Toʻlqinlik harbiy xizmatchining otasi taqdirlandi
Oʻzbekiston Respublikasi Qurolli Kuchlari safida xizmat qilayotgan, oʻzining jangovar va maʼnaviy-maʼrifiy tayyorgarligi bilan safdoshlariga oʻrnak boʻlayotgan harbiy xizmatchilarni ragʻbatlantirish, ularning oila aʼzolariga yaqindan minnatdorchilik bildirish maqsadida joylarda koʻplab tadbirlar tashkil etilmoqda. Ana shunday maʼnaviy-maʼrifiy tadbirlardan biri Amudaryo tumanining Toʻlqin ovulida ham tashkil qilindi.
Bir guruh masʼullar ayni vaqtda oʻz xizmat burchini sharaf bilan bajarayotgan Oʻzbekiston Respublikasi Mudofaa vazirligi Markaziy aloqa uzeli harbiy xizmatchisi Xalilayev Hikmat Urazbayevichning xonadoniga tashrif buyurishdi. Hikmat Xalilayev oʻz xizmati davomida muntazam ravishda yuqori natijalarga erishib, jangovar mashgʻulotlardagi chaqqonligi va maʼnaviy-maʼrifiy tayyorgarlik borasidagi yuksak salohiyati bilan qoʻmondonlik eʼtirofiga sazovor boʻldi. Shu munosabat bilan Oʻzbekiston Respublikasi Mudofaa vazirligi Markaziy aloqa uzeli boshligʻi tomonidan Hikmatning otasiga maxsus tashakkurnoma xati va koʻkrak nishoni yuborildi.
Toʻlqin ovul fuqarolar yigʻini raisi Faxriddin Jumabekov, 33-sonli maktab vakili, leytenant Nodir Hayitboyev, 32-sonli maktabdan Qutlimurod Gulmonov va 80-maktab vakili, zahiradagi podpolkovnik Ilhom Yerdashevlar Mudofaa vazirligi qoʻmondonligi nomidan yuborilgan, mard va jasur oʻgʻlonni tarbiyalagani uchun davlatning minnatdorchilik ramzi boʻlgan "Vatan himoyachisining otasiga" deb nomlangan koʻkrak nishoni va maxsus guvohnomani harbiy xizmatchi Hikmat Xalilayevning otasi Oʻrazbay ota Xalilayevga katta hurmat va ehtirom bilan tantanali ravishda topshirdilar.
Bunday ragʻbatlantirishlarning mohiyati shundaki, ular faqatgina bir oilaning quvonchi boʻlib qolmay, balki butun jamiyat uchun katta tarbiyaviy maktab vazifasini oʻtaydi. Vatan himoyasidek muqaddas burchni ado etayotgan yigitlarning ota-onalariga koʻrsatilayotgan bunday yuksak ehtirom oʻsib kelayotgan yosh avlod qalbida mardlik, jasorat va oʻz xalqiga sadoqat tuygʻularini yanada kuchaytirishga xizmat qiladi. Armiya va xalq birdamligi mustahkamlangan joyda esa tinchlik va taraqqiyot barqaror boʻladi.
Toʻlqin ovulida boʻlib oʻtgan ushbu tadbir ham yurtimizdagi har bir harbiy xizmatchining oilasi davlat himoyasida va eʼtiborida ekanligini, ularning mashaqqatli hamda sharafli xizmatlari doimo munosib qadrlanishini yana bir bor amalda isbotladi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
