Оила қуришда шошма-шошарлик керак эмас
6 июль куни Куюк кўпир овул фуқаролар йиғинида овул фуқаролари иштирокида йиғилиш ўтказилиб, унда “Тўйларни тартибли равишда ўтказиш, янги оилаларни ташкил этишда ёшларнинг белгиланган қоидаларга амал қилишларига эътиборни кучайтириш – маҳалла аҳолисининг муҳим вазифаси” мавзусидаги масала муҳокама этилди.
Йиғилиш кун тартибидаги масала юзасидан ОФЙ раиси Рашид Ерлапасов сўзга чиқиб, овулда ўтказилаётган тўйларнинг кўпчилик қисми ҳалиям ортиқча дабдаба ва исрофгарчиликлар билан ўтаётгани ҳақида гапириб, тўйларни ўтказишни тартибга келтириш бугунги куннинг долзарб вазифаси эканлигини таъкидлади. Шунингдек, овул оқсоқоли ўз сўзида кўпчилик ёшларимизнинг оила қуришда кўпинча шошма-шошарликка, эътиборсизликка йўл қўйишаётгани, шу сабабдан ҳам овулда никоҳдан ўтмай яшаётган ноқонуний оилаларнинг ҳам учраётгани ҳақида афсусланиб гапирди.
Шундан сўнг ОФЙдаги хотин-қизлар билан ишлаш ва оилаларда маънавият ахлоқий қадрятларни мустаҳкамлаш бўйича мутахассис Т. Каримова сўзга чиқиб, овулдаги таълим муассасаларида ва уюшмаган ёшлар ўртасида оила ва никоҳ ҳақида кўпроқ суҳбатлар ўтказиш лозимлиги ҳақида гапирди.
ИИБ участка профилактика нозири А. Аллаберганов ёш оилаларнинг мустаҳкамлигини, тинчлигини таъминлаш, ёшлар ўртасида жиноятчиликнинг, тўй-маракаларда ҳар хил тартибсизликларнинг олдини олиш юзасидан ўз фикрларини билдирди.
Шунингдек, йиғилишда 19-сонли мактаб директори Х. Даулетбоев ҳам сўзга чиқиб, ҳозирги кунда овулда ўтказилаётган тўйлар ҳақида ўз фикрларини билдирди.
– Кўпчилик тўйларимизда спиртли ичимликлар ҳаддан ташқари кўп ичилаётганлиги сабабли ҳар хил тартибсизликлар содир этилаяпти. Шу сабабдан ҳам тўйларимизни спиртли ичимликларсиз ўтказишимиз керак. Бундай ҳолатлар айниқса ёшларимиз тарбиясига салбий таъсир кўрсатиши шубҳасиз.
Мен ёшлар тарбиясини яхши йўлга қўйишда, ёшларни оила қуришга тайёрлашда, ёшларимизнинг ҳар хил оқимларга қўшилиб кетишининг олдини олишда ОФЙ, мактаб ва ички ишлар бўлими ҳамкорлигини йўлга қўйиш лозим, деб ҳисоблайман.
Йиғилишда муҳокама этилган масала юзасидан тегишли қарор қабул қилинди.
А. Жуманиёзов.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
