Тўлқинлик ҳарбий хизматчининг отаси тақдирланди
Ўзбекистон Республикаси Қуролли Кучлари сафида хизмат қилаётган, ўзининг жанговар ва маънавий-маърифий тайёргарлиги билан сафдошларига ўрнак бўлаётган ҳарбий хизматчиларни рағбатлантириш, уларнинг оила аъзоларига яқиндан миннатдорчилик билдириш мақсадида жойларда кўплаб тадбирлар ташкил этилмоқда. Ана шундай маънавий-маърифий тадбирлардан бири Амударё туманининг Тўлқин овулида ҳам ташкил қилинди.
Бир гуруҳ масъуллар айни вақтда ўз хизмат бурчини шараф билан бажараётган Ўзбекистон Республикаси Мудофаа вазирлиги Марказий алоқа узели ҳарбий хизматчиси Халилаев Ҳикмат Уразбаевичнинг хонадонига ташриф буюришди. Ҳикмат Халилаев ўз хизмати давомида мунтазам равишда юқори натижаларга эришиб, жанговар машғулотлардаги чаққонлиги ва маънавий-маърифий тайёргарлик борасидаги юксак салоҳияти билан қўмондонлик эътирофига сазовор бўлди. Шу муносабат билан Ўзбекистон Республикаси Мудофаа вазирлиги Марказий алоқа узели бошлиғи томонидан Ҳикматнинг отасига махсус ташаккурнома хати ва кўкрак нишони юборилди.
Тўлқин овул фуқаролар йиғини раиси Фахриддин Жумабеков, 33-сонли мактаб вакили, лейтенант Нодир Ҳайитбоев, 32-сонли мактабдан Қутлимурод Гулмонов ва 80-мактаб вакили, заҳирадаги подполковник Илҳом Ердашевлар Мудофаа вазирлиги қўмондонлиги номидан юборилган, мард ва жасур ўғлонни тарбиялагани учун давлатнинг миннатдорчилик рамзи бўлган "Ватан ҳимоячисининг отасига" деб номланган кўкрак нишони ва махсус гувоҳномани ҳарбий хизматчи Ҳикмат Халилаевнинг отаси Ўразбай ота Халилаевга катта ҳурмат ва эҳтиром билан тантанали равишда топширдилар.
Бундай рағбатлантиришларнинг моҳияти шундаки, улар фақатгина бир оиланинг қувончи бўлиб қолмай, балки бутун жамият учун катта тарбиявий мактаб вазифасини ўтайди. Ватан ҳимоясидек муқаддас бурчни адо этаётган йигитларнинг ота-оналарига кўрсатилаётган бундай юксак эҳтиром ўсиб келаётган ёш авлод қалбида мардлик, жасорат ва ўз халқига садоқат туйғуларини янада кучайтиришга хизмат қилади. Армия ва халқ бирдамлиги мустаҳкамланган жойда эса тинчлик ва тараққиёт барқарор бўлади.
Тўлқин овулида бўлиб ўтган ушбу тадбир ҳам юртимиздаги ҳар бир ҳарбий хизматчининг оиласи давлат ҳимоясида ва эътиборида эканлигини, уларнинг машаққатли ҳамда шарафли хизматлари доимо муносиб қадрланишини яна бир бор амалда исботлади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
