ФЕРМЕР – БИЗНИНГ БОШ ТАЯНЧИМИЗ

Туманимиздаги асосий ва етакчи тармоқ - пахтачилик ҳисобланади. Пахтачиликни ривожлантириш, уни саноат даражасига етказиш давлат аҳамиятига эга бўлган муҳим масала, долзарб вазифадир. Туманимизда бу борада кўламдор амалий ишлар қилинмоқда, соҳада давлат ислоҳотлари давом эттирилмоқда, фермер хўжаликларининг ташкилий жиҳатлари ва бошқариш механизми такомиллаштирилмоқда. Бу борадаги муҳтарам Президентимиз И.А.Каримовнинг Фармон ва Қарорлари изчиллик билан амалга оширилмоқда.

Туманимизда фаолият кўрсатаётган пахтачиликка ихтисослашган 261 та фермер хўжаликларида жорий 2013 йилда жами 16050 гектар ерга пахта экилиб, вегитация даврида ғўзалар агротехника қоидаларига мувофиқ парвариш қилинди, ўз вақтида агротехник тадбирлар амалга оширилиб, меъёрида озиқлантирилди ва шарбат усулида суғорилди. Натижада кузга келиб пахтадан мўл ҳосил етиштирилди. Бу албатта фидойи пахтакор деҳқонларимиз ва механизаторларимизнинг пешона терлари, пахта майдонларида бутун ёз бўйи қизғин меҳнат қилганликлари туфайлидир.

Фақат бир-икки соҳа, яъни пахтачилик, ғаллачилик ва пиллачилик билангина шуғулланиб қолмасдан боғдорчилик, балиқчилик, чорвачилик, паррандачилик ва асаларичилик билан, шунингдек, маданий-маиший сервис хизмат турларини кўпайтириш, тадбиркор кишиларни қўллаб-қувватлаш фермерлар зиммасига юклатилган вазифалардир. Туманимизда кўп тармоқли фермер хўжаликларига айлантирилган фермер хўжаликлари 197 тани ташкил этади. Шиддат билан ривожланиш давом этаётган ҳозирги даврда фермер хўжаликларини кўп тармоқли фермер хўжаликларига айлантириш зарурати кучаймоқда. Шу боис фермер хўжаликларини ташкилий жиҳатдан такомиллаштириш, фаолият доирасини кенгайтириш кун тартибидаги кечиктириб бўлмайдиган муҳим ҳаётий масаладир. Ўз фаолиятларини яхши йўлга қўйган кўп тармоқли фермер хўжаликларидан "Амударё соҳили”, "Амирхон”, "Амударё-Панашам”, "Ҳайитбой Отахон”, "Юсуфхўжа”, "Полвонов Баҳром”, "Турсунбоева Умида”, "Жумабоев Жангабой”, "Нурулла Раҳимов”, "Ергулобод”, "Жумабоев Собир” ва "Уста Оллоёр” фермер хўжаликлари пахтачилик, ғаллачилик, пиллачилик, чорвачилик, паррандачилик, балиқчилик ва асаларичиликни ривожлантиришдан ташқари маданий-маиший ва техникавий сервис хизмат турларини ҳам йўлга қўймоқдалар. Бу билан қишлоқ хўжалик маҳсулотлари ишлаб чиқаришнинг кўпайиши, хизмат турларининг ортиши ҳисобига аҳоли бандлиги муваффақиятли ҳал қилинмоқда. Келгусида ҳам фермер хўжаликларини талаб даражасидаги кўп тармоқли фермер хўжаликларига айлантириш, бу соҳани янада такомиллаштириш ишлари давом эттирилади.

Айни кунда туманимизда пахта йиғим-терими ишлари қизғин давом эттирилмоқда. Фермер хўжаликларининг ҳар бирида биттадан, жами 261 та йиғим-терим отрядлари бошлиқлари йиғим-терим ишларини уюшқоқлик билан ташкил этиб, терим суръатининг ошишини таъминламоқдалар. Шу билан бирга улар теримчиларнинг унумли меҳнат қилишлари учун дала бошида барча қулай шарт-шароитлар яратилишига масъулдирлар. Йиғим-терим даврида фермер хўжаликларининг тижорат банклари билан муносабатлари янада фаоллашиб, теримчиларнинг меҳнат ҳақларини ўз вақтида дала бошига етказиб бериш мунтазам равишда ташкил этилмоқда. Масалан, туманимиздаги энг етакчи тижорат банки ҳисобланган "Агробанк”нинг туман бўлими ходимлари айни кунда фаол ишлаб, 95 та фермер хўжаликларига ва Амударё мелиорация ва сув хўжалиги касб-ҳунар коллежига намунали молиявий хизмат кўрсатмоқда. Бу банк ходимлари мазкур 95 та фермер хўжаликларидаги теримчиларнинг меҳнат ҳақлари учун шу кунгача 2 миллиард сўмга яқин пул маблағларини дала бошига етказиб теримчиларга тарқатиб берди. "Микрокредитбанк” "Халқ банки” ва "Миллий банк” туман бўлимлари ходимлари ҳам теримчиларнинг меҳнат ҳақларини ўз вақтида етказиб беришнинг уддасидан чиқмоқдалар. Теримчилар меҳнатини муносиб баҳолаш эса улар кучига куч, ғайратига ғайрат қўшиб, терим суръатининг ошишини таъминламоқда.

Пахтазорларимизда ҳосил ҳали кўп. Теримчилар йиғим-теримда фаол қатнашиб, навбатдаги юксак марра-43 минг тонналик "оқ олтин” хирмонини бунёд этиш учун ўзларининг бутун куч-ғайратларини сарфламоқдалар. Пахта йиғим-терими қизғин давом этмоқда.

Отахон ҚУРБОНИЁЗОВ,

туман фермерлар Кенгаши раиси.