ЮКСАК ХИРМОН - ҲАМЖИҲАТЛИК САМАРАСИ

Туманимиз пахтакорларининг жорий йилимиз учун белгиланган режани адо этганликлари тўғрисидаги хушхабар шу элда истиқомат қилувчи ҳаммани ҳам қувонтириб юборди. Бу пахта – асосий бойлигимиз эканлигидан далолат. Қолаверса, шу туманда яшаб, меҳнат қилиб юрган одамнинг пахтачиликка алоқаси бўлмагани кам, десак янглишмаган бўламиз.

Қуйида мухбиримиз Ойгул Ражабова ёзиб олган қишлоқ хўжалик корхоналарига хизмат кўрсатувчи ташкилотлар раҳбарларининг шу хусусдаги сўзларини ўқийсиз.

Ҳакимбой СоАТов, Ўсимликларни ҳимоя қилиш отряди етакчи мутахассиси: - Қишлоқ хўжалиги экинлари, хусусан, пахта ҳосилдорлигини оширишда далаларга биологик ишлов беришнинг аҳамияти катта.

Жорий йил бошида биолабораторияларимиз ва туманимиз фермер  хўжаликлари ўртасида пахта майдонларига биомаҳсулотлар билан зараркунанда, касаллик ва бегона ўтларга қарши курашишда ишлов бериш бўйича сервис хизматлари кўрсатиш юзасидан 389,3 млн. сўмлик шартномалар тузилди. Йил мобайнида режага мувофиқ ўз муддатларида далаларга сифатли биологик ишлов берилди.

Трихограмма ишлаб чиқариш режаси 121, олтинкўз ишлаб чиқариш режаси 118, бракон ишлаб чиқариш режаси эса 121 фоизга бажарилди.

Шунингдек, турли касалликлар ва зараркунандаларнинг кўпайишининг олдини олиш мақсадида экин майдонлари атрофига, уватларга, ариқ-зовурлар четларига ҳам биомаҳсулотлар тарқатилди.

Ўсимликларга биологик ишлов бериш зараркунанда ва касалликларга курашда кимёвий ишлов беришдан арзон ва табиатга зарарсизлиги билан афзалдир. Шу боисдан ҳам кейинги йилларда биолабораториялар фаолиятига улкан эътибор қаратилиб, моддий базаси мустаҳкамланмоқда.

Экин майдонларига биологик ишлов беришда қулайлик яратиш учун биолабораторияларимиз лизинг асосида 16 та мотоколяскалар билан таъминланди. Тошкент биоорганик институтидан шартнома асосида жорий йилда 10000 дона феромон тутқичлар, клей, капсула ва вкладишлар олиб келиниб, ҳар икки гектарга биттадан қўйилди.

Туманда қишлоқ хўжалик экинларини зараркунанда ва касалликлардан ҳимоя қилишда 160 нафар дала назоратчиси ва 29 нафар энтомологлар фаолият юритмоқда.

Махсет Матмуродов,"Амударё - Агротехсервис МТП” МЧЖ раиси: - Пахтачиликда юқори ҳосилдорликка эришишда ҳар бир тадбирнинг меъёрида олиб борилиши муҳим аҳамиятга эга.

Шу боисданда бизнинг қишлоқ хўжалик корхоналарига хизмат кўрсатувчи "Амударё-Агротехсервис МТП” масъулияти чекланган жамиятимизда мавжуд техникалар сифатли таъмирланиб, кузги – баҳорги суримга шай қилиб қўйилади ва ерлар тобида ҳайдалади.

Корхонамизда жами 23 та, 8 та "Магнум” 8940 русумли, 8 та МХ-140 русумли, 1 та МХ-135 русумли ва 6 та ВТ-150 русумли сурим тракторлари мавжуд бўлиб, баҳорги экиш даврида ва кузги шудгорлашда самарали фойдаланмоқдамиз.

Мавсум ишларида суръат юқори бўлиши учун 34 нафар тракторчиларимиз бор ва техникаларимизни икки сменада ишлатамиз.

Техника деҳқоннинг қўл-қаноти, деган ибора бежиз айтилмаган. Бизнинг тракторчиларимиз ерларни сифатли ҳайдаб, экин майдонларининг ҳосилдорлиги юқори бўлишига, кўзланган марранинг забт этилишига ўзларининг муносиб ҳиссаларини қўшишмоқда.

Туманимиз пахтакорларининг эришган юксак муваффақияти бизнинг жамоамиз аъзоларини ҳам қувончга белади. Чунки пахтачилик - асосий деҳқончилигимиз, бойлигимиз. Йил ўн икки ой далада  меҳнат қилиб, эл ризқини яратаётган деҳқонларимизга мадад бўлаётганимиздан қувонамиз.

Улуғбек Худойберганов, "ҚР қишлоқхўжаликкимё” ҳудудий акциядорлик жамияти туман филиалининг 43-шохобчаси мудири: - Қишлоқ хўжалик корхоналарига хизмат кўрсатувчи бизнинг филиалимиз меҳнаткашларининг ҳам бунёд этилган юксак хирмонда муносиб улушлари борлигидан фахрланамиз.

Хусусан, 43-сонли шохобчамиз ишчи хизматчилари Бобур номидаги овулда фаолият юритаётган 15 та фермер хўжаликларига шартнома асосида белгиланган миқдордаги минерал ўғитларни етказиб беришга эришдилар. Натижада ғўза ниҳоллари вегитация даврида бир марта культивация, яъни қатор ораларини юмшатишда озиқлантириш билан бирга олиб борилди. 3 марта карбамид билан суспензия усулида озиқлантирилди.

Кузги йиғим-терим олдидан ғўзаларни дефолиация қилишнинг ҳам аҳамияти улкан. Бу тадбир етилган кўсакларнинг тезроқ очилишини, баргларининг тўкилишини таъминлайди.

Сентябрь ойи бошида барча гектарларда дефолиация сифатли бажарилди.

Рўзмат ЮСУПОВ, Манғит-Назархон ирригация тизими бошқармаси бошлиғи ўринбосари: - Туманимизда бу йил белгиланган пахта хомашёсини етиштириш мақсадида ғўзани суғориш жадвали фермер хўжаликлари кесимида ишлаб чиқилиб, жойларда ижроси таъминланди, далаларда намлик сақланишини узайтириш мақсадида ҳар 3 гектар майдонга биттадан, жами 5350 та шарбат хандаклари қазилди.

Экинларни суғоришда сувдан самарали фойдаланиш мақсадида ва суғориш ишларини яхши ташкил қилиш учун 60 та отряд тузилди. Суғориш ишларига фермер хўжаликлари томонидан 3210 нафар сувчи, сув хўжалиги ташкилотлари томонидан 261 нафар ходим жалб қилинди.

Бошқармамиз томонидан шу кунгача 33,6 км. узунликдаги каналлар қазиб тозаланди, режадаги 5 дона ўрнига 7 дона гидротехник иншоот, 6 дона сув ўлчаш постлари таъмирланди. 230,0 км. ўрнига 288,4 км. ички  хўжалик суғориш тармоқлари тозаланди, ички хўжалик суғориш тармоқларидаги 20 дона гидротехник иншоот, 88 дона сув ўлчаш постлари таъмирланиб, сув сатҳини кўрсатувчи рейкалар ўрнатилди.

Хўжаликлараро каналларни тозалаш ишларига 3 дона экскаватор, 2 дона бульдозер ва 2 дона земнасос, ички хўжалик суғориш тармоқларини тозалаш ишларига 5 дона экскаватор ва 72 нафар ишчи жалб қилиниб, уларнинг унумли ишлашларига эришмоқдамиз.

Шукурулло Юсупов, туман мелиоратив тизими бошлиғи: - Ўзбекистон Республикаси Президентининг 2013 йил 19 апрелдаги "2013-2017 йилларда суғориладиган ерларнинг мелиоратив ҳолатини янада яхшилаш ва сув ресурсларидан оқилона фойдаланиш чора-тадбирлари тўғрисида"ги 1958-сонли қарорининг ижросини таъминлаш юзасидан жамоамиз аъзолари бир ота-она фарзандларидай ҳамжиҳатликда меҳнат қилмоқдалар.

Туманимизда 39584 гектар суғориладиган майдонлар бўлиб, бу майдонларда жами 1578,4 км. коллектор-дренаж тармоқлари мавжуд. Шундан 290,8 км. хўжаликлараро коллекторлар, 1287,6 кмички хўжалик коллекторлари ҳисобланади.

Режага мувофиқ барча тармоқларда таъмирлаш ва тиклаш, реконструкция қилиш ишлари ўз муддатларида олиб борилаётганлиги сабабли экин майдонларимизнинг мелиоратив ҳолати йил сайин яхшиланиб бораяпти. Бу эса ўз навбатида ерларнинг ҳосилдорлиги ошишига ва кўзланган режадаги ҳосилни ундириб олишга замин яратади.

Зарифбой ХЎЖАМУРОДОВ, "Чойкўл” овулидаги 5-сонли фермерларга ёнилғи тарқатиш шохобчаси бош оператори: - Бизнинг шохобчамиз ҳудудимиздаги 17 фермер хўжаликларига хизмат кўрсатади. Мазкур хўжаликларда 1135 гектар пахта майдони мавжуд. Ерларни экишга тайёрлашдан тортиб то ҳосили йиғиштириб олингунча дала ишларида қатнашадиган техникаларга ёнилғи-мойлаш материалларини ўз вақтида етказиб бериб турдик. Ҳар бир гектар пахта учун йил мобайнида 248 килограмм ёнилғи сарфланиши кўзда тутилган бўлса, буларни ўз вақтида ғамлаб, техникаларнинг тўхтовсиз ишлашига эришдик. Пахтачилик учун 281,5 тонна ёнилғи  етказиб беришимиз керак бўлса, шу кунгача 259 тоннаси сарфланди.