ХАЛҚ ТАЪЛИМИ ТИЗИМИДА “БАХТЛИ МАКТАБ” ЛОЙИҲАСИ ТАТБИҚ ЭТИЛМОҚДА

2018 йилнинг 5-7 ноябрь кунлари Ўзбекистон Республикаси Халқ таълими вазирлиги, БМТнинг гиёҳванд моддалар ва жиноятчилик бўйича бошқармаси билан ҳамкорликда ўқувчилар ва оилалар билан самарали ишлаш, бир қатор ижтимоий-психологик ҳаётий кўникмаларни ривожлантириш, халқ таълими тизимидаги тарбия жараёнидаги психологик-педагогик компетентлигини оширишга йўналтирилган “Мустаҳкам оила” тренинг дастурини ва “Бахтли мактаб” лойиҳаси концепциясини ўзлаштириш бўйича республика ўқув семинарини ташкил этган, бу борадаги ишларни кейинчалик республика даражасида кенгайтириш назарда тутилган эди.

Шу асосда Қорақалпоғистон Республикаси Халқ таълими вазирлигининг 2019 йил 4 январь кунги 01-10 / 1-0009-сонли хатига асосан “Бахтли мактаб” лойиҳасини амалга оширишга туман мактаблари учун 76-сонли мактаб таянч мактаб қилиб белгиланди.

Шу муносабат билан жорий йилнинг 7-9 февраль кунлари Нукус шаҳридаги 27-сонли мактабда лойиҳани амалга оширишга бағишланган ўқув-семинарда мазкур мактабнинг маънавий-маърифий ишлар бўйича директор ўринбосари Нусрат Камолов, психологи Юлдуз Бобожонова, ёшлар етакчиси Муяссар Раҳматулллаева, жисмоний тарбия фани ўқитувчиси Расул Хўжамуродовлар қатнашди ва уларга Қорақалпоғистон Республикаси Халқ таълими вазирлиги томонидан сертификатлар берилди.

Улар эндиликда тумандаги барча мактабларда ушбу лойиҳани амалга ошириш учун педагогик жамоалари билан иш олиб борадилар.

Мазкур мактабда 25-26 февраль кунлари 47-,64-, 10-, 48-, 40-, 15-, 11-, 33-, 52-, 20-сонли мактаблар маънавий-маърифий ишлар бўйича директор ўринбосарлари, ёшлар етакчилари иштирокида “Мустаҳкам оила” тренинг дастури асосида амалий семинар ўтказилди.

Ўқув семинарнинг асосий мақсади мактаб, оила, маҳалла ҳамкорлигини янада мустаҳкамлаш, ўқувчилар ва ота-оналар билан самарали иш олиб бориш, бу борада педагог ходимларнинг малакасини ва маҳоратини оширишдан иборат эди. Амалий семинарда дастурни мактабларга татбиқ этиш борасида муайян билим ва аниқ мақсадларга эга бўлган ўқитувчиларга туман Халқ таълими бўлими томонидан сертификат тақдим этилди.

Севара Бозорбоева, туман ХТБ ходими.