ДЕПУТАТ: ҲУНАРМАНДЛАР ҚЎЛЛАБ-ҚУВВАТЛАНАДИ
Истиқлол йилларида мамлакатимизда миллий ҳунармандчиликни ривожлантиришга, қадимий анъаналарни қайта тиклашга алоҳида эътибор қаратилмоқда ҳамда бу борадаги тегишли қонун ҳужжатлари асосида ҳунармандлар фаолияти кенгайтирилишига катта имконият яратилди. Айниқса, халқ амалий санъатининг кўҳна турларини тиклаш ва ривожлантириш борасида кўплаб ишлар амалга оширилди.
Бу йўналишдаги ишлар изчил давом эттирилиб, яқинда Ўзбекистон Республикаси Президентининг “Ҳунармандчиликни янада ривожлантириш ва ҳунармандларни ҳар томонлама қўллаб-қувватлаш чора-тадбирлари тўғрисида”ги Фармони қабул қилинди. Халқимизнинг бой маданий мероси ва тарихий анъаналарини сақлаб қолиш, ҳунармандчилик билан шуғулланишга ёшлар ва аёлларни, ишсиз аҳолини жалб қилиб, уларни қўллаб-қувватлаш каби мақсадлар кўзланган мазкур фармонда ҳунармандларга ўз фаолиятларини амалга оширишлари учун зарур бўлган чора-тадбирлар белгиланди.
Фармонда ҳунармандларга ер майдонлари ва бинолар ажратиш, муҳандислик-коммуникация тармоқларига улаш, имтиёзли кредитлар бериш, ҳунармандчилик маҳсулотларини экспорт қилиш ҳамда республикамизнинг туман ва шаҳарларида ҳунармандчиликни ривожлантириш марказларини ташкил этиш ва “Устоз-шогирд” мактаблари фаолиятини такомиллаштириш ишлари белгиланди. “Ҳунарманд” уюшмаси сафларига ҳунармандларнинг кенг оммасини қамраб олиш, ҳунармандчиликнинг кичик бизнес ва якка тадбиркорлик ривожланишининг кучли мустақил йўналишига айланишига йўл бермаётган уюшманинг чекланган салоҳияти билан боғлиқ муаммоларни ҳал қилиш бўйича бир қатор чора-тадбирлар ҳам кўрсатилган.
Шаҳар ва туманларда ҳунармандчиликни ривожлантириш марказларини яратиш назарда тутилган. Фармоннинг энг муҳим жиҳати шундан иборатки, унда ҳунармандчиликни ривожлантириш соҳасида мамлакатимизда қабул қилинган қонунчилик ҳужжатлари тажрибасида илк бор ҳунармандчиликни ривожлантириш бўйича манзилли дастурлар тасдиқланиб, янги иш ўринлари яратилишини кўзда тутувчи лойиҳалар амалга оширилади.
Ҳунармандчилик билан шуғулланувчиларни рағбатлантириш оилалар турмуш даражасининг янада яхшиланишига олиб келади. Улар учун барча шарт-шароитлар, қулайликлар яратилиши ҳунармандчилик фаолиятлари самарадорлигини оширади. Бу эса партиямиз устав фаолиятининг муҳим йўналиши бўлмиш янги иш ўринлари яратилишига ҳамда халқимизнинг бой маданий мероси ва тарихий анъаналарини тўлиқ сақлаб қолишга, уларни янада кўпайтиришга хизмат қилади.
Мақсуд САЪДУЛЛАЕВ, ЎзХДП Амударё туман Кенгаши раиси, халқ депутатлари туман Кенгаши депутати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
