб аталмиш улкан дарё тўлқинларига бўй бермайди, ҳеч қачон зиддиятлар қаршисида эгилмайди, қадлари букилиб, йиқилмайди, энг муҳими, беаёв синовлар олдида  енгилмайди, ҳар гал ўзида куч топиб, олдинга интилиб яшайверади. Интилганга толе ёр, интилган албатта муродига етади. Бунинг исботини Соҳиба кўп бора кўрди, ҳис қилди.

Соҳибанинг болалиги собиқ тузум емирилиб, мустақиллик шабадалари эсаётган ҳаёт дарёсининг пўртанали тўлқинларида кечди.

Эсида: отаси раҳматлик, оддий деҳқон боласи – Эшбой Жуманиёзов тез-тез бетобланиб қолар, собиқ иттифоқнинг Чернобиль АЭСи оқибатларини тугатишда иштирок этиб, нурланган, шу сабаб, фарзандларининг кўзи олдида вақт ўтган сайин сўлиб борар, ўз ҳолатини гўдак болаларига сездирмаслик учун бутун аламини ишдан оларди. Қипчоқ колхозида оддий ишчи бўлган онаси билан отасининг  ёнида юриб, томорқа ва дала ишларига қўллари келишиб қолган Соҳиба акаси Азизбек, синглиси Шаҳло ва укаси Ўткирбек билан ота-онасининг оғирини енгил, мушкулини осон қилишга жон-жаҳди билан тиришарди. Шундай пайтларда бундайин машаққатли ҳаёт синовларини елкама-елка кўтариб яшаётган ота-онасига:

– Ҳали кўрасиз, бизлар ўқиб, ҳаммамиз сизларга кўмакчи, катта одамлар бўламиз, отамни даволатамиз, бутунлай соғайиб кетади, – дер эди ишонч билан.

Яхши ният – инсон орзуларига қанот, дейдилар. Фарзандлар мустақиллик билан бирга улғайишди. Соҳиба орзу қилганидай, ҳар бири ўз имкониятлари  даражасида "катта одам”лар бўлиб вояга етишди. Энг муҳими, эл-юртга фидойи, ўқимишли инсонлар қаторида кўпнинг ҳурматини қозонишди.

Орзулар йўлида

Қипчоқ овулидаги 11-сонли мактаб таҳсили унинг орзулари йўлидаги илк пиллапоя бўлди. У барча фанлардан "аъло”га ўқир, фанлар олимпиадаларига билимдон ўқувчиларни танлаш жараёнларида устозлари унинг қайси фан бўйича иштирок этиши юзасидан баҳслашиб қолишарди. Соҳиба учун эса кимё-биология фанлари худди мўъжизалар макони эди. Мактабдаги устозлари Норгул Ўтамуродова ва Алишер Мусаевлардан анорганик ва органик кимё сирларини қунт билан ўргангач, Соҳиба олий таълим даргоҳига ҳужжат топширишда ҳеч иккиланмай Қорақалпоқ давлат университети кимё факультетини танлади. Университетга кириш имтиҳонларидан муваффақиятли ўтган Соҳиба таълимнинг 1-босқичидаёқ устозлари назарига тушди. Талабалар ўртасидаги турли кўрик-танловлар, беллашувлар, олий ўқув юртлариаро ўтказиладиган илмий-амалий анжуманлар иштирокчисига айланди.

Таҳсил жараёнида Соҳиба кимё фанининг мўъжизакор оламидан илм дурларини терди. 2008  йилда Университетни муваффақиятли тамомлаб, ўша йили ўзи таҳсил олган 11-сонли мактабда кимё фани ўқитувчиси сифатидаги илк иш фаолиятини бошлади.

Масъулият ҳисси

– Мактабда илк дарсга кирган куним ҳеч эсимдан чиқмайди, – хотирлайди Соҳиба. – Устозим, мактабимиз директори Зулфия опа Юсупова мени ўқувчиларга таништириб бўлгач, ўзлари: "дадил бўл, мен шу ердаман”, – дегандай, синфдаги энг охирги партага бориб ўтирдилар. Ўқувчиларни мавзу билан таништирарканман, ҳаяжонданми, қўл-оёқларимда титроқ  сездим. Зулфия опа ўта масъулиятли ва қаттиққўл устоз. Ўша лаҳзаларда у киши ўзини менинг ҳаракатларимга жиддий эътибор бермагандай тутиб, ниманидир ёзиш билан банд эдилар-у, лекин бутун диққат-эътибори дарсда эди. Дарс тугагач, менга  йўл қўйган камчиликларим ҳақида гапириб, йўл-йўриқ кўрсатдилар.

Соҳиба иш жараёнида устози Алишер Мусаевдан кўп нарсаларни ўрганди. Ўқувчиларнинг қобилиятларини баҳолаш, кимё фанига алоҳида қобилиятли болалар билан дарсда ва дарсдан ташқари машғулотлар ўтказиш, билимлар беллашувлари ва фан олимпиадаларига ўқувчиларни тайёрлашда дарсдан ташқари қўшимча адабиётлардан, замонавий ахборот технологияларидан фойдаланиш, лаборатория машғулотларини  ўтказишда ўқувчиларнинг тез ва осон ўзлаштиришини таъминлаш мақсадида маҳаллий  омиллардан фойдаланиш борасида устози Алишер Мусаев билан доимий ҳамкорликда, ҳамфикр иш юритишга интилди.

2015-2016 ўқув йилида унинг дарс ўтиш услуби Қорақалпоғистон Республикаси миқёсида оммалаштирилди. Айниқса, "Дарсдан ташқари машғулотлар” гуруҳида дарс ўтиш услуби кўпчиликка манзур бўлди. Унинг ўқувчиларидан икки нафари Тошкент Давлат педиатрия институтининг Нукус филиалига, яна уч нафар ўқувчиси Тошкент Давлат Аграр Университетининг Нукус филиалига давлат гранти асосида ўқишга қабул қилиндилар.

Тақдир туҳфаси

Соҳиба Жуманиёзова. Оддийгина деҳқон оиласида туғилиб, ота-онасининг мушкулини осон қилишга ҳар лаҳзада  интилиб яшаган, бу интилишлари туфайли толеига ёшларга устозлик қилишдек шарафли умр йўли ёзилган оддий қишлоқ қизи. Синовларга тўла болалигида унга отаси (Аллоҳ раҳмат қилсин) Эшбой оға қийинчиликларга чидаш – бахтли келажакка етишиш эканлигини англатган бўлса, олийгоҳда устозлари, иш фаолиятида эса устози Зулфия Юсупова унга ҳақиқий матонат ва фидойилик тимсоли сифатида ҳаёт илмидан сабоқ берди. Оилада эса умр йўлдоши Учқунжон Авазбоев, қайнотаси Нурулла ота Авазбоев, қайнонаси Бозоргул эна Собировалар унга доимий маслаҳатгўй. Жажжигина ўғилчаси Шералижоннинг  қувончи, севимли ҳамкасбларининг эътибор ва ишончи, шогирдларининг: "Устоз!”, – дея талпиниб туришлари – Соҳиба Жуманиёзова учун тақдирнинг энг олий туҳфаси! Ахир ён-атрофингдаги инсонларнинг меҳр-муҳаббатини ҳис қилиб яшашдан ҳам улуғроқ бахт борми, инсон учун!

Биз баҳорнинг илк кунларида, байрамлар фасли бошланаётган дамларда Соҳибахон Жуманиёзованинг иш фаолияти билан боғлиқ орзулари, тажрибаларига ошно бўлиб, ёш бўлса-да, ўз касби туфайли эл-юрт, ҳамкасблари эътиборини қозонишга улгурган фидойи муаллимага дилда ҳавас билан янада юксак муваффақиятлар тиладик.

Робия ЙЎЛДОШЕВА,

журналист.