МУРОЖААТЛАРГА ЭЪТИБОР ИНСОН ОМИЛИГА ЭЪТИБОРДИР
Мамлакатимиз Президенти Ш.Мирзиёевнинг "Ўзбекистон Республикасини янада ривожлантириш бўйича Ҳаракатлар стратегияси тўғрисида”ги Фармонига мувофиқ ишлаб чиқилган, шу йилнинг 12 сентябридан кучга кирган "Жисмоний ва юридик шахсларнинг мурожаатлари тўғрисида”ги Ўзбекистон Республикаси Қонунига ўзгартиш ва қўшимчалар киритиш ҳақида”ги Қонун мурожаатлар билан ишлаш тизимини янада яхшилашга хизмат қилиши билан аҳамиятлидир.
Янги таҳрирдаги Қонуннинг ишлаб чиқилиши ва қабул қилинишидаги асосий ўзгаришлардан бири унинг амал қилиши давлат иштирокидаги ташкилотларга ҳам татбиқ этилишидир. Аввалги Қонунда давлат органларига мурожаат қилиш кафолатлари акс этган бўлса, эндиликда бунинг доираси кенгайтирилди. Яъни, энди давлат улуши мавжуд бўлган тижорат ташкилотларига мурожаатлар ҳам Қонун ҳимоясида бўлади.
Қонунга киритилган янгиликлардан бири – мурожаатларни кўриб чиқишнинг асосий принциплари белгилаб қўйилганидир. Яъни, мурожаатларни ўз вақтида ва тўлиқ кўриб чиқиш, мурожаатларга нисбатан талабларнинг бир хиллиги, мурожаатларни кўриб чиқишда бюрократизм ва сансалорликка йўл қўйилмаслиги каби махсус принциплар билан тўлдирилди. Шунингдек, мурожаатларни "тўлиқ кўриб чиқиш” деган алоҳида раҳбарий талаб киритилди.
Бу жисмоний ва юридик шахсларнинг битта мурожаатида учраши мумкин бўлган бир-неча масалани ҳам тўлиқ кўриб чиқиш кафолатларини мустаҳкамлади.
Янги таҳрирдаги Қонуннинг 2-бобида Ўзбекистон Республикаси Президентининг Халқ қабулхоналари ва Виртуал қабулхонасининг асосий вазифалари, ҳуқуқ ва мажбуриятлари, шунингдек давлат органларининг, ташкилотларнинг ва улар мансабдор шахсларининг виртуал қабулхоналарини ташкил этиш тартиби ўз аксини топган.
Эндиликда электрон мурожаат учун электрон рақамли имзо талаб қилинмайди. Шунингдек, Қонунда оғзаки мурожаатлар реал вақт режимида ахборот-коммуникация технологияларидан фойдаланган ҳолда, жумладан, давлат органларининг, ташкилотларнинг ишонч, тезкор алоқа телефонлари орқали ҳам берилиши мумкинлиги белгилаб қўйилди.
Қонунга киритилган "Мурожаатлар бўйича иш юритиш”, деб номланган янги моддада давлат органи, ташкилот ёки уларнинг раҳбарларига келиб тушган мурожаат ўша куннинг ўзида, иш вақти тугаганидан кейин келиб тушган тақдирда эса кейинги иш куни рўйхатдан ўтказилиши кераклиги белгиланди.
Мурожатларни рўйхатдан ўтказишни рад этишга йўл қўйилмайди.
Ҳар бир мурожаат орқасида инсон, тақдири, унинг дард-у ташвишлари бор. Шу боисдан ҳам мурожаатларга эътибор – инсон омилига эътибордир.
Мурожаатларга муносабат тубдан ўзгариб, эътибор тобора кучаяётгани халқимизнинг давлат органлари ва мансабдор шахслар фуқаролар олдида, жамият олдида масъул эканлигини, халқ манфаати устуворлигини ўз ҳаётларида яққол ҳис қилишларига, пировардида, давлатимиздан миннатдор бўлиб яшашларига имконият яратмоқда.
Рустам РЎЗМЕТОВ,
халқ депутатлари туман Кенгаши раисининг ўринбосари.
(Фото - http://xushnudbek.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
