Oila qurishda shoshma-shosharlik kerak emas

6-iyul kuni Kuyuk koʻpir ovul fuqarolar yigʻinida ovul fuqarolari ishtirokida yigʻilish oʻtkazilib, unda “Toʻylarni tartibli ravishda oʻtkazish, yangi oilalarni tashkil etishda yoshlarning belgilangan qoidalarga amal qilishlariga eʼtiborni kuchaytirish – mahalla aholisining muhim vazifasi” mavzusidagi masala muhokama etildi.

Yigʻilish kun tartibidagi masala yuzasidan OFY raisi Rashid Yerlapasov soʻzga chiqib, ovulda oʻtkazilayotgan toʻylarning koʻpchilik qismi haliyam ortiqcha dabdaba va isrofgarchiliklar bilan oʻtayotgani haqida gapirib, toʻylarni oʻtkazishni tartibga keltirish bugungi kunning dolzarb vazifasi ekanligini taʼkidladi. Shuningdek, ovul oqsoqoli oʻz soʻzida koʻpchilik yoshlarimizning oila qurishda koʻpincha shoshma-shosharlikka, eʼtiborsizlikka yoʻl qoʻyishayotgani, shu sababdan ham ovulda nikohdan oʻtmay yashayotgan noqonuniy oilalarning ham uchrayotgani haqida afsuslanib gapirdi.

Shundan soʻng OFYdagi xotin-qizlar bilan ishlash va oilalarda maʼnaviyat axloqiy qadryatlarni mustahkamlash boʻyicha mutaxassis T. Karimova soʻzga chiqib, ovuldagi taʼlim muassasalarida va uyushmagan yoshlar oʻrtasida oila va nikoh haqida koʻproq suhbatlar oʻtkazish lozimligi haqida gapirdi.

IIB uchastka profilaktika noziri A. Allaberganov yosh oilalarning mustahkamligini, tinchligini taʼminlash, yoshlar oʻrtasida jinoyatchilikning, toʻy-marakalarda har xil tartibsizliklarning oldini olish yuzasidan oʻz fikrlarini bildirdi.

Shuningdek, yigʻilishda 19-sonli maktab direktori X. Dauletboyev ham soʻzga chiqib, hozirgi kunda ovulda oʻtkazilayotgan toʻylar haqida oʻz fikrlarini bildirdi.

– Koʻpchilik toʻylarimizda spirtli ichimliklar haddan tashqari koʻp ichilayotganligi sababli har xil tartibsizliklar sodir etilayapti. Shu sababdan ham toʻylarimizni spirtli ichimliklarsiz oʻtkazishimiz kerak. Bunday holatlar ayniqsa yoshlarimiz tarbiyasiga salbiy taʼsir koʻrsatishi shubhasiz.

Men yoshlar tarbiyasini yaxshi yoʻlga qoʻyishda, yoshlarni oila qurishga tayyorlashda, yoshlarimizning har xil oqimlarga qoʻshilib ketishining oldini olishda OFY, maktab va ichki ishlar boʻlimi hamkorligini yoʻlga qoʻyish lozim, deb hisoblayman.

Yigʻilishda muhokama etilgan masala yuzasidan tegishli qaror qabul qilindi.

A. Jumaniyozov.