Коллежда Наврўз муносабати билан тадбир ўтказилди

16 март куни байрамона безатилган Манғит иқтисодиёт коллежида Наврўзга бағишланиб ўтказилган “Хуш келдинг, Наврўз!” номли байрам тадбирида коллеж ўқитувчилари ва ўқувчилари иштирок қилдилар.

Ушбу тадбир доирасида 13 та гуруҳ ўқувчилари томонидан миллий санъатимиз ва миллий таомларимиз ҳамда миллий қадриятларимиз кўргазмаси ташкил этилди. Шунингдек, ҳар бир гуруҳ томонидан қардош халқларнинг миллий либослари ҳам намойиш этилди.

Ҳар хил миллий таомларга тўла байрам дастурхонлари иштирокчилар кўзларини қувонтирган бўлса, қўл меҳнати асосида тайёрланган ажойиб рассомчилик намуналари, бетакрор дурадгорлик ишлари, моҳирона тайёрланган бичиш ва тикиш намуналари йиғилганларнинг кўзларини қувонтириб, ҳайратини оширди. Булар албатта, коллеж ўқитувчилардан ташкил топган ҳайъат аъзоларининг одилона баҳоларига сазавор бўлди.

Тадбирда энг яхши тайёргарлик кўрган 7-16- “Товаршунослик” гуруҳи 1-ўринни, 3-16- “Бухгалтерия ҳисоби” гуруҳи 2-ўринни, 2-17- “Бухгалтерия ҳисоби” гуруҳи 3-ўринни эгаллади. Ушбу гуруҳлар ва “Энг яхши ихтиро”, “Энг яхши қўл меҳнати”, “Энг яхши рассомчилик иши”, “Энг фаол иштирокчи”, “Энг яхши дурадгорлик иши” номинациялари бўйича иштирок этган гуруҳлар ҳам муносиб тақдирландилар.

Наврўзга бағишланган байрам тадбирининг бадиий қисмида ёшлар иттифоқи бошланғич ташкилоти ҳамда “English speaking students” клуби аъзолари жонбозлик кўрсатишди.

Тадбирда “ҚВЗ” жамоаси ўз чиқишлари билан иштирок этишиб, байрам иштирокчиларига хуш кайфият, унутилмас таассуротлар улашдилар.

Коллежнинг иқтидорли талабаларидан бири, коллеж ёшлар иттифоқи бошланғич ташкилоти Кенгаши аъзоси Бахтиёр Қутимов томошабинлар билан турли хил қизиқарли интерактив ўйинлари ўтказди.

Коллеж ўқувчилари Наврўз ҳақида шеърлар ва қўшиқлар айтдилар, жўшқин рақсларини намойиш этдилар. Наврўз байрами коллежда кўтаринки руҳда нишонланди.

Сайёра ИБОДУЛЛАЕВА, коллежнинг инглиз тили ўқитувчиси.

Бекзод ИСМОИЛОВ, Ёшлар иттифоқи бошланғич ташкилоти етакчиси.