“Тараққиёт кўзгуси” ва “Менинг оилам” газеталарига нима учун обуна бўлиш керак?
Кейинги вақтларда вақтли матбуот нашрларида, айниқса, ижтимоий тармоқларда “даврий босма нашрларнинг умри тугади” қабилида кўплаб фикр-мулоҳазалар билдирилмоқда. Айниқса, электрон оммавий ахборот воситалари ходимлари ҳамма тезкор ахборотлар ижтимоий тармоқларда ёритилмоқда, матбуот нашрларига эҳтиёж қолмади, ўрнини интернет журналистика эгаллаб олди, дейишгача боришмоқда.
Тўғри, булар мамлакат миқёсидаги даврий нашрларга нисбатан айтилган фикр. Бироқ мен ўзим 34 йилдан бери меҳнат қилаётган “Тараққиёт кўзгуси” газетаси ҳам даврий нашрга мансублиги учун ўз фикрларимни айтгим келди. Шу ўринда аввало бизнинг таҳририятимизда жорий йилда амалга оширилган ишларга тўхталсам. Йил бошида 7 мингга яқин нусхада, йил охирлаган айни кунларда 5472 нусхада, ойда тўрт марта босилиб, деярли тўлиқ таҳририятнинг ўз кучи билан ҳали “тафти совимай” тарқатилиб турган газетамизнинг туманимиз ижтимоий-сиёсий ҳаётида ҳам ўз ўрни бор. Газета ижодкорлари газетадан ташқари ўзларининг ташаббуси билан ташкил этилган ёш ижодкорларни қўллаб-қувватловчи “Жайхун илҳомлари” ННТ, газета қошида ташкил этилган “Жайхун садоси” интернет радиоси, айни кунда китоб фонди тўрт мингга яқинлашган кутубхона, Амударё телевидениеси фаолиятини самарали олиб бориш билан бирга, “Оммавий китобхонлик ойлиги” ташкил этиб, ойлик доирасида 16 та мактаб, коллежларда кўчма китоб карвони тадбирлари ўтказишди ва ҳар бир тадбирда кутубхона китоблари кўргазмаси намойиш этилди, хоҳловчилар кутубхонага аъзо қилинди.
Туманимизда ўтказилаётган турли тадбирларда китобларимиз кўргазмасини ташкил этиб, аҳоли, айниқса, ёшларни китоб ўқишга даъват этмоқдамиз.
Газетада йил мобайнида тўрт марта иншолар танлови ўтказилиб, ғолиблар рағбатлантирилди ва ижодий ишлари газетада ёритилди. Газетанинг деярли ҳар бир сонида ёш ижодкорлар ижодидан намуналар ўрин олган махсус саҳифа бор. Шунингдек, тумандаги ёш ижодкорларнинг тўртта тўплами нашр этилди. Булардан ташқари, бугунгидек тезкор даврда туманимизда бўлаётган янгиланишлар, ривожланишлар, эришилаётган ютуқлардан аҳолини хабардор қилиб, ҳар бирининг мустаҳкам фуқаролик позициясига эга бўлишига интилмоқдамиз.
Жорий йилнинг ўзида туман ҳокимлиги ва “Тараққиёт кўзгуси” газетаси ҳамкорлигида туманнинг бешта ҳудудида “Халқ кутубхоналари” ташкил этилди. Булар ҳам ёшларимиз, аҳоли онгида соғлом фикрни тарбиялашга, уларнинг ҳаётда ўз ўрнини топишларига хизмат қилади.
Энди юқоридаги айтганим – даврий босма нашрлар хусусидаги фикрларга келсак: Газета – ҳеч қачон ўлмайди. Мен интернет журналистиканинг тезкорлигини, тарқатиш имкониятининг юқорилигини камситмаган ҳолда, газеталарнинг ўрнини ҳеч қандай восита боса олмайди, дегим келади. Боиси, ҳеч қайси ижтимоий тармоқларда ўқиган мақолангиз – газетани қўлингизга олиб, батафсил ўқиганда олган таассуротни бера олмайди. Қолаверса, ижтимоий тармоқлардаги ахборотларнинг матни саёз, имло хатолари кўп. Сайтларнинг кўпида деярли бир хил хабарлар. Масалан бирон ЙТҲ ёки бошқа ҳодиса ҳақида ҳамма сайт бир хабарни беради. Газеталарда бу ҳолни деярли учратмайсиз. Интернет-нашрларда хабарлар, воқеалар асосан батафсил эмас, қисқагина берилади. Буларнинг ичида ўз тасдиғини топмаганлари ҳам кўп учрайди. Бирон хабар ўқиган сайтингиз эртасига бундай эмас экан, деб ёзаверади. Интернет нашрлар кўпроқ сенсацияга интилишаётгандай, назаримда.
Ўйлайманки, қарийб 84 йилдан бери қадим Жайхуннинг қўш соҳилида жойлашган туманимизнинг халқи билан ҳамнафас, ҳамқадам бўлиб келаётган “Тараққиёт кўзгуси” саҳифаларини варақлаган киши тезкор даврнинг ўз зиммасига қўяётган мақсад-вазифаларини шараф билан адо этаётганини ҳис қилади.
Қайси бир амударёлик ўзининг кимлигини, қандай эл фарзанди эканлигини билмоқчи бўлса, “Тараққиёт кўзгуси”ни варақласин. Унда бетакрор тарихимиз мужассам. Уни ҳеч нарсага алмашиб бўлмайди! Шундай экан, 2015 йилда “Ўзбекистоннинг энг яхши ҳудудий нашри” сифатида эътироф этилган “Тараққиёт кўзгуси” ва унинг иловаси “Менинг оилам” газеталарига 2019 йил учун обуна бўлишга шошилинг!
Агар 3-4 кунлик иш ҳақингиз эвазига газетамизга обуна бўлсангиз, йил давомида мамлакатимиз ва туманимиз ҳаётидаги ўзгариш ва янгиликлар билан танишиб борасиз. Ўз навбатида интернетда туманимиз номини дунёга танитаётган веб-сайтимиз, интернет радио ва Амударё телевидениесининг ҳам узлуксиз ишлашига ҳисса қўшган бўласиз.
Ойгул РАЖАБОВА, газетанинг махсус мухбири:
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
